தமிழகத்தில் 2026 சட்டசபை தேர்தலுக்கு தி.மு.க. தயாராகி வரும் நிலையில், தென் மாவட்டங்களில் உட்கட்சி பூசல்கள் தீவிரமடைந்துள்ளன. இதனால் கட்சி தலைமை கவலையில் உள்ளது.

முதலமைச்சர் மு.க. ஸ்டாலினின் மருமகனும், தி.மு.க. இளைஞர் அணி செயலாளருமான சபரீசன் தென் மாவட்டங்களுக்கு சிறப்பு சுற்றுப்பயணம் மேற்கொண்டு நிர்வாகிகளுடன் பஞ்சாயத்து நடத்தி வருகிறார். இது கட்சி வட்டாரத்தில் பெரும் பரபரப்பை ஏற்படுத்தியுள்ளது.

தி.மு.க.வின் உள் சர்வேயில் (பென் நிறுவனம் மூலம்) முக்கிய தகவல்கள் வெளியாகியுள்ளன. கூட்டணியில் இருந்து காங்கிரஸ் வெளியேறினால், கன்னியாகுமரி மாவட்டத்தில் ராஜேஷ்குமார் மட்டும் கிள்ளியூர் தொகுதியில் வெற்றி பெறுவார் என்று தெரிய வந்துள்ளது.

இதையும் படிங்க: ஒரு முஸ்லிம் ஓட்டு கூட விழாது!! திமுகவுக்கு ஷாக் கொடுத்த சன்னி பிரிவு!! முஸ்லிம் அமைப்புகள் திடீர் போர்க்கொடி!

தென் மாவட்டங்களில் சில தொகுதிகளில் காங்கிரஸ் ஓட்டுக்கள் அடர்த்தியாக உள்ளன. தேர்தல் பணியில் பணம் செலவழித்தால் தி.மு.க. வெற்றி பெறலாம் என்ற முடிவுக்கு சர்வே வந்துள்ளது.

இதையடுத்து சபரீசன் கன்னியாகுமரி, திருநெல்வேலி, தென்காசி, தூத்துக்குடி, மதுரை ஆகிய மாவட்டங்களில் தொகுதி வாரியாக நிர்வாகிகளை சந்தித்து பேசி வருகிறார். உளவுத்துறை தயாரித்த அறிக்கையின் அடிப்படையில் அதிருப்தி நிர்வாகிகள், அவர்கள் மீதான குற்றச்சாட்டுகளை விசாரித்து வருகிறார். "இனிமேல் தவறு செய்யாதீர்கள்" என்று அறிவுரை வழங்குகிறார்.

கோஷ்டி பூசலில் ஈடுபடுபவர்களை அழைத்து "அனைவரும் ஒற்றுமையாக தேர்தல் பணியில் ஈடுபடுங்கள். எதிர்க்கட்சி வேட்பாளர்களுடன் உள்ளடி வேலை செய்தால் தேர்தல் முடிந்ததும் கட்சியில் இருந்து நீக்கப்படுவீர்கள்" என்று கடுமையான எச்சரிக்கை விடுத்துள்ளார்.

வேட்பாளர் வாய்ப்பு மறுக்கப்பட்டால், இரண்டாவது முறை ஆட்சி அமைந்த பிறகு தகுதி அடிப்படையில் பதவிகள் தரப்படும் என்று உறுதியளித்து கட்சியினரை உற்சாகப்படுத்தி வருகிறார்.

தென் மாவட்டங்களில் கட்சி ரீதியாக மக்கள் அதிருப்தி அதிகரித்துள்ள நிலையில், சபரீசனின் இந்த சுற்றுப்பயணம் கட்சியை ஒருங்கிணைக்கும் முயற்சியாக பார்க்கப்படுகிறது. உட்கட்சி பிரச்னைகள் தீர்க்கப்படாவிட்டால் தேர்தல் களத்தில் பாதிப்பு ஏற்படும் என்பதால் தலைமை கவனமாக இருக்கிறது.

தி.மு.க.வின் தென் மண்டல உத்தி எப்படி அமையும் என்பது இப்போது பெரும் எதிர்பார்ப்பாக உள்ளது. தேர்தல் ஆண்டில் கட்சி ஒற்றுமை மிக முக்கியம் என்பதை இது நினைவூட்டுகிறது.

இதையும் படிங்க: செய்தியாளரை தாக்கிய வழக்கு!! திமுக எம்.எல்.ஏ-வுக்கு ஜாமின்! கல்குவாரியை படம் எடுத்த விவகாரம்?!