தமிழக அரசியலில் கூட்டணி கணக்குகள் மீண்டும் பரபரப்பை ஏற்படுத்தியுள்ள நிலையில், தமிழக வெற்றிக் கழகம் (த.வெ.க.) மற்றும் பாட்டாளி மக்கள் கட்சி (பா.ம.க.) இடையே அரசியல் நெருக்கம் அதிகரித்து வருவதாக பேசப்படுகிறது. இந்தச் சூழலில், வன்னியர் ஓட்டு வங்கியை இழக்கும் அபாயம் இருப்பதாக வன்னியர் சங்கம் எச்சரிக்கை விடுத்துள்ளது.
சமீபத்தில், நீர்ப்பாசனத் திட்டங்கள் தொடர்பாக அமைச்சர் ஆனந்தை, பா.ம.க. தலைவர் அன்புமணி ராமதாஸ் சந்தித்தது அரசியல் வட்டாரங்களில் கவனம் பெற்றது. இதையடுத்து, த.வெ.க. - பா.ம.க. இடையே புதிய அரசியல் புரிதல் உருவாகிறதா என்ற கேள்வி எழுந்துள்ளது. மேலும், முதல்வர் விஜய் தலைமையிலான அரசுக்கு ஆதரவு அளித்து வரும் சில கூட்டணி கட்சிகள் தொடர்ந்து அழுத்தம் கொடுத்து வருவதால், அதனை சமாளிக்கும் வகையில் பா.ம.க.வுடன் த.வெ.க. நெருங்க முயற்சிப்பதாகவும் அரசியல் வட்டாரங்களில் பேசப்படுகிறது.
இந்த நிலையில், வன்னியர் சங்கத்தைச் சேர்ந்த நிர்வாகி ஒருவர், பா.ம.க. தனது முக்கிய ஆதரவுத் தளத்தை பாதுகாக்க வேண்டியது அவசியம் என்று தெரிவித்துள்ளார். கடந்த சட்டப்பேரவைத் தேர்தலில் அ.தி.மு.க. கூட்டணி தோல்வியை சந்தித்தபோதிலும், பா.ம.க. நான்கு தொகுதிகளில் வெற்றி பெற்றதை நினைவுபடுத்திய அவர், வன்னியர் சமூகத்தின் ஆதரவே அந்த வெற்றிக்கு முக்கிய காரணம் என குறிப்பிட்டார்.
இதையும் படிங்க: திடீரென நீக்கப்பட்ட ‘விடியல்’... தாறுமாறு வைரலான வீடியோ.. பதறியடித்துக் கொண்டு விளக்கம் கொடுத்த அதிகாரிகள்...!
மேலும், பா.ம.க. த.வெ.க.வுடன் நெருங்கினால், கட்சி நிர்வாகிகள் மற்றும் தொண்டர்கள் விஜயின் அரசியல் கவர்ச்சியால் ஈர்க்கப்பட வாய்ப்பு இருப்பதாகவும் அவர் கூறினார். சிறுபான்மையினர் மற்றும் பட்டியலின மக்களின் வாக்குகளைப் போலவே, வன்னியர் சமூக வாக்குகளையும் த.வெ.க. இலக்காகக் கொண்டு செயல்படுகிறது என்றும் அவர் குற்றம்சாட்டினார்.
பா.ம.க. நிறுவனர் டாக்டர் ராமதாஸ் கடந்த காலத்தில், பா.ஜ.க. கூட்டணியில் இருந்தபோது கூட வன்னியர் சமூகத்தின் அரசியல் ஆதரவு சிதறக் கூடாது என்று எச்சரித்ததை அன்புமணி நினைவில் கொள்ள வேண்டும் என்றும் அவர் வலியுறுத்தினார். எந்த அரசியல் அணுகுமுறையும் கட்சியின் பாரம்பரிய வாக்கு வங்கியை பாதிக்கக் கூடாது என்பதில் கவனம் செலுத்த வேண்டும் என்றும், வன்னியர் சமூக ஆதரவை சிறிதளவும் இழக்காத வகையில் பா.ம.க. தனது அடுத்தகட்ட அரசியல் முடிவுகளை எடுக்க வேண்டும் என்றும் அவர் தெரிவித்துள்ளார்.
இந்த விவகாரம் தமிழக அரசியல் வட்டாரங்களில் புதிய கூட்டணி கணக்குகள் குறித்த விவாதத்தை மீண்டும் தீவிரப்படுத்தியுள்ளது.
இதையும் படிங்க: ஒன்னு வடதுருவம்! இன்னொன்னு தென்துருவம்! எப்படி ஒண்ணா இருக்க முடியும்?! திருமாவுக்கு வைகோ பதில்!