குழந்தைகளின் எதிர்காலத்தை காக்கும் வகையில், சமூக வலைதளங்களுக்கு கட்டுப்பாடு விதிக்கும் விவாதம் இந்தியாவில் தீவிரமடைந்து வருகிறது. ஸ்மார்ட்போன் மற்றும் இணைய பயன்பாடு பெருமளவு அதிகரித்துள்ள நிலையில், பள்ளி செல்லும் சிறுவர்கள், சிறுமியர் சமூக வலைதளங்கள், கேமிங் ஆப்கள் ஆகியவற்றில் அதிக நேரம் செலவிடுகின்றனர்.

இதனால் குழந்தைகள் வெளியில் உடல் உழைப்புடன் விளையாடாமல், ஒரே இடத்தில் அமர்ந்து திரை பார்ப்பதில் மூழ்கியுள்ளனர். தொடர்ந்து ஒளிரும் திரையை பார்ப்பதால் கண் பார்வை பாதிக்கப்படுகிறது. உடல் ரீதியாகவும், மன ரீதியாகவும் பலவீனமடைகின்றனர். பெற்றோர்கள், ஆசிரியர்கள், மருத்துவர்கள் இதை பெரும் பிரச்னையாக கருதுகின்றனர்.

ஏற்கனவே ஆஸ்திரேலியா 16 வயதுக்கு கீழ் உள்ள குழந்தைகளுக்கு சமூக வலைதளங்களை தடை செய்துள்ளது. அங்கு டிக்டாக், இன்ஸ்டாகிராம், ஃபேஸ்புக், யூடியூப் போன்றவை 16 வயதுக்கு கீழ் உள்ளோருக்கு தடை செய்யப்பட்டுள்ளன. இதை பல நாடுகள் பின்பற்ற திட்டமிட்டுள்ளன.

இதையும் படிங்க: MLA பழனியாண்டியை அரெஸ்ட் பண்ணனும்... கொலைவெறி தாக்குதல்..! வாயை திறக்காத ஸ்டாலின்... தமிழிசை கண்டனம்..!

இந்தியாவில் ஆந்திரா மாநில அமைச்சர் நாரா லோகேஷ் சமீபத்தில் இதுபோன்ற தடையை அமல்படுத்தலாம் என்று கூறினார். ஆஸ்திரேலியா, பிரான்ஸ், சிங்கப்பூர் போன்ற நாடுகளின் கொள்கைகளை ஆய்வு செய்து, குறிப்பிட்ட வயதுக்கு கீழ் உள்ள குழந்தைகளுக்கு சமூக வலைதள அணுகலை கட்டுப்படுத்த திட்டமிடுவதாக தெரிவித்தார்.

தற்போது கேரள மாநில பொது கல்வித்துறை அமைச்சர் வி. சிவன்குட்டியும் இதே கருத்தை முன்வைத்துள்ளார். அவர் கூறியதாவது: “ஒரு காலத்தில் வெளியில் விளையாடிய குழந்தைகள் இப்போது சமூக வலைதள தாக்கத்தில் வீட்டுக்குள் முடங்கியுள்ளனர். நீண்ட நேரம் திரை பார்ப்பதால் கண் பார்வை பாதிக்கப்படுகிறது.

உடல், மன ஆரோக்கியம் கெடுகிறது. இதை தடுக்க சமூக வலைதளங்களுக்கு கட்டுப்பாடு விதிக்கலாமா என கேரள அரசு தீவிரமாக யோசிக்கிறது. பெற்றோர், குழந்தைகளுக்கு ஆக்கப்பூர்வமான திட்டங்கள் செயல்படுத்துவது குறித்தும் ஆலோசிக்கிறோம். பொதுமக்கள் தங்கள் கருத்துக்களை தெரிவிக்கலாம். அனைத்து தரப்பு கருத்துக்களையும் கேட்டு சிறந்த முடிவு எடுப்போம்” என்றார்.

கேரளா இணைய பயன்பாட்டில் முன்னணியில் உள்ளது. எனவே இந்த பிரச்னை அங்கு மிக முக்கியமானது. மாநில அரசு முழு தடை விதிக்காமல், பொறுப்பான பயன்பாட்டை ஊக்குவிக்க விரும்புகிறது. பெற்றோர் விழிப்புணர்வு, குழந்தைகளுக்கு ஆக்கப்பூர்வமான செயல்பாடுகள் போன்றவற்றையும் முன்னெடுக்க திட்டமிட்டுள்ளது.

இந்தியாவில் பல மாநிலங்கள் இதுபோன்ற கட்டுப்பாடுகளை ஆராய்ந்து வருகின்றன. குழந்தைகளின் ஆரோக்கியம், கல்வி, மன வளர்ச்சி ஆகியவற்றை காக்கும் நோக்கில் இந்த விவாதம் முக்கியத்துவம் பெற்றுள்ளது. பொதுமக்கள் கருத்துக்களை அளிப்பதன் மூலம் இந்த முடிவுக்கு உதவலாம். 

இதையும் படிங்க: கிரீஸில் சோக சம்பவம்: மோதிக்கொண்ட படகுகள்..!! பரிதாபமாக பறிபோன 15 உயிர்..!!