தென் ஆப்ரிக்காவுக்கு அதிகாரப் பயணம் மேற்கொண்டுள்ள இந்தியப் பிரதமர் நரேந்திர மோடி, அங்கு வசிக்கும் இந்திய வம்சாவளியினரின் உற்சாகமான கலாசார நிகழ்ச்சிகளைக் கண்டு மிகுந்த மகிழ்ச்சியடைந்தார். ஜோகன்னஸ்பர்க்கில் நடந்த வரவேற்பு நிகழ்ச்சியில், கணபதி பிரார்த்தனை, சாந்தி மந்திரம் மற்றும் பிற தெய்வீக பிரார்த்தனைகளுடன் அவருக்கு இந்திய வம்சாவளியினர் பக்தியுடன் வரவேற்றனர்.
இந்த நிகழ்ச்சிகள், பல ஆண்டுகளுக்கு முன் இந்தியாவிலிருந்து தென் ஆப்ரிக்காவுக்கு வந்தவர்களின் கலாசாரத் தொடர்பை உயிரோட்டமாக வைத்திருக்கும் உணர்வை வெளிப்படுத்தியது. பிரதமர் மோடி இதை சமூக வலைதளத்தில் தமிழில் பதிவிட்டு, புலம்பெயர்ந்தோரின் இந்திய உணர்வை பாராட்டினார்.
தென் ஆப்ரிக்காவின் ஜோகன்னஸ்பர்க்கில் நடந்த இந்த வரவேற்பு, பிரதமரின் பயணத்தின் முக்கிய அங்கமாக அமைந்தது. அங்கு, கிர்மிட்டியா பாடலுடன் 'கங்கா மையா' நிகழ்ச்சி நடைபெற்றது.
இதையும் படிங்க: மோடி -ஜி ஜின்பிங் சந்திப்பு எதிரொலி!! சீனர்களுக்கு மத்திய அரசு கொடுத்த ஆஃபர்!!
இந்தப் பாடல் தமிழில் பாடப்பட்டது தனி சிறப்பு. பிரதமர் மோடி தனது சமூக வலைதள பதிவில், "ஜோகன்னஸ்பர்க்கில் தென் ஆப்ரிக்காவின் கிர்மிட்டியா பாடலுடன் 'கங்கா மையா' நிகழ்ச்சியைக் கண்டது எனக்கு மகிழ்ச்சியையும் நெகிழ்ச்சியையும் தந்தது. இந்த நிகழ்ச்சியின் மற்றொரு சிறப்பம்சம் இந்தப் பாடல் தமிழில் பாடப்பட்டது" என்று கூறினார்.
பல ஆண்டுகளுக்கு முன் இந்தியாவிலிருந்து தென் ஆப்ரிக்காவுக்கு வந்தவர்கள், அங்கு ஏராளமான துன்பங்களைச் சந்தித்தனர். ஆனால், அது அவர்களின் ஊக்கத்தைக் குலைக்கவில்லை. பாடல்கள் மற்றும் பிரார்த்தனைகள் மூலம் அவர்கள் தங்கள் இதயங்களில் இந்தியாவை உயிர்ப்புடன் வைத்திருந்தனர். "இந்தக் கலாசாரத் தொடர்பு உயிரோட்டமாக இருப்பதைக் காண்பது மெச்சத்தக்கது" என்று மோடி தனது பதிவில் வெளிப்படுத்தினார்.
மேலும், மற்றொரு பதிவில் பிரதமர் மோடி, "இந்தியாவிற்கும் தென் ஆப்ரிக்காவிற்கும் இடையிலான கலாசார தொடர்பு உண்மையிலேயே மனதைத் தொடும் மற்றும் காலத்தால் அழியாதது. ஜோகன்னஸ்பர்க்கில், எனது இளம் நண்பர்கள் கணபதி பிரார்த்தனை, சாந்தி மந்திரம் மற்றும் பிற தெய்வீக பிரார்த்தனைகளை மிகுந்த பக்தியுடன் பாடினர்.
இதுபோன்ற தருணங்கள் நம் மக்களுக்கு இடையேயான வலுவான உறவை மீண்டும் உறுதிப்படுத்துகின்றன" என்று கூறினார். இந்திய வம்சாவளியினர், தங்கள் தாய் மண்ணுடனான தொடர்பை பாடல்கள், நடனங்கள் மற்றும் பிரார்த்தனைகள் மூலம் பேணி வருவதை பிரதமர் மோடி பாராட்டினார். இது, புலம்பெயர்ந்த இந்தியர்களின் இந்திய உணர்வு எவ்வளவு வலுவானது என்பதை உலகிற்கு காட்டுகிறது.
பிரதமர் மோடியின் இந்தப் பயணம், இந்தியா-தென் ஆப்ரிக்கா உறவுகளை மேலும் வலுப்படுத்தும் நோக்கில் நடைபெறுகிறது. தென் ஆப்ரிக்காவில் லட்சக்கணக்கான இந்திய வம்சாவளியினர் வசிக்கின்றனர். அவர்கள் கலாசாரம், பண்பாட்டில் இந்தியாவின் தடங்களை பேணி வருகின்றனர்.
இந்த வரவேற்பு நிகழ்ச்சி, அந்த உணர்வை பிரதமர் மோடி நேரடியாக உணர்ந்து, சமூக வலைதளத்தில் பகிர்ந்து கொண்டது பெரும் வரவேற்பைப் பெற்றுள்ளது. தமிழில் பதிவிட்டது, தமிழ் மொழியின் முக்கியத்துவத்தையும் வெளிப்படுத்துகிறது. இந்தத் தருணங்கள், இரு நாடுகளுக்கும் இடையிலான நட்பை மேலும் ஆழப்படுத்தும் என்று நிபுணர்கள் கூறுகின்றனர்.
இதையும் படிங்க: காயத்துக்கு ஃபெவிகுயிக்... உ. பி.யில் இரண்டரை வயது குழந்தைக்கு நேர்ந்த கொடூரம்...!