சூப்பர் ஸ்டார் ரஜினிகாந்த் நடிப்பில் இயக்குநர் நெல்சன் திலீப்குமார் இயக்கத்தில் உருவாகியுள்ள ‘ஜெயிலர் 2’ திரைப்படம் ரசிகர்கள் மத்தியில் பெரும் எதிர்பார்ப்பை ஏற்படுத்தியிருந்தது. முதல் பாகத்தின் பிரம்மாண்ட வெற்றியைத் தொடர்ந்து உருவான இப்படம் திரையரங்குகளில் நல்ல வரவேற்பைப் பெற்று வருவதாகக் கூறப்படுகிறது.

படத்தின் வசூல், ரஜினியின் ஸ்டைலான நடிப்பு, அனிருத்தின் இசை என ஒவ்வொரு அம்சமும் ரசிகர்களிடம் பேசப்பட்டு வரும் நிலையில், தற்போது படத்திலிருந்து நீக்கப்பட்ட முக்கிய நட்சத்திரங்களின் காட்சிகள் குறித்த தகவல் ஒன்று இணையத்தில் பரபரப்பை ஏற்படுத்தியுள்ளது.

‘ஜெயிலர் 2’ படத்தில் ரஜினிகாந்துடன் இணைந்து பல மொழிகளைச் சேர்ந்த முன்னணி நட்சத்திரங்கள் நடித்துள்ளனர். குறிப்பாக சந்தானம், விஜய் சேதுபதி, மோகன்லால் உள்ளிட்ட பிரபலங்கள் படத்தில் இடம்பெற்றிருப்பது ரசிகர்களின் எதிர்பார்ப்பை அதிகரித்தது. ஆனால், படத்தின் இறுதிப் பதிப்பில் இவர்களுடைய பல காட்சிகள் இடம்பெறவில்லை என்ற தகவல் தற்போது ரசிகர்கள் மத்தியில் விவாதமாக மாறியுள்ளது.

இதையும் படிங்க: விக்ரம் மனசு வச்சாலே போதும்..!! விக்ரமின் ‘துருவ நட்சத்திரம்’ ரிலீஸாகாததற்கு இதுதான் காரணமாம்.. அந்தணன் சொன்ன தகவல்..

நீண்ட இடைவெளிக்குப் பிறகு நகைச்சுவை கதாபாத்திரத்தில் சந்தானம் நடித்திருப்பது அவரது ரசிகர்களுக்கு கூடுதல் உற்சாகத்தை ஏற்படுத்தியிருந்தது. இப்படத்தில் வில்லன் மிதுன் சக்ரவர்த்தியின் வீட்டில் நடைபெறும் பார்ட்டிக்கு ஈவென்ட் பிளானராக வரும் கதாபாத்திரத்திலும், கோவாவில் இருந்து போலீசாரின் கவனத்தைத் திசைதிருப்பி பொருட்களைக் கொண்டு வரும் முக்கியமான கதாபாத்திரத்திலும் அவர் நடித்திருந்ததாகக் கூறப்படுகிறது.

இதனால் படத்தில் சந்தானத்தின் நகைச்சுவை காட்சிகள் அதிகமாக இருக்கும் என்று ரசிகர்கள் எதிர்பார்த்தனர். ஆனால், படத்தின் நீளம் மற்றும் திரைக்கதை ஓட்டம் உள்ளிட்ட காரணங்களால் அவரது 10-க்கும் மேற்பட்ட காட்சிகள் எடிட்டிங்கில் நீக்கப்பட்டதாகத் தகவல்கள் வெளியாகியுள்ளன. இதனால் சந்தானத்தை திரையில் அதிக நேரம் பார்க்கலாம் என்று காத்திருந்த ரசிகர்கள் ஏமாற்றமடைந்துள்ளனர்.

இதேபோல் விஜய் சேதுபதி தொடர்பான சில முக்கிய காட்சிகளும் இறுதிப் படத்தில் இடம்பெறவில்லை என்று கூறப்படுகிறது. முதல் பாகத்தைப் போலவே இந்தப் படத்திலும் அவருடைய கதாபாத்திரம் ரசிகர்களிடம் எதிர்பார்ப்பை ஏற்படுத்தியிருந்தது. ஆனால், படத்தின் இறுதிப் பதிப்பில் அவர் தொடர்பான காட்சிகள் குறைக்கப்பட்டதாகச் சொல்லப்படுகிறது.

மலையாள சூப்பர் ஸ்டார் மோகன்லால் நடித்த பகுதிகளும் படத்தொகுப்பின்போது கணிசமாகக் குறைக்கப்பட்டதாகத் தகவல்கள் வெளியாகியுள்ளன. மாஸ் போலீஸ் அதிகாரியாகவும், காந்தாவின் கூட்டாளியாகவும் அவர் நடித்திருந்த நிலையில், பல காட்சிகள் நீக்கப்பட்டு இறுதியாக ஒரே ஒரு காட்சி மட்டுமே இடம்பெற்றதாகக் கூறப்படுகிறது. இதுகுறித்த அதிகாரப்பூர்வ விளக்கம் இதுவரை வெளியாகவில்லை.

இந்நிலையில், ரசிகர்களுக்கு உற்சாகமளிக்கும் வகையில் புதிய தகவல் ஒன்று வெளியாகியுள்ளது. அதாவது, படத்திலிருந்து நீக்கப்பட்ட சந்தானம், விஜய் சேதுபதி, மோகன்லால் உள்ளிட்ட நட்சத்திரங்களின் காட்சிகளை ஒன்றிணைத்து சுமார் 30 நிமிடங்கள் கொண்ட பிரத்யேக டெலிடெட் சீன்ஸ் வீடியோவாக வெளியிட படக்குழு ஆலோசித்து வருவதாகக் கூறப்படுகிறது.

இந்தத் தகவல் உண்மையாகும் பட்சத்தில், திரையரங்குகளில் பார்க்க முடியாமல் போன தங்களுக்குப் பிடித்த நடிகர்களின் காட்சிகளை ரசிகர்கள் தனியாகக் கண்டு ரசிக்க வாய்ப்பு கிடைக்கும். குறிப்பாக சந்தானத்தின் நகைச்சுவை காட்சிகளையும், மோகன்லால் மற்றும் விஜய் சேதுபதியின் மாஸ் காட்சிகளையும் பார்க்க ரசிகர்கள் ஆவலுடன் காத்திருக்கின்றனர்.

இருப்பினும், இந்த 30 நிமிட பிரத்யேக வீடியோ குறித்தோ, அதன் வெளியீடு குறித்தோ சன் பிக்சர்ஸ் அல்லது இயக்குநர் நெல்சன் தரப்பில் இதுவரை அதிகாரப்பூர்வ அறிவிப்பு வெளியாகவில்லை. எனவே, தற்போது வெளியாகியுள்ள தகவலை உறுதிப்படுத்தப்படாத அப்டேட்டாகவே பார்க்க வேண்டும். படக்குழுவின் அதிகாரப்பூர்வ அறிவிப்பு வந்தால் மட்டுமே இந்த எதிர்பார்ப்புக்கு முற்றுப்புள்ளி கிடைக்கும்.

இதையும் படிங்க: சினிமாவில் புதிய அவதாரம் எடுக்கும் சூர்யா..!! 100 கோடி வசூல் கொடுத்த இயக்குநருடன் கூட்டணி.. 49-வது படமும் ஹிட்டாகும் போலயே..!