காதலர் தினத்தையொட்டி ஓசூர் ரோஜா விவசாயிகளுக்கு பெரும் வரவேற்பும் லாபமும் கிடைத்துள்ளது. கிருஷ்ணகிரி மாவட்டத்தில் அமைந்துள்ள ஓசூர் பகுதி, தமிழ்நாட்டின் மிக முக்கியமான ரோஜா சாகுபடி மையங்களில் ஒன்றாக விளங்குகிறது. இங்கு சுமார் 4,000 ஏக்கர் பரப்பளவில் பசுமைக் குடில்களில் (கிரீன்ஹவுஸ்) பல்வேறு வகையான ரோஜாக்கள் பயிரிடப்படுகின்றன.

தாஜ்மஹால், நோப்ளாஸ், கோல்ட் ஸ்டிரைக், சவரன், அவலஞ்சர், பெர்னியர் உள்ளிட்ட 22-க்கும் மேற்பட்ட ரகங்கள் இங்கு விளைவிக்கப்படுகின்றன. குறிப்பாக அடர் சிவப்பு நிறத்தில் பிரபலமான 'தாஜ்மஹால்' ரகத்திற்கு இந்த ஆண்டு 80 சதவீதத்திற்கும் அதிகமான ஆர்டர்கள் குவிந்துள்ளன. இந்த ரோஜாக்கள் தங்கள் அழகு, நீண்ட தண்டு மற்றும் நறுமணத்தால் காதலர் தினத்திற்கு சிறப்பாகப் பயன்படுத்தப்படுகின்றன.

இதையும் படிங்க: ரோஜா.. ரோஜா..!! நாளை காதலர் தினம்..!! ரோஜா பூங்கொத்துகளுக்கு எகிறும் டிமாண்ட்..!! விலை அதிகரிப்பு..!!

வழக்கமான நாட்களில் தினமும் சுமார் 2 லட்சம் ரோஜா மலர்கள் விற்பனைக்கு அனுப்பப்படும் நிலையில், காதலர் தினத்தை முன்னிட்டு தற்போது நாளொன்றுக்கு 10 லட்சம் மலர்கள் வரை சென்னை, டெல்லி, மும்பை, பெங்களூர், கேரளா, ஜெய்ப்பூர் உள்ளிட்ட பல நகரங்களுக்கு அனுப்பப்படுகின்றன. குறிப்பாக பெங்களூரில் இந்த ஆண்டு சுமார் 1 கோடி ரோஜாக்கள் விற்பனையாகியுள்ளதாக தகவல்கள் தெரிவிக்கின்றன.

இதில் பெரும்பாலானவை ஓசூரில் இருந்து கொள்முதல் செய்யப்பட்டவையே. விலை உயர்வு இன்னும் கணிசமானது. சாதாரண நாட்களில் 20 ரோஜாக்கள் கொண்ட ஒரு கட்டு ரூ.150 முதல் ரூ.300 வரை விற்கப்படும். ஆனால் காதலர் தினக் கிராக்கியால் தற்போது ரூ.600 முதல் ரூ.800 வரை, சில இடங்களில் அதிகமாகவும் விற்பனையாகிறது.

தனி ரோஜா ஒன்றின் விலை சாதாரண நாட்களில் ரூ.5 முதல் ரூ.10 வரை இருக்கும் நிலையில், இப்போது ரூ.20 முதல் ரூ.50 வரை, சில பிரீமியம் ரகங்களில் ரூ.50-க்கு மேலும் உயர்ந்துள்ளது. ஆன்லைன் டெலிவரி நிறுவனங்கள், கார்ப்பரேட் நிறுவனங்கள் நேரடியாக விவசாயிகளிடமிருந்து பெரிய அளவில் கொள்முதல் செய்ததால் உள்ளூர் சந்தையிலும் விலை இரு மடங்காக உயர்ந்துள்ளது. 

கடந்த சில ஆண்டுகளாக ஐரோப்பா, மத்திய கிழக்கு நாடுகளுக்கு ஏற்றுமதி செய்யப்பட்டு வந்த ஓசூர் ரோஜாக்கள், சர்வதேச சந்தையில் ஏற்பட்ட கடும் போட்டி, விமான போக்குவரத்து கட்டண உயர்வு ஆகியவற்றால் பாதிக்கப்பட்டன. இதனால் பல விவசாயிகள் ஏற்றுமதியைக் குறைத்து உள்நாட்டு சந்தையை நோக்கி திரும்பியுள்ளனர். இந்த ஆண்டு காதலர் தினத்தின் உள்நாட்டு தேவை அபரிமிதமாக இருந்ததால், வெளிநாட்டு ஏற்றுமதியை விட உள்நாட்டு விற்பனையில் அதிக லாபம் கிடைத்துள்ளது.

இதனால் ஓசூர் பகுதி விவசாயிகள் மிகுந்த மகிழ்ச்சியடைந்துள்ளனர். உற்பத்தி சற்று குறைந்திருந்தாலும், விலை உயர்வு மற்றும் அதிக ஆர்டர்களால் அவர்களின் வருமானம் கணிசமாக அதிகரித்துள்ளது. காதலர் தினத்தின் ரோமான்டிக் சின்னமான ரோஜா, ஓசூர் விவசாயிகளுக்கு இந்த ஆண்டு பொற்காலமாக அமைந்துள்ளது.
 

இதையும் படிங்க: VALENTINE SPECIAL: இன்று TEDDY DAY..!! ஒவ்வொரு கலருக்கும் ஒரு அர்த்தம்..!! தெரிஞ்சிக்கோங்க..!!