திரைப்பட உலகில் ஒரே துறையில் மட்டுமே கவனம் செலுத்தாமல், தொடர்ந்து பல்வேறு முகங்களால் ரசிகர்களை கவர்ந்து வருபவர்களில் முக்கியமானவர் ஆர்ஜே பாலாஜி. ரேடியோ ஜாக்கியாக தனது பயணத்தை தொடங்கிய அவர், பின்னர் தொலைக்காட்சி, சினிமா, காமெடி, கதாநாயகன், திரைக்கதை ஆசிரியர், இயக்குனர் என பல துறைகளில் தனித்த அடையாளத்தை உருவாக்கியுள்ளார். அதுமட்டுமல்லாமல் கிரிக்கெட் வர்ணனையாளராகவும் தனது நகைச்சுவை கலந்த பேச்சால் ரசிகர்களை ஈர்த்தவர். இப்போது அவர் இயக்கியுள்ள “கருப்பு” திரைப்படம் வெளியீட்டை முன்னிட்டு, சமூக வலைதளங்களில் அவரைச் சுற்றி புதிய சர்ச்சை ஒன்று வெடித்துள்ளது.

நடிகர் சூர்யாவை மையமாக வைத்து உருவாகியுள்ள “கருப்பு” திரைப்படம் ஆரம்பத்திலிருந்தே ரசிகர்களிடையே பெரும் எதிர்பார்ப்பை ஏற்படுத்தி வந்தது. குறிப்பாக, இந்த படத்தில் ஆர்ஜே பாலாஜி வில்லன் கதாபாத்திரத்தில் நடித்திருக்கலாம் என்ற யூகங்கள் ட்ரெய்லர் வெளியான பிறகு அதிகரித்தன. ட்ரெய்லரில் அவர் தோன்றிய விதமும், பேசும் வசனங்களும், படத்தின் இருண்ட பின்னணியும் ரசிகர்களிடையே பல கேள்விகளை எழுப்பியது. “இந்த படத்தில் உண்மையிலேயே ஆர்ஜே பாலாஜிதான் எதிரி கதாபாத்திரமா?” என்ற விவாதம் சமூக வலைதளங்களில் வேகமாக பரவியது.

ஆனால் இதுகுறித்து பேசிய ஆர்ஜே பாலாஜி, “ட்ரெய்லரை பார்த்து எல்லோரும் பல கதைகள் சொல்லிக்கொண்டு இருக்கிறார்கள். உண்மையை தெரிந்துகொள்ள வேண்டுமென்றால் படத்தை தியேட்டரில் போய் பாருங்கள்” என்று சிரித்தபடி பதில் அளித்திருந்தார். இந்த பதிலும் ரசிகர்களின் ஆர்வத்தை மேலும் அதிகரித்துள்ளது.

இதையும் படிங்க: 'பாகுபலி' படத்தில் வந்த மாஸான வாய்ப்பு..!! நீங்க படத்துல வந்தா distraction-ஆ இருக்கும் என கூறிய ராஜமௌலி.. மனம் திறந்த ஆர்.ஜே.பாலாஜி..!

சமீபத்தில் வெளியான “கருப்பு” திரைப்பட ட்ரெய்லருக்கு ரசிகர்களிடமிருந்து நல்ல வரவேற்பு கிடைத்துள்ளது. சூர்யாவின் தீவிரமான தோற்றம், பின்னணி இசை, ஆக்ஷன் காட்சிகள் மற்றும் மர்மம் கலந்த கதை அமைப்பு ஆகியவை படத்தின் மீதான எதிர்பார்ப்பை உயர்த்தியுள்ளன. படம் வரும் மே 14ஆம் தேதி உலகம் முழுவதும் திரைக்கு வர உள்ள நிலையில், படக்குழு தற்போது தீவிர புரமோஷன் பணிகளில் ஈடுபட்டு வருகிறது.

அதன் ஒரு பகுதியாக நேற்று ஐதராபாத்தில் பிரம்மாண்ட ப்ரீ-ரிலீஸ் நிகழ்ச்சி நடைபெற்றது. இதில் படக்குழுவினர், தெலுங்கு திரையுலக பிரபலங்கள் மற்றும் ஏராளமான ரசிகர்கள் கலந்து கொண்டனர். அந்த நிகழ்ச்சியில் ஆர்ஜே பாலாஜி பேசிய சில வார்த்தைகள்தான் தற்போது சமூக வலைதளங்களில் பெரிய விவாதமாக மாறியுள்ளது.

நிகழ்ச்சியில் பேசும்போது அவர், “நான் சோஷியல் மீடியாவில் இருப்பவர்களுக்காக படம் எடுக்கவில்லை” என்று கூறினார். இந்த ஒரு வரியே இணையத்தில் பல்வேறு விதமாக எடுத்துக்கொள்ளப்பட்டது. சில நிமிடங்களிலேயே அந்த வீடியோ கிளிப் எக்ஸ், இன்ஸ்டாகிராம் மற்றும் யூடியூப் உள்ளிட்ட தளங்களில் வைரலானது.

“இப்போது சோஷியல் மீடியாவில் இல்லாதவர்கள் யார்?”, “படத்தை பிரமோட் செய்வதும் சமூக வலைதளங்களில்தானே?”, “நெட்டிசன்கள் இல்லாமல் படம் ஹிட் ஆகுமா?” போன்ற கேள்விகளை பலர் எழுப்பத் தொடங்கினர். சிலர் ஆர்ஜே பாலாஜி ரசிகர்களை அவமதித்துவிட்டார் என்று குற்றம்சாட்டினர். மேலும் சிலர், “நெகட்டிவ் விமர்சனங்களை தாங்கிக்கொள்ள முடியாமல் இப்படி பேசுகிறார்” என்றும் விமர்சித்தனர்.

இந்த விவகாரம் சமூக வலைதளங்களில் பெரும் ட்ரோலாக மாறிய நிலையில், தற்போது அதற்கு ஆர்ஜே பாலாஜி விளக்கம் அளித்துள்ளார். இன்று கேரளாவில் நடைபெற்ற புரமோஷன் நிகழ்ச்சியில் பேசிய அவர், தனது கருத்து தவறாக புரிந்துகொள்ளப்பட்டதாக தெரிவித்தார்.

“நான் சொன்னதின் அர்த்தம் வேற. தியேட்டருக்கு வந்து படத்தை மனசார என்ஜாய் செய்பவர்களுக்காக தான் இந்த படம். ஒவ்வொரு காட்சியையும் dissect செய்து, தேடித்தேடி குறைகளை கண்டுபிடிக்க வருபவர்களுக்காக அல்ல என்று தான் சொன்னேன். ஆனால் அதையே dissect செய்து என்னை அடி அடினு அடிக்கிறாங்க” என்று அவர் நகைச்சுவையாக கூறினார்.

அதோடு, “படத்துக்கு வரும்போது என்ஜாய் பண்ற மூடில் வாங்க. நோட்ஸ் எடுத்துட்டு வராதீங்க” என்று அவர் சிரித்தபடி கூறியதும் ரசிகர்கள் மத்தியில் கைதட்டலை பெற்றது. இந்த வீடியோவும் தற்போது இணையத்தில் வைரலாகி வருகிறது.

ஆர்ஜே பாலாஜி தனது படங்களில் சமூக கருத்துகளையும், நகைச்சுவையையும் கலந்த விதத்தில் கையாள்வதில் பெயர் பெற்றவர். அதனால் அவரின் பேச்சுகளும் எப்போதும் இணையத்தில் அதிக கவனம் பெறுகின்றன. குறிப்பாக அவர் பேசும் நேர்மையான மற்றும் சாடும் பாணி, ஒரு தரப்பினரால் பாராட்டப்படுவதோடு, மற்றொரு தரப்பினரால் விமர்சிக்கப்படுவதும் வழக்கமாகிவிட்டது.

“கருப்பு” திரைப்படம் தற்போது ரசிகர்கள் மத்தியில் பெரிய எதிர்பார்ப்பை ஏற்படுத்தியுள்ள நிலையில், இந்த சர்ச்சை படத்துக்கு கூடுதல் கவனத்தை பெற்றுத்தந்துள்ளது என சினிமா வட்டாரங்கள் கூறுகின்றன. சூர்யா மற்றும் ஆர்ஜே பாலாஜி கூட்டணி எந்த மாதிரியான அனுபவத்தை ரசிகர்களுக்கு தரப்போகிறது என்ற ஆர்வம் நாளுக்கு நாள் அதிகரித்து வருகிறது.

இந்நிலையில், சமூக வலைதள ட்ரோல்களுக்கு ஆர்ஜே பாலாஜி அளித்துள்ள பதில் மீண்டும் வைரலாகி வருகிறது. “குறை கண்டுபிடிக்காமல், படத்தை ரசிக்க வருங்கள்” என்ற அவரது கருத்து தற்போது ரசிகர்கள் மத்தியில் பெரிய விவாதமாக மாறியுள்ளது. வரும் மே 14ஆம் தேதி படம் வெளியான பிறகு, இந்த எதிர்பார்ப்புகள் எந்த அளவுக்கு நியாயமாகிறது என்பது தெரியவரும் என திரையுலக வட்டாரங்கள் கூறுகின்றன.

இதையும் படிங்க: 'பாகுபலி' படத்தில் வந்த மாஸான வாய்ப்பு..!! நீங்க படத்துல வந்தா distraction-ஆ இருக்கும் என கூறிய ராஜமௌலி.. மனம் திறந்த ஆர்.ஜே.பாலாஜி..!