மதுரை மாவட்டம் மேலூர் அருகே தனியாமங்கலம் கிராமத்தைச் சேர்ந்த பெரிய கருப்பன்-சத்யா தம்பதியருக்கு இரு மகள்கள் மற்றும் ஒரு மகன் உள்ளனர். பெரிய கருப்பன் வெளிநாட்டில் பணியாற்றி வரும் நிலையில், தனியாமங்கலத்தில் மூன்று குழந்தைகளுடன் சத்யா வசித்து வந்தார்.

7 வயதான மகன் முத்துவேல் மூன்றாம் வகுப்பு படித்து வந்தான். நேற்று முன்தினம் வீட்டின் அருகே விளையாடச் சென்ற முத்துவேல் வீடு திரும்பவில்லை. தாய் சத்யா போலீசில் புகார் அளித்தார். அதே பகுதியில் உள்ள பாழடைந்த வீட்டில் சிறுவன் மர்மமான முறையில் இறந்து கிடந்த நிலையில் காணப்பட்டான்.

சிறுவனின் உடலை மீட்ட போலீசார் பிரேதப் பரிசோதனைக்காக மருத்துவமனைக்கு அனுப்பி வைத்தனர். இந்த மரணம் பெரும் பரபரப்பை ஏற்படுத்தியதால் போலீசார் தீவிர விசாரணை நடத்தினர். சிறுவர்கள், பெண்கள், ஆண்கள் என பலரிடம் விசாரணை நடத்தப்பட்டது.

இதையும் படிங்க: இட்லி கடைக்காரர் வீட்டில் 9 எம்.எம். பிஸ்டல்! 6 தோட்டாக்கள், உலோகச் சிலைகள் பறிமுதல்! கணவன், மனைவி உட்பட 3 பேர் கைது!

அதே பகுதியைச் சேர்ந்த 10 வயது சிறுவனுடன் முத்துவேல் விளையாடியது விசாரணையில் தெரிய வந்தது. அம்மன் கோயில் அருகே இருவரும் விளையாடியபோது 10 வயது சிறுவன் விளையாட்டாகக் கயிறை வைத்து முத்துவேல் கழுத்தை இறுக்கியதாகத் தகவல் கிடைத்தது. அதிலிருந்து தப்பிய முத்துவேல் அந்தச் சிறுவனின் தாய் சந்தியாவிடம் புகார் சொல்லச் சென்றான்.

சந்தியாவின் கண்முன்னே முத்துவேல் மயங்கி விழுந்தான். முத்துவேல் இறந்துவிட்டதை அறிந்த சந்தியா அதிர்ச்சியடைந்தார். அறியாமல் தவறு செய்த மகன் மீது கொலைப்பழி வந்துவிடுமோ என அஞ்சி, முத்துவேல் உடலைத் தூக்கிச் சென்று பாழடைந்த வீட்டில் போட்டுவிட்டு வந்ததாக விசாரணையில் தெரிய வந்தது.

முத்துவேல் கழுத்தை இறுக்கிய 10 வயது சிறுவன் மற்றும் அவரது தாய் சந்தியா (32) ஆகியோரை போலீசார் கைது செய்தனர். சந்தியா மதுரை சிறையில் அடைக்கப்பட்டுள்ளார். சிறுவன் சீர்திருத்தப் பள்ளிக்கு அனுப்பி வைக்கப்பட்டுள்ளான். மேலும் விசாரணை தொடர்கிறது.

இதையும் படிங்க: சென்னை மடிப்பாக்கத்தில் தகராறு! வீட்டுக்கே வந்து கணவன், மனைவியை தாக்கிய போதை ஆசாமிகள்!