மலையாள திரை உலகில் தனக்கென தனி அடையாளத்தைப் படைத்த பிரபல நடிகை சுவேதா மேனன் தற்போது சட்டப்பூர்வ சிக்கலில் சிக்கியுள்ள நிலையில், இது தொடர்பான விவகாரங்கள் மலையாள சினிமா மற்றும் ரசிகர்கள் மத்தியில் பெரும் பரபரப்பை ஏற்படுத்தியுள்ளது. ஒரு ஆபாச விளம்பரத்தில் நடித்ததாக குற்றச்சாட்டுகள் எழுந்துள்ளதுடன், அதனைத் தொடர்ந்து போலீசார் அவர் மீது வழக்குப் பதிவு செய்துள்ளனர். இந்த விவகாரம் எர்ணாகுளம் நீதிமன்றத்தில் தாக்கல் செய்யப்பட்ட மனுவின் அடிப்படையில் பெரும் அளவில் தீவிரமடைந்து வருகிறது. சுவேதா மேனன், தனது தரப்பில் இந்த வழக்கு திட்டமிட்ட சதியாகவும், தனக்கு எதிராக செயலில் இறங்கிய குழுவின் உந்துதலால் வந்த புகார் போலவும் இருப்பதாக கூறியிருக்கிறார்.

இந்த வழக்கின் பின்னணி என பார்த்தால் மார்டின் மேனாச்சேரி என்பவர், கொச்சியைச் சேர்ந்த சமூக ஆர்வலராகக் கூறப்படுகிறார். இவர், சுவேதா மேனன் பொருளாதார லாபத்திற்காக ஆபாசக் காட்சிகளில் நடித்து அதை சமூக வலைதளங்களில் வெளியிட்டுள்ளதாக எர்ணாகுளம் நீதிமன்றத்தில் வழக்கு மனு தாக்கல் செய்தார். அந்த மனுவில், சுவேதா மேனன் ஒரு விளம்பரத்தில் தகாத வகையில் ஆபாசத் தோற்றம் அளிக்கும் வகையில் நடித்துள்ளார். இது, சமூக ஒழுக்கத்துக்கு எதிரானதாகவும், பெண்களின் பொது மரியாதையை கேள்விக்குள்ளாக்கும் வகையிலும் இருப்பதாக குற்றம் சாட்டப்பட்டு உள்ளது. மேலும், அந்தக் காணொளி சமூக வலைதளங்களில் பரவுவதால், இது பொது மக்களிடையே தவறான செய்தியைக் கொடுப்பதாகவும் அதனால் தன்னிச்சையான நடவடிக்கை அவசியம் எனவும் கூறப்பட்டுள்ளது.

இப்படி இருக்க இந்த வழக்கு மனுவை எடுத்துக் விசாரணைக்கு எடுத்துக் கொண்ட  எர்ணாகுளம் ஜூடிசியல் கோர்ட், அதன் மேல் பரிசீலனை செய்தது. வழக்கின் உள்ளடக்கங்களை கவனித்த நீதிபதி, சுவேதா மேனன் மீது வழக்குப் பதிவு செய்யும் வகையில் உத்தரவு வழங்கினார். அதன்படி, கொச்சி மத்திய காவல் நிலையம், இந்திய குற்றவியல் சட்டத்தின் படி பொது ஒழுக்கத்தை பாதிக்கும் செயல், பெண்களை அவமதிக்கும் வகையிலான காட்சிகள் போன்ற பிரிவுகளின் கீழ் சுவேதா மேனன் மீது வழக்குப் பதிவு செய்துள்ளது. இந்த வழக்குப்பதிவைத் தொடர்ந்து, சுவேதா மேனன் செய்தியாளர்களிடம் விளக்கம் அளித்தார். இது ஒரு திட்டமிட்ட சதி எனவும், அவரின் தலைவர் பதவிக்கு போட்டியிடும் சூழலில் ஏற்பட்ட சிக்கல் எனவும் அவர் தெரிவிக்கிறார். இதனை குறித்து அவர் பேசுகையில், "நான் ‘அம்மா’ Artists Malayalam Movie Association அமைப்பின் தலைவர் பதவிக்கு போட்டியிட உள்ளேன். எனவே அதனை முறியடிக்க சிலர் திட்டமிட்டு இத்தகைய மனுவை தாக்கல் செய்துள்ளனர். இந்த வழக்கை சட்டப்படி சந்திக்க தயார். என் மீது எந்த குற்றமும் இல்லை என்பதை நான் நிரூபிக்க போகிறேன்" என்று அவர் கூறினார்.

இதையும் படிங்க: அனிருத் - தோனி இணைந்து விளையாடிய 'பேடல்'..! இணையத்தை கலக்கும் வீடியோ வைரல்..!

மேலும், தன்னிடம் நேரில் கேட்டால் விளக்கம் அளிக்கத் தயாராக இருப்பதாகவும், நீதிமன்றத்தில் தன்மை விளக்கக் கோரும் மனுவை தாக்கல் செய்யவுள்ளதாகவும் அவர் கூறியுள்ளார். இந்த விவகாரம் வெளிவந்த பிறகு, மலையாள திரைப்படத் துறையிலிருந்து விமர்சனங்களும் ஆதரவும் வரத் தொடங்கியுள்ளன. சிலர் சுவேதா மேனனுக்கு ஆதரவாகக் குரல் கொடுத்திருக்கிறார்கள். "ஒரு நடிகை ஒரு கேரக்டருக்காக நடிக்கிறார் என்றால் அது கலைக்கான செயலாக இருக்க வேண்டும். அதைக் குற்றமாக பார்க்க முடியாது" என கருத்துக்கள் எழுகின்றன. அதேவேளை, சில சமூக ஆர்வலர்கள் இதனை கடுமையாக எதிர்க்கின்றனர். "பொது ஒழுக்கம்" எனும் பண்பை முன்னிறுத்தி, சினிமா அல்லது விளம்பரமாக இருந்தாலும் வரம்புகளை மீறக்கூடாது என்பதே அவர்களது வாதமாக உள்ளது. இப்போது வழக்கானது ஒரு முக்கியமான கட்டத்தை எட்டியுள்ளது. சுவேதா மேனன் தனது தரப்பில் வழக்கை ரத்து செய்ய கோரி தாக்கல் செய்ய உள்ள மனு, எப்போது விசாரணைக்கு வரும் என்பது எதிர்பார்ப்பாக உள்ளது. நீதிமன்றம், கோரிக்கையை ஏற்றுக்கொள்வதா? அல்லது வழக்கு தொடர வேண்டுமா என்பதற்கான முடிவு, நடிகையின் சட்டபூர்வ நிலையை வைத்து தான் தீர்மானிக்கப்படும். அதேசமயம் சுவேதா மேனன், மலையாளம் மட்டுமல்லாமல் தமிழிலும், ஹிந்தியிலும் புகழ்பெற்ற திரைப்படங்களில் நடித்துள்ளவர். இவரது சமூக பிரச்சனைகள் தொடர்பான தைரியமான பார்வை மற்றும் திரைமேடையில் குணச்சித்திரங்களை தைரியமாக ஏற்கும் மனநிலை அவருக்கு தனி ரசிகர் வட்டத்தையும், விமர்சகர்களிடமும் பெருமை பெற்ற நடிப்பாளராக உருவாக்கியுள்ளது.

இப்படி இருக்க இந்த வழக்கு விவகாரம் இன்னும் பல திருப்பங்களை ஏற்படுத்தும் வாய்ப்பு உள்ளது. சினிமா, சட்டம் மற்றும் அரசியல் என இந்த மூன்றும் ஒன்றாகக் கலந்த இந்த விவகாரம், மலையாள திரைத்துறையிலும், சமூகத்திலும் எதிர்காலத்தில் விவாதங்களுக்கு வழிவகுக்கக் கூடும்.
 

இதையும் படிங்க: பார்க்கிங் தகராறு.. காலா பட நடிகையின் உறவினர் கொடூரக் கொலை..!