இஸ்ரேல் பிரதமர் பெஞ்சமின் நெதன்யாகு கொல்லப்பட்டுவிட்டதாக கடந்த சில நாட்களாக சமூக வலைதளங்களில் பரவி வந்த வதந்திகளுக்கு, அவரே நேரடியாக வீடியோ வெளியிட்டு முற்றுப்புள்ளி வைத்துள்ளார். குறிப்பாக, மக்களுக்காக நான் சாகக் கூடத் தயார் (Dying for my people) என்ற வாசகத்துடன், ஜெருசலேம் அருகே உள்ள ஒரு உணவகத்தில் (Cafe) காபி அருந்தும் வீடியோவை அவர் வெளியிட்டுள்ளார்.
ஈரானுடன் போர் பதற்றம் நிலவி வரும் சூழலில், கடந்த வாரம் நடைபெற்ற ஒரு செய்தியாளர் சந்திப்பின் வீடியோவைச் சுட்டிக்காட்டி, அதில் நெதன்யாகுவிற்கு வலது கையில் ஆறு விரல்கள் இருப்பதாகச் சிலர் பதிவிட்டனர். இது ஏஐ (AI) மூலம் உருவாக்கப்பட்ட போலியான வீடியோ என்றும், நிஜமான நெதன்யாகு உயிரிழந்துவிட்டார் என்றும் காட்டுத்தீயாகத் தகவல் பரவியது.
இந்த வதந்திகளைப் பகடி செய்யும் விதமாக, இன்று அவர் வெளியிட்ட வீடியோவில் தனது இரு கைகளையும் கேமரா முன் காட்டி விரல்களை எண்ணச் சொன்னார். எனக்கு எத்தனை விரல்கள் இருக்கின்றன என எண்ண விரும்புகிறீர்களா? இதோ பாருங்கள்.. எல்லாம் சரியாக இருக்கிறது என அவர் கிண்டலாகப் பேசினார்.
இதையும் படிங்க: வதந்தி பரப்புவோருக்கு சிறை...! சமூக வலைதளங்களை கண்காணிக்க தேர்தல் தேர்தல் ஆணையர் ஞானேஷ் குமார் உத்தரவு!
ஹீப்ரு மொழியில் Dying for coffee (காபிக்காக ஏங்குகிறேன் அல்லது காபி என்றால் உயிர்) என்ற சொற்றொடரைப் பயன்படுத்தி, தான் உயிருடன் இருப்பதையும், வதந்திகளைப் பற்றிய கவலையின்றித் தனது பணிகளைத் தொடர்வதையும் அவர் உறுதிப்படுத்தினார்.
இந்தியாவில் உள்ள இஸ்ரேல் தூதர் ரூவன் அசார் (Reuven Azar), நெதன்யாகு உயிருடன் இருப்பதை உறுதி செய்துள்ளார். பிரதமர் நலமுடன் இருக்கிறார். நான் அவரை நேரில் பார்த்தேன். சமூக வலைதளங்களில் பரப்பப்படுவது திட்டமிட்ட பொய்ப் பிரச்சாரம் என அவர் டெல்லியில் தெரிவித்தார்.
ஈரான் மற்றும் இஸ்ரேல் இடையே போர் தீவிரமடைந்துள்ள நிலையில், உளவியல் ரீதியான தாக்குதல்களை முறியடிக்க நெதன்யாகு இத்தகைய வீடியோக்களைத் தொடர்ந்து வெளியிட்டு வருகிறார்.
இதையும் படிங்க: சென்னை சென்ட்ரலில் ரூ. 12.50 லட்சம் வெள்ளி பறிமுதல்! தேர்தல் பறக்கும் படை அதிரடி!