தமிழகத்தின் பொறுப்பு ஆளுநராக இருந்து முழு நேர ஆளுநராக பதவி ஏற்றுள்ள அர்லேகரை நேரில் சந்தித்து முதல்வர் விஜய் வாழ்த்தினார். சென்னை கிண்டியில் அமைந்துள்ள லோக் பவனில் 2026 மார்ச் 12ஆம் தேதி தமிழ்நாட்டின் ஆளுநர் பொறுப்பை ராஜேந்திர விஸ்வநாத் அர்லேகர் ஏற்றுக்கொண்டார். முன்னதாக தமிழக ஆளுநராக இருந்த ஆர்.என்.ரவி மேற்கு வங்க ஆளுநராக மாற்றப்பட்டதை அடுத்து, கேரள மாநில ஆளுநராக இருந்த அர்லேகருக்கு தமிழ்நாட்டின் பொறுப்பு ஆளுநர் பதவி கூடுதலாக வழங்கப்பட்டது. அதன்படி சென்னை உயர்நீதிமன்றத் தலைமை நீதிபதி சுஷ்ருத் அரவிந்த் தர்மாதிகாரி முன்னிலையில் பாரதியார் மண்டபத்தில் எளிய விழாவில் அவர் பதவிப் பிரமாணம் செய்துகொண்டார்.

கோவாவைச் சேர்ந்த அர்லேகர் 1954ஆம் ஆண்டு ஏப்ரல் 23ஆம் தேதி பிறந்தவர். வணிகவியல் பட்டம் பெற்ற அவர் இளைஞராகவே ராஷ்ட்ரிய ஸ்வயம்சேவக் சங்கத்தில் இணைந்து பொது வாழ்வில் ஈடுபட்டார். அவசரகாலத்தின் போது சிறைவாசம் அனுபவித்த அனுபவம் அவருக்கு உண்டு. பாரதிய ஜனதா கட்சியில் இணைந்து கோவா சட்டமன்ற உறுப்பினராக இருமுறை தேர்ந்தெடுக்கப்பட்டார். 2012 முதல் 2015 வரை கோவா சட்டமன்ற சபாநாயகராகப் பணியாற்றினார். அப்போது இந்தியாவின் முதல் டிஜிட்டல் சட்டமன்றத்தை உருவாக்கும் முயற்சியில் முன்னிலை வகித்தார். பின்னர் கோவா அரசில் வனம் மற்றும் சுற்றுச்சூழல், பஞ்சாயத்து ராஜ் துறைகளின் அமைச்சராகவும் பணியாற்றினார்.

2021ஆம் ஆண்டு இமாச்சலப் பிரதேச ஆளுநராக நியமிக்கப்பட்ட அர்லேகர், பின்னர் பீகார் ஆளுநராகப் பதவி வகித்தார். 2025 ஜனவரி 2ஆம் தேதி கேரள மாநில ஆளுநராகப் பொறுப்பேற்றார். தமிழகத்தில் பொறுப்பு ஆளுநராகப் பதவியேற்ற பிறகு அவர் இரு மாநிலங்களின் நிர்வாகப் பொறுப்புகளையும் ஒருங்கிணைத்து கவனித்து வந்தார். மார்ச் மாதம் நடைபெற்ற பதவியேற்பு விழாவில் அன்றைய முதலமைச்சர் மு.க.ஸ்டாலின் உள்ளிட்ட அமைச்சர்கள், சட்டமன்ற சபாநாயகர், உயர்நீதிமன்ற நீதிபதிகள் மற்றும் உயர் அதிகாரிகள் கலந்துகொண்டனர். பதவியேற்ற பிறகு அர்லேகரை வாழ்த்தி முதலமைச்சர் உரையாடினார்.தமிழக அரசியலில் முக்கிய மாற்றங்கள் நிகழ்ந்த காலத்தில் அர்லேகர் ஆளுநர் பொறுப்பில் இருந்தார்.

இதையும் படிங்க: ஓயாத பிரச்சனை... குதிரை பேரம்..! ஆளுநரிடம் மனுக் கொடுத்து முறையிட்ட அதிமுக.!

2026 மே மாதம் நடைபெற்ற சட்டமன்றத் தேர்தலில் தமிழக வெற்றிக் கழகம் முன்னணி கட்சியாக உருவெடுத்தது. கட்சித் தலைவர் சி.ஜோசப் விஜய் அரசு அமைப்பதற்குத் தேவையான ஆதரவு ஆதாரங்களை ஆளுநர் கோரினார். பின்னர் விஜய் முதலமைச்சராகப் பதவியேற்ற போது அர்லேகர் பதவிப் பிரமாணம் செய்துவைத்தார். இதன் மூலம் மாநிலத்தில் புதிய அரசியல் அத்தியாயம் தொடங்கியது.பொறுப்பு ஆளுநராக இருந்த காலத்தில் அர்லேகர் மாநில அரசுடன் ஒத்துழைப்புடன் செயல்பட்டார்.

ஒட்டுமொத்தத்தில் அரசியல் நிலைத்தன்மை பேணப்பட்டது.ஏழு மாதங்களுக்கு மேலாக கேரளம் மற்றும் தமிழ்நாடு ஆகிய இரு மாநிலங்களின் பொறுப்புகளையும் கவனித்து வந்த நிலையில், 2026 அக்டோபர் 12ஆம் தேதி குடியரசுத் தலைவர் திரௌபதி முர்மு ஆறு மாநிலங்களுக்கு ஆளுநர்களை நியமிக்கும் உத்தரவைப் பிறப்பித்தார். அதன்படி அர்லேகர் தமிழ்நாட்டின் முழுநேர ஆளுநராக நியமிக்கப்பட்டார். கேரள ஆளுநர் பொறுப்பிலிருந்து அவர் விடுவிக்கப்பட்டு, அந்தப் பதவிக்கு ஓம் பிரகாஷ் மாத்தூர் நியமிக்கப்பட்டார். இந்த நியமனம் அர்லேகரின் தமிழகப் பொறுப்பை உறுதிப்படுத்தியது.முழுநேர ஆளுநராக நியமிக்கப்பட்டதை அடுத்து முதலமைச்சர் ஜோசப் விஜய் ஆளுநர் மாளிகைக்கு நேரில் சென்று சந்தித்து பேசினார். ஆளுநர் அர்லேகருக்கு பூங்கொத்து கொடுத்து முதல்வர் விஜய் வாழ்த்து தெரிவித்தார். 

இதையும் படிங்க: தமிழக அரசியலில் முக்கிய மாற்றம்..! முழுநேர ஆளுநராகப் பொறுப்பேற்ற அர்லேகர்..!