சிவகங்கை மண்ணின் வீர வரலாற்றில் மற்றுமொரு மைல்கல்லாக, காரைக்குடி அருகே உள்ள சிராவயலில் மகாத்மா காந்தி மற்றும் பொதுவுடைமைத் தலைவர் தோழர் ஜீவானந்தம் ஆகியோர் சந்தித்துப் பேசிய வரலாற்று நிகழ்வைப் போற்றும் வகையில் அமைக்கப்பட்டுள்ள மணிமண்டபத்தைத் திறந்து வைக்க வருகை தந்த தமிழக முதலமைச்சர் மு.க.ஸ்டாலினுக்கு மாவட்ட எல்லையிலேயே உற்சாக வரவேற்பு அளிக்கப்பட்டது.

வரலாற்றுச் சந்திப்பின் சாட்சி: கடந்த 1934-ஆம் ஆண்டு மகாத்மா காந்தி சிவகங்கை மாவட்டத்திற்குப் பயணம் மேற்கொண்ட போது, சிராவயலில் அவரைத் தோழர் ஜீவா சந்தித்து உரையாடினார். அந்த வரலாற்றுச் சிறப்புமிக்க நிகழ்வை இன்றைய தலைமுறைக்கு எடுத்துரைக்கும் வகையில், தமிழக அரசின் செய்தி மக்கள் தொடர்புத் துறை சார்பில் ₹3.27 கோடி மதிப்பீட்டில் இந்த மணிமண்டபம் பிரம்மாண்டமாக அமைக்கப்பட்டுள்ளது. இதில் காந்தியும் ஜீவாவும் அமர்ந்து உரையாடுவது போன்ற தத்ரூபமான வெண்கலச் சிலைகளும், அவர்களின் வாழ்க்கை வரலாற்றை விளக்கும் புகைப்படக் கண்காட்சியும் இடம்பெற்றுள்ளன.

இதையும் படிங்க: “மக்களிடம் செல்வோம், குறைகளைக் கேட்போம்” - சிவகங்கை மாவட்டத்தில் இரண்டு நாட்கள் தீவிரப் பயணத்தில் முதலமைச்சர்!

மதுரையிலிருந்து சாலை மார்க்கமாகச் சிவகங்கை மாவட்டத்திற்கு வருகை தந்த முதலமைச்சருக்கு, வழிநெடுகிலும் பல்லாயிரக்கணக்கானத் தொண்டர்களும், பொதுமக்களும் திரண்டு நின்று ‘செங்கடல்’ போன்ற வரவேற்பை வழங்கினர். மேள தாளங்கள் முழங்க, கரகாட்டம், ஒயிலாட்டம் போன்ற கலை நிகழ்ச்சிகளுடன் சிவகங்கை மண்ணே விழாக்கோலம் பூண்டிருந்தது. மணிமண்டபத்தைத் திறந்து வைத்த முதலமைச்சர், சிலைகளுக்கு மாலை அணிவித்து மரியாதை செலுத்தியதுடன், அங்கு அமைக்கப்பட்டுள்ள அருங்காட்சியகத்தைப் பார்வையிட்டார்.

இந்த மணிமண்டபம் வெறும் கட்டிடம் மட்டுமல்ல, இந்திய விடுதலைப் போராட்டத்தின் காந்தியச் சிந்தனைகளும், ஜீவாவின் பொதுவுடைமைத் தத்துவங்களும் சங்கமித்த இடத்தைப் போற்றும் ஒரு வரலாற்றுச் சின்னமாகத் திகழும் என அரசு அதிகாரிகள் பெருமிதம் தெரிவித்தனர். இந்த நிகழ்வில் அமைச்சர்கள், நாடாளுமன்ற மற்றும் சட்டமன்ற உறுப்பினர்கள் மற்றும் அரசு உயர் அதிகாரிகள் எனப் பலர் பங்கேற்றனர்.

இதையும் படிங்க:  "அதிமுக ஒரு எஃகு கோட்டை!" – கட்சியில் துரோகிகளுக்கு இடமில்லை என செல்லூர் ராஜு மீண்டும் உறுதி.