அசாம் மாநிலம் கவுகாத்தி நகரில் உள்ள ஓட்டலில் திங்கட்கிழமை இரவு துப்பாக்கிச்சூடு சம்பவம் நடைபெற்றது. தகவல் கிடைத்ததும் போலீசார் உடனடியாக சம்பவ இடத்திற்கு விரைந்தனர். உயிரிழந்தவர்களின் உடல்களை மீட்டு, காயமடைந்தவர்களை மருத்துவமனையில் சேர்த்தனர்.

கவுகாத்தி போலீஸ் கமிஷனர் பார்த்த சாரதி மஹந்தா சம்பவ இடத்தைப் பார்வையிட்ட பின்னர் செய்தியாளர்களிடம் பேசினார். “நாங்கள் நான்கு உடல்களை மீட்டுள்ளோம். இவை பிரேதப் பரிசோதனைக்கு அனுப்பப்பட்டுள்ளன.

துப்பாக்கிச் சூட்டில் ஈடுபட்டவர்களைக் கைது செய்வதற்கான நடவடிக்கைகளைத் தொடங்கியுள்ளோம். ஒருவர் கைது செய்யப்பட்டுள்ளார். விசாரணை தொடர்ந்து நடைபெற்று வருகிறது,” என்று அவர் தெரிவித்தார்.

இதையும் படிங்க: பசும்பொன் முத்துராமலிங்க தேவர் குருபூஜைக்கு செல்லாத விஜய்? பழனிசாமிக்கும் நெருக்கடி! உளவுத்துறை எச்சரிக்கை!

மருத்துவமனையில் சிகிச்சை பெற்று வந்த ஒருவர் உயிரிழந்ததால் பலி எண்ணிக்கை ஐந்தாக உயர்ந்தது. ஆறு பேர் துப்பாக்கிச் சூட்டில் காயமடைந்தனர். அவர்களில் ஐவர் இறந்தனர். ஒருவர் தொடர்ந்து சிகிச்சையில் உள்ளார். சம்பவம் ஹோட்டல் பிலாஸ் இன்னில் போரா சர்வீஸ் பகுதியில் இரவு சுமார் ஒன்பது மணியளவில் நிகழ்ந்தது.

போலீசார் விசாரணையில் ஓட்டல் உரிமையாளருக்கும் அந்தச் சொத்தை குத்தகைக்கு எடுத்திருந்த நபருக்கும் இடையே தகராறு ஏற்பட்டிருந்தது தெரியவந்தது. குத்தகைதாரரே இந்தத் தாக்குதலை நடத்தியதாக போலீசார் தெரிவித்தனர்.

குற்றம் சாட்டப்பட்டவர் கைது செய்யப்பட்டு, பயன்படுத்தப்பட்ட ஆயுதம் கைப்பற்றப்பட்டுள்ளது. விசாரணை தொடர்ந்து நடைபெற்று வருகிறது. உயிரிழந்தவர்களில் பெரும்பாலானோர் ஓட்டல் உரிமையாளர் குடும்பத்தைச் சேர்ந்தவர்கள் என அறியப்படுகிறது.

இதையும் படிங்க: பயிற்சியின்போது நடுவானில் மோதிய பிலிப்பின்ஸ் ராணுவ விமானங்கள்! 4 விமானிகள் பலி! உறைய வைக்கும் காட்சி!