மேற்கு வங்க சட்டசபை தேர்தலின் இரண்டாம் கட்ட ஓட்டுப்பதிவு நடைபெற்று வரும் நிலையில், வன்முறை சம்பவங்களும், குற்றச்சாட்டுகளும் அதிகரித்து அரசியல் சூழ்நிலை பதற்றமாக மாறியுள்ளது. இந்நிலையில், மாநில முதல்வர் மம்தா பானர்ஜி (Mamata Banerjee), பாஜ மீது கடுமையான குற்றச்சாட்டுகளை முன்வைத்துள்ளார்.

நாடியா மாவட்டத்தின் சாப்ரா தொகுதியில் உள்ள ஓட்டுச்சாவடியில் ஏற்பட்ட மோதல் பெரும் பரபரப்பை ஏற்படுத்தியது. அங்கு பாஜ தேர்தல் முகவராக இருந்த மொஷாரப் மிர் என்பவர் தாக்கப்பட்டு காயமடைந்தார். இரும்புக் கம்பிகள் மற்றும் ஆயுதங்களால் தாக்குதல் நடத்தப்பட்டதாக தகவல்கள் தெரிவிக்கின்றன. காயமடைந்த அவர் மருத்துவமனையில் சிகிச்சை பெற்று வருகிறார்.

இதனுடன், காஞ்ச்ராபாரா பகுதியில் உள்ள ஓட்டுச்சாவடிக்கு அருகில் தேர்தல் விதிகளை மீறி சிலர் இருந்ததாக கூறி, இரு கட்சியினரிடையே வாக்குவாதம் ஏற்பட்டது. இந்த வாக்குவாதம் பின்னர் கைகலப்பாக மாறியதால் போலீசார் தலையிட்டு இரு தரப்பினரையும் கைது செய்தனர்.

இதையும் படிங்க: மே 4 ரிசல்ட் வளர்ந்த இந்தியா கனவை மேலும் வலுப்பட்டுத்தும்!! உ.பி பொதுக்கூட்டத்தில் பிரதமர் மோடி உறுதி!

இந்த சம்பவங்களை தொடர்ந்து செய்தியாளர்களிடம் பேசிய மம்தா பானர்ஜி, “இது ஜனநாயகத்தின் திருவிழா. ஆனால் பாஜவினர் வன்முறையை ஏற்படுத்தி தேர்தலை சீரழிக்க முயல்கின்றனர். எங்கள் தொண்டர்கள் மீது திட்டமிட்டு தாக்குதல் நடத்தப்படுகிறது. ஓட்டுப்பதிவு அமைதியாக நடைபெற வேண்டும்” என்று குற்றம்சாட்டினார். மேலும், பாஜ தேர்தலில் முறைகேடு செய்ய முயற்சிப்பது தெளிவாகத் தெரிகிறது என்றும் அவர் கூறினார்.

இதற்கு பதிலளித்த பாஜ தலைவர் சுவேந்து அதிகாரி (Suvendu Adhikari), மம்தா பானர்ஜியே வன்முறைக்கு காரணம் என்றும், ரவுடி கும்பல்களுடன் சுற்றி வாக்காளர்களை அச்சுறுத்துவதாகவும் குற்றம்சாட்டினார்.

இரு தரப்பும் ஒருவரை ஒருவர் குற்றம்சாட்டும் சூழலில், தேர்தல் சூழ்நிலை மேலும் பதற்றமடைந்துள்ளது. பாதுகாப்பு ஏற்பாடுகள் அதிகரிக்கப்பட்டுள்ள நிலையில், மீதமுள்ள ஓட்டுப்பதிவு அமைதியாக நடைபெறுமா என்ற கேள்வி எழுந்துள்ளது.

இதையும் படிங்க: பாஜக ஆட்சிக்கு வந்தால் மீனு கூட சாப்பிட முடியாது!! உணவு அரசியலை புகுத்திவிடும்!! மம்தா நேரடி தாக்கு!!