தமிழக சட்டமன்றத் தேர்தல் வரும் ஏப்ரல் 23-ஆம் தேதி நடைபெற உள்ள நிலையில், பாஜக சார்பில் போட்டியிட உள்ள வேட்பாளர்களின் உத்தேசப் பட்டியல் குறித்த தகவல்கள் வெளியாகத் தொடங்கியுள்ளன. இதில் மத்திய இணை அமைச்சர் எல். முருகன் அவர்கள் திருப்பூர் மாவட்டத்தின் அவிநாசி (தனி) தொகுதியில் போட்டியிட வாய்ப்புள்ளதாகக் கூறப்படுகிறது.

இந்த அரசியல் பரபரப்புகளுக்கு இடையே, அமைச்சர் எல். முருகன் அவர்கள் இன்று சென்னை திருவொற்றியூரில் உள்ள புகழ்பெற்ற ஆலயங்களில் சாமி தரிசனம் செய்தார்.

இன்று காலை திருவொற்றியூர் வந்தடைந்த எல். முருகன், வரலாற்றுச் சிறப்புமிக்க தியாகராஜ சுவாமி - வடிவுடையம்மன் திருக்கோயிலில் மனம் உருகி வழிபாடு நடத்தினார். அதனைத் தொடர்ந்து, அண்மைப்பகுதியில் உள்ள குருதட்சணாமூர்த்தி கோயில் மற்றும் பட்டினத்தார் ஆகிய கோயில்களுக்கும் சென்று சிறப்புப் பிரார்த்தனைகளை மேற்கொண்டார். அவருக்குக் கோயில் நிர்வாகத்தின் சார்பில் மாலை அணிவித்து சிறப்பான வரவேற்பு அளிக்கப்பட்டது.

இதையும் படிங்க: எதிர்க்கட்சி அந்தஸ்து கூட கிடைக்கவில்லை! ஸ்டாலினுக்கு எடப்பாடியார் கொடுத்த அதிரடி பதிலடி!

அமைச்சர் கோயிலுக்கு வந்திருப்பதை அறிந்த செய்தியாளர்கள், தேர்தல் மற்றும் வேட்பாளர் பட்டியல் குறித்துக் கேள்விகளைக் கேட்க முயன்றனர். ஆனால், அவற்றை மிகவும் மென்மையாக மறுத்த அவர், அண்ணே வேண்டாம் அண்ணே... கோயிலுக்கு வரும்போது நான் பேட்டி கொடுக்க மாட்டேன் என்று கூறிவிட்டார்.

கோயிலுக்கு வரும்பொழுது எங்கும் நான் பேட்டி அளிப்பதில்லை; ஏதேனும் செய்திகள் இருந்தால் நானே உங்களை அழைத்துத் தெரிவிக்கிறேன் என்று கூறிவிட்டு அங்கிருந்து புறப்பட்டுச் சென்றார். அரசியல் அனல் பறக்கும் வேளையிலும், ஆன்மீகப் பயணத்தின்போது அரசியல் பேசத் தவிர்த்த அவரது இந்தச் செயல் அங்கிருந்தவர்களிடையே கவனத்தைப் பெற்றது.

பாஜக-வின் அதிகாரப்பூர்வ வேட்பாளர் பட்டியல் இன்னும் ஓரிரு நாட்களில் வெளியாகும் என்று எதிர்பார்க்கப்படும் நிலையில், அவிநாசி தொகுதியில் எல். முருகன் களம் காண்பாரா என்பது உறுதியாகத் தெரியவரும்.

இதையும் படிங்க: திமுக ஒரு சந்தர்ப்பவாத கட்சி! தாம்பரத்தில் எடப்பாடியார் அனல் பறக்கும் தேர்தல் பிரசாரம்!