தமிழ்நாட்டின் புதிய முழுநேர ஆளுநராக ராஜேந்திர விஸ்வநாத் அர்லேகர் (Rajendra Vishwanath Arlekar) அதிகாரப்பூர்வமாக நியமிக்கப்பட்டுள்ளார்.

இத்தகவலைக் குடியரசுத் தலைவர் மாளிகை இன்று இரவு வெளியிட்டுள்ள ஆளுநர்கள் இடமாற்றம் மற்றும் நியமனம் தொடர்பான முக்கிய அறிவிக்கையில் அதிகாரப்பூர்வமாகத் தெரிவித்துள்ளது.

முன்னதாக தமிழ்நாட்டின் ஆளுநராகப் பதவி வகித்து வந்த ஆர்.என். ரவி மாற்றப்பட்டதைத் தொடர்ந்து, கடந்த மார்ச் மாதம் முதல் அண்டை மாநிலமான கேரளாவின் ஆளுநராக இருந்த ராஜேந்திர விஸ்வநாத் அர்லேகர் தமிழ்நாட்டின் ஆளுநர் பொறுப்பையும் கூடுதலாக கவனித்து வந்தார். ஏழு மாதங்களாகத் தமிழ்நாடு மற்றும் கேரளா ஆகிய இரு மாநிலங்களின் பொறுப்புகளையும் அவர் கவனித்து வந்த நிலையில், தற்போது அவர் தமிழ்நாட்டின் முழுநேர ஆளுநராக முறைப்படி நியமிக்கப்பட்டுள்ளார்.

இதையும் படிங்க: ரூ.100 கோடி மோசடி வழக்கு: திமுக அரசகுமாருக்கு சென்னை நீதிமன்றம் ஜாமீன்!

கோவா மாநிலத்தைச் சேர்ந்த மூத்த அரசியல் தலைவரான 72 வயதான ராஜேந்திர விஸ்வநாத் அர்லேகர், முன்னதாக கோவா சட்டப்பேரவை சபாநாயகராகவும், வனத்துறை மற்றும் சுற்றுச்சூழல் துறை அமைச்சராகவும் திறம்படப் பணியாற்றியவர். 

பின்னர் ஹிமாச்சலப் பிரதேச ஆளுநராகவும், பீகார் மாநில ஆளுநராகவும் பதவி வகித்த அவர், ஜனவரி 2025 முதல் கேரள மாநில ஆளுநராகப் பொறுப்பு வகித்து வந்தார்.

தற்போது குடியரசுத் தலைவர் திரௌபதி முர்மு பிறப்பித்துள்ள புதிய உத்தரவின்படி, ராஜேந்திர விஸ்வநாத் அர்லேகர் தமிழ்நாட்டின் 21-வது முழுநேர ஆளுநராகத் தனது பொறுப்பைத் தொடர்வார்.

 தமிழக அரசுக்கும் ஆளுநர் மாளிகைக்குமான உறவில் புதிய மாற்றங்கள் ஏற்படலாம் என எதிர்பார்க்கப்படும் நிலையில், அர்லேகரின் இந்த முழுநேர ஆளுநர் நியமனம் தமிழக அரசியல் வட்டாரத்தில் பெரும் கவனத்தை ஈர்த்துள்ளது.

இதையும் படிங்க: தமிழகத்தில் 13 ஐபிஎஸ் அதிகாரிகள் பணியிட மாற்றம்: சேலம் புதிய கமிஷனராக ஏ.ஜி.பாபு நியமனம்!