பெங்களூரு எலஹங்காவில் உள்ள சொகுசு பங்களாவில் திருமணம் நடத்தும் விஷயத்தில் ஆந்திராவின் முன்னாள் முதல்வர் ஜெகன் மோகன் ரெட்டிக்கும் அவரது தங்கை ஷர்மிலாவுக்கும் இடையே மோதல் ஏற்பட்டுள்ளது.

ஒய்.எஸ்.ஆர். காங்கிரஸ் கட்சியைச் சேர்ந்த ஜெகன் மோகன் ரெட்டியின் தந்தை ராஜசேகர ரெட்டி ஆந்திர மாநில முதல்வராக இருந்தவர். கர்நாடக மாநிலம் பெங்களூரின் எலஹங்காவில் அவருக்கு 20 ஏக்கர் நிலம் இருந்தது. அந்த இடத்தில் சொகுசு பங்களா கட்டி ‘எலஹங்கா பேலஸ்’ எனப் பெயரிட்டார். அவரது குடும்பத்தின் பல திருமணங்கள் இங்கு நடந்தன.

ராஜசேகர ரெட்டி இறப்பதற்கு முன் தன் மகன் ஜெகன் மோகன் ரெட்டிக்கும் மகள் ஷர்மிலாவுக்கும் இந்த இடத்தை சமமாகப் பிரித்துக் கொடுத்திருந்தார். அங்கு இருவரும் தனித்தனியாகப் பங்களாக்கள் கட்டியுள்ளனர். எலஹங்கா பேலஸில் இருவரின் வீடுகளும் ஒரே காம்பவுண்டில் உள்ளன. இங்கு எந்த நிகழ்ச்சிகள் நடத்தினாலும் ஒருவருக்கொருவர் அனுமதி பெறுவது அவசியம். தற்போது ஜெகன் மோகனுக்கும் ஷர்மிலாவுக்கும் இடையில் சொத்துத் தகராறு நடந்து வருகிறது.

இதையும் படிங்க: 2 மாத ஆண் குழந்தையின் வயிற்றில் வளரும் கரு! கர்நாடகாவில் அதிர்ச்சி! 50 லட்சத்தில் ஒரு அதிசயம்!

இந்நிலையில் ஷர்மிலாவின் மகள் அஞ்சலிக்கு வரும் நவம்பர் 25 ஆம் தேதி திருமணம் நடக்கவுள்ளது. இதை எலஹங்கா பேலஸில் நடத்தத் தீர்மானித்தார். இதற்காகத் தன் அண்ணனும் ஒய்.எஸ்.ஆர். காங்கிரஸ் தலைவருமான ஜெகன் மோகன் ரெட்டியிடம் அனுமதி கேட்டார். ஆனால் பாதுகாப்புக் காரணங்களைக் கூறி அந்த வீட்டில் திருமணம் நடத்த ஜெகன் மோகன் அனுமதி மறுத்துள்ளார்.

ஆந்திர சட்டசபைத் தேர்தலில் தோற்ற பின் ஜெகன் மோகன் ரெட்டி பெரும்பாலும் எலஹங்காவில் உள்ள பங்களாவில்தான் வசிக்கிறார். இங்கு திருமணம் நடத்தினால் போட்டோகிராபர்கள், வீடியோ எடுப்பவர்கள், சமையல் ஊழியர்கள் உள்ளிட்ட பலர் வருவர். தன் வீட்டின் போட்டோக்கள், வீடியோக்கள் வெளியே தெரியும். இது தனக்கும் குடும்பத்தினரின் பாதுகாப்புக்கும் பாதிப்பை ஏற்படுத்தும் என ஜெகன் மோகன் ரெட்டி கருதுகிறார்.

இதைப் பொருட்படுத்தாத ஷர்மிலா எலஹங்கா பேலசிலேயே திருமணத்தை நடத்தத் தயாராகி வருகிறார். மகளின் திருமண அழைப்பிதழிலும் இதே முகவரியை அச்சிட்டு உறவினர்கள் மற்றும் வி.ஐ.பி.க்களுக்கு வழங்கியுள்ளார். பாதுகாப்புப் பிரச்சினை என்றால் தன் மகளின் திருமண நாளன்று வேறு இடத்துக்குச் சென்றுவிடும்படி ஜெகன் மோகன் ரெட்டிக்கு அவர் அறிவுரை கூறியுள்ளார்.

இதையும் படிங்க: செஃப் தாமு ஃபேவரட் ஃபுட்.! இட்லியிலேயே மலர் வளையம் வைத்து அஞ்சலி..! கண்கலங்க வைக்கும் அர்ப்பணிப்பு!