அமெரிக்கா மற்றும் ஈரான் இடையே போர் மற்றும் பொருளாதாரப் பதற்றம் உச்சமடைந்துள்ள சூழலில், அமெரிக்க அதிபர் டொனால்ட் டிரம்பின் நம்பிக்கைக்குரிய முதன்மை உதவியாளரும், வெளியுறவுத் துறை அமைச்சருமான மார்கோ ரூபியோ நான்கு நாள் அதிகாரப்பூர்வ பயணமாக இந்தியா வந்துள்ளார். இந்திய-அமெரிக்க உறவுகளை வலுப்படுத்தும் நோக்கில் நடைபெறும் இந்த சுற்றுப்பயணத்தின் ஒரு பகுதியாக, நேற்று காலை அவர் தனது மனைவியுடன் ஆக்ராவில் அமைந்துள்ள உலகப் புகழ்பெற்ற தாஜ்மஹாலைப் பார்வையிட்டார். 

அங்கு இருவரும் தாஜ்மஹாலின் பிரம்மாண்டமான அழகில் மயங்கி, பல புகைப்படங்களை எடுத்துக்கொண்டனர். இந்தச் சம்பவம் சர்வதேச அரசியல் வட்டாரத்தில் பெரும் பரபரப்பை ஏற்படுத்தியுள்ளது. ஐதராபாத்தில் உள்ள ஈரான் தூதரகம் இந்தப் புகைப்படங்களை மேற்கோள் காட்டி, தனது அதிகாரப்பூர்வ எக்ஸ் (முன்னர் ட்விட்டர்) பக்கத்தில் கடுமையான கிண்டலை வெளியிட்டுள்ளது. “அமெரிக்க வெளியுறவுச் செயலாளர் மார்கோ ரூபியோவிற்கு உலக வரலாறு அல்லது கட்டிடக்கலை பற்றிய சரியான புரிதல் இருந்திருந்தால், இந்த இடத்திற்கு வந்து புகைப்படம் எடுக்க அவர் ஒருபோதும் துணிந்திருக்க மாட்டார்” என அந்தப் பதிவில் தெரிவிக்கப்பட்டுள்ளது.

இந்தக் கிண்டல் பின்னணியில் முக்கியமான அரசியல் முரண்பாடு ஒன்று வெளிப்படுகிறது. ஒருபுறம் அமெரிக்கா ஈரான் மீது கடுமையான பொருளாதாரத் தடைகளைத் தொடர்ந்து விதித்து, அந்நாட்டின் பண்டைய பெர்சிய (ஈரானிய) கலாச்சாரம், வரலாறு மற்றும் பொருளாதாரத்தை பலவீனப்படுத்த முயற்சிப்பதாக ஈரான் குற்றம்சாட்டுகிறது. மறுபுறம், பெர்சிய கலாச்சாரத்தின் உன்னத அடையாளமாகக் கருதப்படும் தாஜ்மஹாலை அமெரிக்க வெளியுறவு அமைச்சர் ரசித்துப் புகைப்படம் எடுப்பது பெரும் முரண்பாடாகப் பார்க்கப்படுகிறது.

இதையும் படிங்க: "அதிசயமே அசந்து போகும்.. நீ எந்தன் அதிசயம்"..!! காதல் மனைவியுடன் தாஜ்மஹாலை ரசித்த அமெரிக்க மந்திரி..!!

தாஜ்மஹால் 17ஆம் நூற்றாண்டில் மொகலாயப் பேரரசர் ஷாஜஹான் தனது அன்புக்குரிய மனைவி மும்தாஜ் மஹாலின் நினைவாகக் கட்டியது. மும்தாஜ் மஹால் பூர்விகமாகப் பெர்சிய வம்சாவளியைச் சேர்ந்தவர். இதனாலேயே தாஜ்மஹாலின் வடிவமைப்பில் பெர்சிய கட்டிடக்கலையின் தாக்கம் ஆழமாகப் பதிந்துள்ளது. பிரம்மாண்டமான வெண்மை மார்பிள் குவிமாடங்கள், சுவர்களில் செதுக்கப்பட்ட நுணுக்கமான இஸ்லாமிய கல்வெட்டுகள், ‘சார்பாக்’ எனப்படும் நான்கு பிரிவு தோட்ட அமைப்பு, அரபு-பெர்சிய கலை வடிவங்கள் ஆகியவை இதற்குச் சான்றாகும். யுனெஸ்கோ உலகப் பாரம்பரிய சின்னமான இந்த நினைவுச் சின்னம் இந்தியாவின் பெருமையாக மட்டுமல்லாமல், பெர்சிய-இஸ்லாமிய கட்டிடக்கலையின் உச்ச உதாரணமாகவும் உலகம் முழுவதும் போற்றப்படுகிறது.

ரூபியோவின் இந்தப் பயணம் இருதரப்பு உறவுகளை வலுப்படுத்தும் நோக்கம் கொண்டதாக இருந்தாலும், ஈரான் தரப்பின் இந்தக் கிண்டல் அமெரிக்காவின் வெளியுறவுக் கொள்கையில் உள்ள இரட்டைத் தரத்தை சுட்டிக்காட்டுவதாக அரசியல் பார்வையாளர்கள் கருதுகின்றனர். தாஜ்மஹால் போன்ற கலாச்சாரச் சின்னங்கள் அரசியல் எல்லைகளைத் தாண்டி மானுடத்தின் பொது பாரம்பரியமாகத் திகழ்வதை இந்தச் சம்பவம் மீண்டும் நினைவூட்டுகிறது.
 

இதையும் படிங்க: "அதிசயமே அசந்து போகும்.. நீ எந்தன் அதிசயம்"..!! காதல் மனைவியுடன் தாஜ்மஹாலை ரசித்த அமெரிக்க மந்திரி..!!