சென்னை பட்டினப்பாக்கத்தில் புதிய தலைமைச் செயலகம்?.. பொதுமக்களின் கருத்தை அறியாமல் இறுதி முடிவு எடுக்க வாய்ப்பில்லை ;  அரசாணை வெளியிட்டு இருந்தாலும் கூட பொதுமக்களின் கருத்தறிந்துதான் அரசு இறுதி முடிவு எடுக்கும் என தியாகதுருகத்தில் விடுதலை சிறுத்தை கட்சியின் தலைவர் திருமாவளவன் தகவல் 

​கள்ளக்குறிச்சி மாவட்டம் தியாகதுருகத்தில் விடுதலைச் சிறுத்தைகள் கட்சியின் தலைவர் தொல்.திருமாவளவன் செய்தியாளர்களைச் சந்தித்துப் பேசினார். அப்போது, சென்னை பட்டினப்பாக்கத்தில் புதிய தலைமைச் செயலகம் அமைப்பது தொடர்பாக எழுப்பப்பட்ட கேள்விக்கு பதிலளித்த அவர், அப்பகுதி மீனவர்கள் மற்றும் பொதுமக்களிடம் விரிவாக கருத்துக்கேட்கப்பட வேண்டும். அவர்களின் கருத்துக்களை அறிந்த பின்னரே இது தொடர்பாக அரசின் சார்பில் இறுதி முடிவு எடுக்கப்படும் என்று தெரிவித்தார்.

தமிழகத்தில் ஆட்சி யாருடைய தயவிலும் நடைபெறவில்லை. மக்களின் தயவில்தான் நடைபெறுகிறது என அமைச்சர் ராஜ்மோகன் பேசியது குறித்துக் கேட்டபோது, மக்கள் தவெகவிற்கு பெரும்பான்மை இடங்களை வழங்கி வெற்றிபெறச் செய்திருக்கிறார்கள். அந்த அடிப்படையில் தான் ஆட்சி அமைப்பதற்குத் தேவையான இடங்களுக்கு காங்கிரஸ், இடதுசாரிகள், விடுதலைச் சிறுத்தைகள் கட்சி மற்றும் இந்திய யூனியன் முஸ்லிம் லீக் ஆகிய தோழமைக் கட்சிகளின் சட்டமன்ற உறுப்பினர்கள் ஆதரவளித்துக் கைகோர்த்துள்ளோம். 

இதையும் படிங்க: CM 2031! பதிவெண் கொண்ட டெஸ்லா காரில் திருமாவளவன் பயணம்! கோட் பட விஜய் பாணியில் சூசகம்?

மக்கள் அளித்த பெரும்பான்மையை மையப்படுத்தியே அமைச்சர் அவ்வாறு கூறியிருப்பார். தோழமைக் கட்சிகளின் ஆதரவைப் புறந்தள்ளும் நோக்கில் அவர் பேசியிருக்க வாய்ப்பில்லை,அவர்களின் ஆதரவு இல்லாமல் நாங்கள் ஆட்சி அமைத்து இருக்கிறோம் என்ற பொருளில் அவர் சொல்லி இருக்க வாய்ப்பில்லை எனவே அதனை பெரிதாக்க வேண்டாம் என தெரிவித்தார்.

தவெக ஆட்சியில் இரண்டிற்கு இடையில் தான் போட்டியே ஒன்று மின்வெட்டு, மற்றொன்று அரிவாள் வெட்டு என, திமுக தலைவர் மு.க.ஸ்டாலின் தெரிவித்த விமர்சனம் குறித்து செய்தியாளர்கள் கேள்வி எழுப்பினர். அதற்கு, இது எதிர்க்கட்சியின் கருத்து என்று சுருக்கமாகக் கூறி, திருமாவளவன் நைசாக நழுவிச் சென்றார்.
 

இதையும் படிங்க: துரோக பட்டம் சூட்டுகிறார்கள்! துரோகி என்கிறார்கள்! திமுகவை விட்டு விலகியது ஏன்? திருமாவளவன் காட்டம்!