சென்னை, அக்டோபர் 31: மறைந்த முன்னாள் பிரதமர் இந்திரா காந்தியின் 41வது நினைவு தினம் இன்று நாடு முழுவதும் அனுஷ்டிக்கப்படுகிறது. சென்னை சத்தியமூர்த்தி பவனில் தமிழ்நாடு காங்கிரஸ் ஏற்பாடு செய்த 'இந்திரா ஓர் வீரப்பெண்மணி' என்ற பேச்சரங்க அழைப்பிதழில், மகளிர் காங்கிரஸ் மாநிலத் தலைவி ஹசீனா சையது உள்ளிட்ட பெண் நிர்வாகிகளின் பெயர்கள் இடம் பெறாதது கடும் அதிருப்தியை ஏற்படுத்தியுள்ளது. 

இதனால், மகளிர் அணி நிர்வாகிகள் தனியாக நினைவஞ்சலி நிகழ்ச்சி நடத்த திட்டமிட்டுள்ளதாக தகவல் வெளியாகியுள்ளது. இந்திரா காந்தி பெண்களுக்கு உரிமை வழங்கிய வீரப்பெண்மணி என்பதால், அவரது நினைவு நிகழ்ச்சியில் பெண்களைப் புறக்கணிப்பது வேதனை அளிப்பதாக மகளிர் காங்கிரஸ் நிர்வாகிகள் தெரிவித்துள்ளனர்.

சென்னை சத்தியமூர்த்தி பவனில் TNCC தலைவர் கே. செல்வப்பெருந்தகை தலைமையில் நடக்கும் இந்த நிகழ்ச்சியில், மூத்த தலைவர் பீட்டர் அல்போன்ஸ் சிறப்புரை ஆற்றுகிறார். சட்டசபை காங்கிரஸ் கட்சித் தலைவர் ராஜேஷ்குமார் சிறப்பு அழைப்பாளராகப் பங்கேற்கிறார். 

இதையும் படிங்க: எலெக்‌ஷன் வரைக்கும் எதையும் மாத்தாதீங்க!! மாவட்ட காங்., தலைவர்கள் போர்க்கொடி!

அழைப்பிதழில் முன்னாள் தலைவர்கள் தங்கபாலு, கிருஷ்ணசாமி, திருநாவுக்கரசர், எம்.எல்.ஏ.க்கள் ரூபி மனோகரன், ஹசன் மவுலானா, துரை சந்திரசேகர், மாநில நிர்வாகி கோபண்ணா உள்ளிட்டோர் மற்றும் சென்னை மாவட்ட தலைவர்கள் ஐந்து பேரின் பெயர்கள் இடம் பெற்றுள்ளன. ஆனால், மகளிர் அணி மாநிலத் தலைவி ஹசீனா சையது உள்ளிட்ட எந்தப் பெண் நிர்வாகியின் பெயரும் இல்லை. பெண் எம்.பி., எம்.எல்.ஏ., கவுன்சிலர்களுக்கும் அழைப்பு விடுக்கப்படவில்லை.

இதனால் அதிருப்தி அடைந்த மகளிர் காங்கிரஸ் நிர்வாகிகள், சத்தியமூர்த்தி பவனில் இந்திரா படத்திற்கு இன்று தனியாக நினைவேந்தல் நிகழ்ச்சி நடத்த முடிவு செய்துள்ளனர். அவர்கள் கூறுகையில், "1984 செப்டம்பர் 15இல் மகளிர் காங்கிரஸ் அமைப்புக்கு அங்கீகாரம் வழங்கி இந்திரா துவக்கி வைத்தார். அது அவர் பங்கேற்ற கடைசி கட்சி நிகழ்ச்சி. இந்தியாவின் முதல் பெண் பிரதமர். தமிழக காங்கிரஸுக்கு முதல் பெண் தலைவராக மரகதம் சந்திரசேகரை நியமித்தவர். பெண்களுக்கு சம உரிமை கிடைக்கப் பாடுபட்டவர்" எனப் புகழ்ந்தனர்.

"அவரது நினைவு தின அழைப்பிதழில் பெண் நிர்வாகிகள் பெயரைப் போடாமல் இருட்டடிப்பு செய்திருப்பது வேதனை. கட்சியின் புரோட்டோகால் வரிசையில் மகளிர், இளைஞர், மாணவர், சேவாதளம் மாநிலத் தலைவர்களுக்கு முன்னுரிமை இருக்க வேண்டும். 

ஆனால், முன்னணி அமைப்புகளின் தலைவர்கள் புறக்கணிக்கப்பட்டுள்ளனர். 'இந்திரா ஓர் வீரப்பெண்மணி' என்ற தலைப்பில் பேரங்கம் நடத்தப்படுகிறது. அதில் பெண்களுக்கு இடமில்லை. மாநிலத் தலைவர் செல்வப்பெருந்தகையிடம் கேட்டால் முறையான பதில் இல்லை" என அவர்கள் வேதனை தெரிவித்தனர்.

இந்திரா காந்தி 1984 அக்டோபர் 31இல் கொல்லப்பட்டார். அவரது நினைவு தினம் காங்கிரஸில் முக்கியமானது. தமிழக காங்கிரஸில் பெண் நிர்வாகிகள் எண்ணிக்கை அதிகரித்துள்ளது. ஆனால், உள் மோதல்கள், கோஷ்டி பிரச்சினைகள் இதுபோன்ற புறக்கணிப்புகளை ஏற்படுத்துகின்றன. செல்வப்பெருந்தகை தலைவரான பிறகு கட்சி அமைப்பை வலுப்படுத்த முயல்கிறார். ஆனால், மகளிர் அணி அதிருப்தி கட்சியை பலவீனப்படுத்தலாம். தனி நினைவேந்தல் நிகழ்ச்சி நடத்தினால், உள் பிளவு வெளிப்படும்.

இதையும் படிங்க: இப்படி பேசிருக்கவே கூடாது! பிரதமர் மோடி Sorry கேட்கணும்! காங்., விமர்சனம்!