மத்திய பிரதேசத்தில் நடைபெற்ற அதிர்ச்சிகரமான கொலைச் சம்பவம் மாநிலம் முழுவதும் பரபரப்பை ஏற்படுத்தியுள்ளது. சத்னா (Satna) பகுதியில் 11 வயது சிறுவன் கொடூரமாக கொலை செய்யப்பட்டு, உடல் நீல நிற டிரம்மில் மறைக்கப்பட்ட நிலையில் கண்டுபிடிக்கப்பட்டது.
போலீசார் தெரிவித்ததாவது, ரமேஷ் ரசாக் மற்றும் ஆஷா தம்பதியின் மகனே இந்த கொலையின் பலியானவர். ரமேஷ் தற்போது நாசிக் (Nashik) நகரில் வேலை செய்து வருகிறார். இதனால், ஆஷா தனது இரு குழந்தைகளுடன் சத்னாவில் உள்ள வங்கி ஊழியர் குடியிருப்பில் வசித்து வந்தார்.
சம்பவம் நடந்த நாளில், ஆஷா தனது மகளை அழைத்து வேலைக்கு சென்றிருந்தார். மகனை வீட்டில் தனியாக விட்டுச் சென்றார். நண்பகலில் வீடு திரும்பிய போது, வீட்டு கதவு வெளியே பூட்டப்பட்டிருந்தது. மேலும், உள்ளே விளக்குகள் எரிந்ததும், ஏர் கூலர் இயங்கிக் கொண்டிருந்ததும் சந்தேகத்தை ஏற்படுத்தியது. மகன் காணாமல் போனதை தொடர்ந்து, அவர் போலீசில் புகார் அளித்தார்.
இதையும் படிங்க: 15 வயது சிறுமி கூட்டு பாலியல் வன்கொடுமை!! தமிழகம் இருண்ட நிலைக்கு சென்றுவிட்டதாக அண்ணாமலை சாடல்!
விரைந்து வந்த போலீசார் கதவை உடைத்து உள்ளே சென்ற போது, சுவர் மற்றும் பொருட்களில் ரத்தக் கறைகள் இருந்தன. மேலும், வீட்டின் மூலையில் இருந்த நீல நிற டிரம்மை திறந்த போது, அதில் சிறுவன் தொண்டை அறுக்கப்பட்ட நிலையில் சடலமாக இருந்தது கண்டுபிடிக்கப்பட்டது. இந்த காட்சி போலீசாரையே அதிர்ச்சியில் ஆழ்த்தியது.
போலீசார் விசாரணையில், அருகிலுள்ள லாண்டரி கடை உரிமையாளர் மதுரா ரசாக் மீது சந்தேகம் திரும்பியுள்ளது. சம்பவத்திற்கு பிறகு அவர் தலைமறைவாகியுள்ளார். அவரை கைது செய்ய மூன்று தனிப்படைகள் அமைத்து தீவிர தேடுதல் நடைபெற்று வருகிறது.
முதற்கட்ட விசாரணையில், ஆஷாவை திருமணம் செய்ய விரும்பிய ரசாக், அவரது மறுப்பால் கோபமடைந்து பழிவாங்கும் நோக்கில் இந்த கொலை செய்திருக்கலாம் என போலீசார் சந்தேகிக்கின்றனர். இருப்பினும், உண்மையான காரணம் குறித்து விசாரணை தொடர்ந்து நடைபெற்று வருகிறது.
இந்த கொடூர சம்பவம் பொதுமக்களிடையே அச்சத்தை ஏற்படுத்தியுள்ளது. பாதுகாப்பு மற்றும் குழந்தைகள் பாதுகாப்பு குறித்து மீண்டும் கேள்விகள் எழுந்துள்ளன. குற்றவாளியை விரைவில் கைது செய்து கடுமையான தண்டனை வழங்க வேண்டும் என்ற கோரிக்கையும் எழுந்துள்ளது.
இதையும் படிங்க: முறைதவறிய காதல்!! மனைவியை அடித்தே கொன்ற கணவன்!! அவசர அவசரமாக புதைக்கும் போது சிக்கினான்!