தமிழக சட்டசபை தேர்தல் 2026-இல் தமிழக வெற்றிக்கழகம் (தவெக) தனித்துப் போட்டியிடுவது கடினமானது என்பது தற்போது தெளிவாகியுள்ளது. கட்சி சார்பில் விருப்ப மனு கொடுத்தவர்களிடம் நடத்தப்பட்ட நேர்காணலில், பெரும்பாலானோர் “ஒரு தொகுதிக்கு 5 கோடி ரூபாய் செலவு செய்ய முடியுமா?” என்ற கேள்விக்கு “முடியாது” என்று தெரிவித்துள்ளனர். இதுவே கூட்டணி வைக்கும் எண்ணத்துக்கு கட்சியை தள்ளியுள்ளதாக நிர்வாகிகள் தெரிவிக்கின்றனர்.

தவெக தலைவர் விஜய் மற்றும் புஸ்ஸி ஆனந்த் ஆகியோர் 60 தொகுதிகளில் விருப்ப மனு கொடுத்தவர்களுடன் நேரடி நேர்காணல் நடத்தினர். தேர்தல் செலவு குறித்து விஜய் நேரடியாக கேட்டபோது, “ஒரு தொகுதிக்கு குறைந்தபட்சம் 5 கோடி ரூபாய் தேவை. அதை செய்ய முடியுமா?” என்ற கேள்வி எழுப்பப்பட்டது. 

ஆனால், பெரும்பாலான வேட்பாளர்கள் தங்களால் அத்தகைய தொகையை செலவழிக்க முடியாது என்று ஒப்புக்கொண்டனர். சட்டப்படி ஒரு வேட்பாளர் அதிகபட்சம் 40 லட்சம் ரூபாய் மட்டுமே செலவு செய்யலாம் என்றாலும், உண்மையான செலவு அதை விட பல மடங்கு அதிகம் என்பது அனைவருக்கும் தெரிந்த உண்மை. இதனால் பலர் பின்வாங்கியுள்ளனர்.

இதையும் படிங்க: விஜய் டெல்லி பயணம்? அதிமுக -பாஜ கூட்டணியில் தவெக இணைகிறதா? சஸ்பென்ஸை உடைத்தார் நயினார் நாகேந்திரன்!

இந்த நிலையில் தனித்துப் போட்டியிடுவது எவ்வளவு சவாலானது என்பது விஜய்க்கு தெளிவாகத் தெரிந்துள்ளது. இதைத் தொடர்ந்து புஸ்ஸி ஆனந்த் மாவட்ட நிர்வாகிகளிடம் கூட்டணி வைப்பது குறித்து கருத்து கேட்டார். அதில் 90 சதவீத மாவட்ட தலைவர்கள் கூட்டணிக்கு ஆதரவாக பேசியுள்ளனர். இந்த கருத்துகள் விஜய்க்கு தெரிவிக்கப்பட்ட பிறகு, கூட்டணி வைப்பது குறித்து அவர் தீவிரமாக சிந்திக்கத் தொடங்கியுள்ளார்.

கடந்த இரண்டு நாட்களாக ஊடகங்களில் “தவெக கூட்டணி வைக்கிறது” என்ற செய்திகள் தொடர்ந்து வெளியாகி வருகின்றன. ஆனால் விஜய் தரப்பிலிருந்து இதுவரை எந்த மறுப்பும் வரவில்லை என்பது குறிப்பிடத்தக்கது. 

தேர்தல் நெருங்கும் நிலையில், தவெக தனித்து போட்டியிடுவதா அல்லது என்.டி.ஏ. அல்லது தி.மு.க. கூட்டணியில் இணைவதா என்பது தமிழக அரசியலில் மிகப்பெரிய கேள்வியாக எழுந்துள்ளது. விஜய்யின் அடுத்த அறிவிப்பு எப்போது வரும் என அரசியல் வட்டாரங்கள் ஆவலுடன் எதிர்பார்த்து வருகின்றன.

இதையும் படிங்க: விஜய்க்கு அழைப்பு விடுத்த பாஜக நிர்வாகி!! பதவியை பறித்த தலைமை!! ஆக்‌ஷனில் இறங்கிய நயினார் நாகேந்திரன்!