அதிமுக முன்னாள் அமைச்சரும் மயிலம் தொகுதி சட்டமன்ற உறுப்பினருமான சி.வி.சண்முகத்திற்கு எதிராக தொடரப்பட்ட தேர்தல் தொடர்பான வழக்கை சென்னை உயர்நீதிமன்றம் நிராகரித்தது. 2026 சட்டமன்றத் தேர்தலில் மயிலம் தொகுதியில் அதிமுக சார்பில் போட்டியிட்ட அவர் தனது வேட்புமனுவுடன் சமர்ப்பித்த பிரமாணப் பத்திரத்தில் சொத்து விவரங்களை முழுமையாக வெளிப்படுத்தவில்லை என்றும், முந்தைய தேர்தலுடன் ஒப்பிடும்போது சொத்து மதிப்பு அசாதாரணமாக உயர்ந்துள்ளது என்றும் குற்றம் சாட்டப்பட்டது.

மயிலம் தொகுதி வாக்காளர் ஒருவர் தாக்கல் செய்த மனுவில், 2021 ஆம் ஆண்டு தேர்தலில் அசையும் சொத்துக்களின் மதிப்பு சுமார் 12 லட்சம் ரூபாயாக இருந்ததாகக் குறிப்பிடப்பட்டிருந்த நிலையில், 2026 ஆம் ஆண்டு வேட்புமனுவில் அது 60 லட்சத்துக்கும் மேல் உயர்ந்துள்ளதாகத் தெரிவிக்கப்பட்டது. இந்த உயர்வுக்கான தெளிவான காரணங்களோ ஆதாரங்களோ பிரமாணப் பத்திரத்தில் இடம்பெறவில்லை என்றும், இது தேர்தல் விதிகளை மீறிய செயல் என்றும் மனுதாரர் தரப்பில் வாதிடப்பட்டது.

இதேபோன்ற குற்றச்சாட்டுடன் மற்றொரு அதிமுக முன்னாள் அமைச்சருக்கு எதிராகவும் தனித்தனியாக வழக்கு தொடரப்பட்டிருந்தது.இந்த மனுக்கள் சென்னை உயர்நீதிமன்ற தலைமை நீதிபதி தலைமையிலான அமர்வில் விசாரணைக்கு வந்தன. நீதிபதிகள் இரு தரப்பு வாதங்களையும் கேட்டபின், இதுபோன்ற மனுக்கள் ஏற்கனவே பலமுறை தள்ளுபடி செய்யப்பட்டுள்ளன என்பதை சுட்டிக்காட்டினர்.

இதையும் படிங்க: அதிமுக எம்எல்ஏக்கள் ராஜினாமா விவகாரம்..! வழக்கு தள்ளுபடி... சென்னை ஹைகோர்ட் அதிரடி உத்தரவு..!!

தேர்தல் ஆணையம் மற்றும் வருமான வரித்துறை போன்ற அதிகார அமைப்புகளுக்கு விசாரணை நடத்த உத்தரவிடக் கோரும் இத்தகைய மனுக்களை நீதிமன்றம் ஏற்க முடியாது என்றும், தேர்தல் முடிவுகளை எதிர்த்து சட்டப்படி தேர்தல் மனு தாக்கல் செய்வதே சரியான வழி என்றும் தெரிவித்தனர். இதன்படி, சி.வி.சண்முகத்திற்கு எதிரான மனு உள்ளிட்ட வழக்குகள் முழுமையாக நிராகரிக்கப்பட்டன.

இதையும் படிங்க: அதிமுகவில் ஓரணியில் திரளும் அதிருப்தி ’தலைகள்’... 13 தோல்வி பழனிசாமிக்கு எதிராக ’மூவர் அணி’ அதிரடி மூவ்...!