மேற்கு வங்காள சட்டமன்றத் தேர்தலில் பாஜக அமோக வெற்றி பெற்று 207 இடங்களைக் கைப்பற்றியுள்ள நிலையில், மாநிலத்தில் ஆட்சி மாற்றம் உறுதியாகியுள்ளது. திரிணாமுல் காங்கிரஸின் நீண்டகால ஆட்சிக்கு முற்றுப்புள்ளி வைத்த பாஜக, சுவேந்து அதிகாரியை முதலமைச்சராக்கும் திசையில் வேகமாக நகர்ந்து வருகிறது. வரும் 8ஆம் தேதி கொல்கத்தாவில் நடைபெறும் பாஜக எம்.எல்.ஏ.க்கள் கூட்டத்தில் சட்டமன்றக் கட்சித் தலைவராக அவர் தேர்வு செய்யப்படுவார் என எதிர்பார்க்கப்படுகிறது.

சுவேந்து அதிகாரி, 2021 தேர்தலின்போது திரிணாமுல் காங்கிரஸிலிருந்து பாஜகவுக்கு தாவியவர். அப்போது எதிர்க்கட்சித் தலைவராக உயர்ந்த அவர், இந்தத் தேர்தலில் மம்தா பானர்ஜியின் சொந்தத் தொகுதியான பபானிபூரில் அவரை 15,105 வாக்குகள் வித்தியாசத்தில் தோற்கடித்து பரபரப்பை ஏற்படுத்தினார். அதே நேரத்தில் நந்திகிராம் தொகுதியிலும் மூன்றாவது முறையாக வெற்றி பெற்றார். பாஜகவின் இந்த அபார வெற்றிக்கு அவரது தீவிர பிரச்சாரமும், உள்ளூர் மக்களிடையேயான செல்வாக்கும் முக்கிய காரணமாகக் கருதப்படுகிறது.

இந்நிலையில், தேர்தல் முடிவுகளுக்கு சில நாட்களுக்குள் அதிர்ச்சி அளிக்கும் சம்பவம் ஒன்று நடைபெற்றுள்ளது. வடக்கு 24 பர்கானாஸ் மாவட்டத்தின் மத்தியகிராம் பகுதியில், சுவேந்து அதிகாரியின் நேர்முக உதவியாளரும் நெருங்கிய நம்பிக்கைக்குரியவருமான சந்திரநாத் ரத் (Chandranath Rath) அடையாளம் தெரியாத மர்ம நபர்களால் சுட்டுக் கொல்லப்பட்டார்.

இதையும் படிங்க: 15 வருட காத்திருப்பு..!! மேற்கு வங்கத்தில் மலர்ந்த தாமரை..!! பிரதமர் மோடிக்கு 3 கிலோ வெள்ளி தாமரை பரிசு..!!

தனது காரில் சென்றுகொண்டிருந்தபோது, மோட்டார் சைக்கிளில் வந்த இரு அல்லது அதற்கு மேற்பட்ட நபர்கள் அவரை நோக்கி சரமாரியாகச் சுட்டனர். தலை, மார்பு, வயிறு உள்ளிட்ட பகுதிகளில் பலத்த காயமடைந்த அவர், உடனடியாக அருகிலுள்ள தனியார் மருத்துவமனைக்கு அழைத்துச் செல்லப்பட்டபோது ஏற்கனவே உயிரிழந்துவிட்டதாக மருத்துவர்கள் தெரிவித்தனர். அவருடன் இருந்த மற்றொருவரும் காயமடைந்ததாக தகவல்கள் வெளியாகியுள்ளன.

இந்தக் கொலை அரசியல் உள்நோக்கம் கொண்டது என பாஜக தரப்பில் கடும் குற்றச்சாட்டு எழுந்துள்ளது. தேர்தல் வெற்றிக்குப் பிந்தைய வன்முறை என்று அக்கட்சி விமர்சித்துள்ளது. சம்பவ இடத்தில் பெரும் பதற்றம் நிலவுவதால், ஏராளமான போலீசார் குவிக்கப்பட்டுள்ளனர். கொலையாளிகளைப் பிடிக்க தனிப்படை அமைக்கப்பட்டு தீவிர விசாரணை நடைபெற்று வருகிறது. மத்தியகிராம் மற்றும் சுற்றுப்பகுதிகளில் பாதுகாப்பு அதிகரிக்கப்பட்டுள்ளது.

இந்தச் சம்பவம் பாஜகவினரிடையே அதிர்ச்சியையும் கோபத்தையும் ஏற்படுத்தியுள்ளது. புதிய அரசு பொறுப்பேற்கும் முன்பே ஏற்பட்ட இந்த வன்முறை, மாநிலத்தில் அமைதியை நிலைநாட்டுவதில் சுவேந்து அதிகாரி தலைமையிலான அரசு எதிர்கொள்ளும் முதல் சவாலாகக் கருதப்படுகிறது.

மம்தா பானர்ஜியின் திரிணாமுல் காங்கிரஸ் இந்தக் கொலையை கண்டிக்குமா அல்லது மறுப்பா என்பது இன்னும் தெளிவாகவில்லை. மொத்தத்தில், மேற்கு வங்காள அரசியல் ஒரு புதிய அத்தியாயத்தை நோக்கி நகர்ந்து கொண்டிருக்கும் வேளையில், இந்தக் கொலை சம்பவம் பதற்றத்தை அதிகரித்துள்ளது. பாஜக தலைமை இந்த விவகாரத்தை உன்னிப்பாகக் கண்காணித்து வருகிறது.

இதையும் படிங்க: மேற்கு வங்கத்தில் வெடித்த வன்முறை..!! திரிணாமுல் காங். அலுவலகம் சூறையாடல்..!! நிலவிய பதற்றம்..!!