தமிழக அரசியல் களம் புதிய உச்சகட்ட பரபரப்பை நோக்கி நகர்ந்து கொண்டிருக்கிறது. சட்டமன்றத் தேர்தலுக்குப் பிறகு தவெக ஆட்சி பொறுப்பேற்றதைத் தொடர்ந்து, முந்தைய திமுக அரசின் பல்வேறு துறைகளில் நடைபெற்றதாகக் கூறப்படும் ஊழல் மற்றும் முறைகேடுகள் குறித்த குற்றச்சாட்டுகள் தீவிரமடைந்துள்ளன. புதிய அமைச்சர்கள், இந்தப் புகார்களை விசாரித்து குற்றவாளிகள் மீது கடுமையான நடவடிக்கை எடுக்கப்படும் என்று தொடர்ச்சியாக அறிவித்து வருகின்றனர். இது எதிர்க்கட்சியினரிடையே பெரும் அதிர்ச்சியை ஏற்படுத்தியுள்ளது.

மின்வாரியத் துறையில் வெளியிடப்பட்ட வெள்ளை அறிக்கை பெரும் பரபரப்பை ஏற்படுத்தியது. கடந்த ஆட்சியில் தனியார் நிறுவனங்களிடமிருந்து மின்சாரம் கொள்முதல் செய்யப்பட்டதில் பெரும் முறைகேடுகள் நிகழ்ந்ததாகவும், இதன் மூலம் சுமார் ரூ.58,000 கோடி அளவுக்கு மாநிலத்துக்கு நிதி இழப்பு ஏற்பட்டதாகவும் அந்த அறிக்கை குற்றம் சாட்டியுள்ளது. மின்சாரத் துறை அமைச்சர் சி.டி. நிர்மல் குமார் இந்த அறிக்கையை வெளியிட்டார். முறைகேடுகளில் ஈடுபட்டவர்கள் மீது குற்றவியல் வழக்குகள் பதிவு செய்யப்பட்டு, உரிய நடவடிக்கை எடுக்கப்படும் என்றும் அவர் உறுதியளித்தார். 

முன்னாள் மின்வாரிய அமைச்சர் செந்தில் பாலாஜியின் இடங்களில் விரைவில் லஞ்ச ஒழிப்புத் துறை ரெய்டு நடத்தப்படலாம் என எதிர்பார்க்கப்படுகிறது. அதே நாளில், முன்னாள் நெடுஞ்சாலைத் துறை அமைச்சர் எ.வ. வேலு சார்ந்த இடங்களில் லஞ்ச ஒழிப்புத் துறை அதிரடி சோதனை நடத்தியது. சாலை அகலப்படுத்தல் மற்றும் மேம்பாட்டுப் பணிகளுக்கான ஒப்பந்தங்களில் முறைகேடு நடைபெற்று, சுமார் ரூ.3.23 கோடி மோசடி செய்யப்பட்டதாக அறப்போர் இயக்கம் அளித்த புகாரின் அடிப்படையில் இந்த நடவடிக்கை மேற்கொள்ளப்பட்டது. திமுக தரப்பினர் இதை “அரசியல் பழிவாங்கும் நடவடிக்கை” என்று வன்மையாகக் கண்டித்துள்ளனர்.

இதையும் படிங்க: லஞ்சம் கொடுக்காதீர்கள், தகவல் கொடுங்கள்.. அமைச்சர் லோகேஷ் தமிழ்ச்செல்வன் வேண்டுகோள்!

இந்நிலையில் பத்திரப்பதிவுத் துறை அமைச்சர் லோகேஷ் தமிழ்ச்செல்வன், “தேவைப்பட்டால் இந்தத் துறையிலும் வெள்ளை அறிக்கை வெளியிடப்படும்” என்று அறிவித்துள்ளார். முகூர்த்த நாட்களில் சர்வர்கள் செயல்படும் வகையில் நடவடிக்கை எடுக்கப்படும், சந்தை மதிப்பு மற்றும் வழிகாட்டி மதிப்புக்கு இடையிலான இடைவெளியைக் குறைக்கக் குழு அமைக்கப்படும், துறையில் வெளிப்படைத்தன்மை உறுதி செய்யப்படும் என்றும் அவர் தெரிவித்தார்.

இந்தத் தொடர் நடவடிக்கைகள் தமிழக அரசியலில் புதிய விவாதங்களை ஏற்படுத்தியுள்ளன. புதிய அரசு ஊழலை ஒழிக்கும் நோக்கில் தீவிரமாகச் செயல்படுகிறதா அல்லது எதிர்க்கட்சியினருக்கு எதிரான பழிவாங்கல் அரசியலில் ஈடுபடுகிறதா என்பது குறித்து அரசியல் விமர்சகர்கள் மத்தியில் கருத்து மோதல்கள் எழுந்துள்ளன. தமிழக அரசியல் களம் இன்னும் சூடுபிடிக்கும் என எதிர்பார்க்கப்படுகிறது. மக்கள் நலன் கருதி வெளிப்படைத்தன்மையுடன் நடவடிக்கைகள் மேற்கொள்ளப்பட வேண்டும் என்பதே அனைவரின் எதிர்பார்ப்பாக உள்ளது.
 

இதையும் படிங்க: மாத்திரையை கூட போதை பொருள் மாதிரிதான் பயன்படுத்துவாரா..? சிக்கிய அமைச்சர்... நயினார் தாக்கு.!