தனது தனித்துவமான முனைப்புகள், எதார்த்தமான கதைகள் மற்றும் சமூக பார்வையுடன் கூடிய திரைப்படங்களின் மூலம் தமிழ் சினிமாவில் தனக்கென ஒரு இடத்தை உருவாக்கியவர் தான் இயக்குநர் ராம். குறிப்பாக 'கற்றது தமிழ்', 'தரமணி', 'தங்க மீன்கள்', 'பேரன்பு' போன்ற படங்களின் மூலம் திரைப்பட ரசிகர்களிடையே பாராட்டைப் பெற்ற இவர், தற்போது தனது புதிய முயற்சியில் உருவாக்கிய ‘பறந்து போ’ திரைப்படத்தின் மூலம் ரசிகர்களை சந்தித்து இருக்கிறார். கடந்த ஜூலை 4-ம் தேதி வெளியான இப்படம், எதிர்பாராத வகையில் அனைத்து தரப்பினரிடத்திலும் மிகுந்த வரவேற்பைப் பெற்று வருகிறது. மேலும், ‘பறந்து போ’ திரைப்படத்தில் மிர்ச்சி சிவா கதாநாயகனாக நடித்துள்ளார். இதுவரை பெரும்பாலும் காமெடி வேடங்களில் வெளிப்பட்ட சிவா, இதில் ஒரே நேரத்தில் உணர்ச்சி, நகைச்சுவை, கலந்த கதாபாத்திரத்தில் நடித்திருக்கிறார்.

அவரது நடிப்பும், இயக்குநர் ராமின் காட்சிப்படையும் படம் முழுவதும் புதிய அனுபவத்தை உருவாக்கியுள்ளது. இது வரை சமூக அரசியல், மனிதநேயம், அடையாள அரசியல் போன்ற தீவிரமான விஷயங்களை தனது படங்களில் தழுவிய இயக்குநர் ராம், 'பறந்து போ' மூலம் மென்மையான, ஆனால் பாதிக்கும் கதையை தெரிவிக்க முயற்சித்துள்ளார். இது ஒரு வகையில், அவரது திரைக்கதையின் பரிணாம வளர்ச்சியாக பார்க்கப்படுகிறது. இந்நிலையில், இப்படத்தின் நன்றி விழா கடந்த வாரம் சென்னையில் நடைபெற்றது. இந்த விழாவில் படக்குழுவினர், நடிகர்கள் மற்றும் ரசிகர்கள் என பலரும் கலந்து கொண்டனர்.

இந்த விழாவில் உரையாற்றிய இயக்குநர் ராம், திரைப்படத்தின் உருவாக்கப் பின்னணியையும், அதனால் அவருக்குள் ஏற்பட்ட எதிர்ப்பார்ப்புகளையும் வெளிப்படையாக பகிர்ந்து கொண்டார். அதன்படி பேசிய அவர், " 'பறந்து போ' படம் எனக்கு புது பயணமாக இருந்தது. மகிழ்ச்சியான, நிறைவான அனுபவத்தையும் அதிகமாக கொடுத்தது. இதுவரை நான் எடுத்த எல்லா படங்களும் சமூக பார்வையில் அதிக நெருக்கத்தை கொடுத்து இருந்தாலும், இந்த படம் நான் எடுத்ததிலேயே வேறுவிதமான முயற்சி, இந்த படம் வெளியாவதற்கு முன்பாக சுமார் 40 பேருக்கு இப்படத்தை தனியாக திரையிட்டு காட்டினேன். பார்த்த அனைவரும் சொன்னது என்ன தெரியுமா..? ‘ராம் காமெடியாக படம் எடுத்திருக்காரு போல..! மக்கள் எப்படி இதனை புரிந்து கொள்வார்கள் என தெரியவில்லை?’ என்று சொன்னார்கள். மேலும் சிலர் சந்தேகப்பட்டனர். ஆனால் என் மனதில் தெளிவாக ஒரு விஷயம் மட்டும் இருந்தது – இது ஒரு உண்மையான மற்றும் நேர்த்தியான கதை. ஆதலால் கண்டிப்பாக மக்கள் அதை உணர்வார்கள்.

இதையும் படிங்க: வீடியோ வெளியிட்டு வாழ்த்து சொன்ன இயக்குநர் அட்லீ..! குஷியில் "பறந்து போ" பட டீம்..! 

ஆகவே, இந்த படத்தை இயக்குவதற்கான திட்டம் எனக்கு எளிதாக உருவாகவில்லை. உதவி இயக்குநரான ராம் சங்கர், தயாரிப்பாளர் அஜித்தேவியை எனக்கு அறிமுகம் செய்து வைத்தார். அப்பொழுது நான் நேரடியாக அவரிடம் ஒன்றை கேட்டேன், இப்படம் தோல்வியடையும் வாய்ப்பு அதிகமாக இருக்கிறது, ஆதலால் நீங்கள் தயாரா?’ என்று. ஏனெனில், சினிமா என்பது திட்டமிட முடியாத ஒரு சதுரங்கம். எப்போது என்ன நடக்கும் என்று எதையும் கணிக்கவே முடியாது. அதனால் தான் அப்படி கூறினேன். ஆனால் தயாரிப்பாளரோ என்னைவிட அதிக நம்பிக்கையுடன் இருந்தார். அவரது அந்த நம்பிக்கை தான் இன்று இந்த வெற்றியை உருவாக்கியுள்ளது. மேலும், இந்த படத்தை ஒரு நகைச்சுவை படமாக மட்டும் பார்க்க வேண்டாம். இதில் வாழ்க்கையின் சீரழிவும், நம்மில் ஒவ்வொருவரின் உள் பயணமும் தலையாய அம்சமாக இருக்கின்றன. இந்த பிம்பங்களை, சிரிப்புகள் வழியாகவே சொல்லவேண்டும் என நினைத்தேன். அது, எளிய மக்களிடம் நேரடியாக செல்வதாக எனக்குத் தோன்றியது"  என்று இயக்குநர் ராம் கூறினார்.

இதனை தொடர்ந்து பலரும், “இது ராம் அடையாளத்தை மறந்த ஒரு படம் அல்ல, மாறாக அவரது இன்னொரு முகம்” எனக் குறிப்பிடுகின்றனர். இதை இயக்குநர் ராமும் ஒப்புக்கொண்டு, “பார்வை மாறினால், கதைகளும் மாறும். ஆனால் உண்மை மட்டும் மாறக்கூடாது” என தனது கருத்தை  வெளிப்படுத்தினார். இந்நிலையில், இப்படத்தின் நன்றி விழாவில் இயக்குநர் ராமின் உருக்கமான மற்றும் வெளிப்படையான பேச்சு, தமிழ் சினிமா இயக்குநர்களின் மனதளவியல் மற்றும் சுயவிமர்சன பார்வையை பிரதிபலிக்கிறது. 

இதையும் படிங்க: "கூலி" படத்தின் "மோனிகா" பாடலுக்கு ஆட்டம் போட ரெடியா..! கவர்ச்சியில் கலக்கும் பூஜா ஹெக்டே.. நடன காட்சி இதோ..!