பாபநாசம் அணையிலிருந்து பாசனத்திற்குத் தண்ணீர் திறந்துவிடக் கோரி அமைதியான முறையில் போராட்டத்தில் ஈடுபட்ட தூத்துக்குடி மாவட்ட விவசாயிகளைத் தமிழ்நாடு காவல்துறை அராஜகமாகக் கைது செய்துள்ள சம்பவத்திற்குத் தனது கடுமையான கண்டனத்தைப் பதிவு செய்துள்ள தூத்துக்குடி மக்களவைத் தொகுதி உறுப்பினர் கனிமொழி கருணாநிதி, தவெக அரசின் இந்த எதேச்சதிகாரப் போக்கு உடனடியாக நிறுத்தப்பட வேண்டும் என எச்சரித்துள்ளார்.

தூத்துக்குடி மாவட்டத்தில் தாமிரபரணி ஆற்றுப் பாசனப் படுகையை நம்பிச் சாகுபடி செய்யப்பட்டுள்ள சுமார் 5,000 ஏக்கர் பரப்பளவிலான வாழைப் பயிர்கள், கடந்த சில வாரங்களாகப் போதிய பாசன நீர் கிடைக்காமல் கடும் வறட்சியின் பிடியில் சிக்கி கண்முன்னே கருகும் அபாயகரமான நிலைக்குத் தள்ளப்பட்டுள்ளன. 

வாழ்வாதாரப் பயிர்களைக் காப்பாற்றக் கோரி அப்பகுதி விவசாயிகள் மாவட்ட நிர்வாகத்திடமும், நீர்வளத்துறை அதிகாரிகளிடமும் பலமுறை தொடர்ச்சியாகக் கோரிக்கை மனுக்களை அளித்தும் எவ்வித ஆக்கப்பூர்வ நடவடிக்கையும் எடுக்கப்படவில்லை. இதனால் வேறு வழியின்றித் தங்களது நியாயமான வாழ்வுரிமையை மீட்டெடுக்க வீதிக்கு வந்து அறவழியில் போராடிய விவசாயிகளைக் காவல்துறையை ஏவி அராஜகமாகக் கைது செய்து அச்சுறுத்தியிருப்பது பெரும் கொந்தளிப்பை ஏற்படுத்தியுள்ளது.

இதையும் படிங்க: மேட்டூர் அணை தாமத திறப்பால் 12 லட்சம் டன் நெல் இழப்பு! தவெக அரசை சாடும் எம்.ஆர்.கே. பன்னீர்செல்வம்!

இதுகுறித்து தனது அதிகாரப்பூர்வ சமூக வலைதளப் பக்கமான எக்ஸ் தளத்தில் ஆவேசமாகப் பதிவிட்டுள்ள நாடாளுமன்ற உறுப்பினர் கனிமொழி கருணாநிதி, பாபநாசம் அணையிலிருந்து பாசனத்துக்குத் தண்ணீர் திறக்கக் கோரி, தங்களது வாழ்வாதார உரிமைக்காகப் போராடிய தூத்துக்குடி மாவட்ட விவசாயிகளை அராஜகமாகக் கைது செய்துள்ள தவெக அரசின் கொடுங்கோன்மை உடனடியாக நிறுத்தப்பட வேண்டும். 

தாமிரபரணி ஆற்றுப்பாசனத்தைச் சார்ந்துள்ள சுமார் 5,000 ஏக்கர் வாழைப் பயிர்கள் தண்ணீரின்றி கருகும் நிலையில், விவசாயிகளின் ஒட்டுமொத்த வாழ்வாதாரமும் கேள்விக்குறியாகியுள்ளது. பலமுறை மனு அளித்தும், தொடர் போராட்டங்கள் நடத்தியும் மாவட்ட நிர்வாகமும் நீர்வளத்துறையும் எட்டிக்கூடப் பார்க்காமல், விவசாயிகளைச் சாலையில் போராடும் நிலைக்குத் தள்ளியுள்ளது இந்த அரசு என்று கடுமையாகச் சாடியுள்ளார்.

மேலும், விவசாயிகளின் கண்ணீரை இனியும் வேடிக்கை பார்க்காமல், அவர்களின் நியாயமான கோரிக்கையைத் தமிழ்நாடு அரசு உடனடியாக ஏற்று, கருகும் வாழைப் பயிர்களைக் காக்கும் வகையில் பாபநாசம் அணையிலிருந்து தாமதமின்றி விநாடிக்கு 1,500 கனஅடி தண்ணீரைத் திறந்துவிட வேண்டும் எனவும், விவசாயிகளின் வாழ்வாதாரத்தைப் போர்க்கால அடிப்படையில் பாதுகாக்க அரசு உடனடி உத்தரவுகளைப் பிறப்பிக்க வேண்டும் எனவும் கனிமொழி கருணாநிதி ஆணித்தரமாக வலியுறுத்தியுள்ளார்.

இதையும் படிங்க: கோயிலில் செல்போன் வைக்க ரூ.5 கட்டணமா? தவெக அரசுக்கு தமிழிசை சௌந்தரராஜன் கண்டனம்!