விருத்தாசலம் (கடலூர் மாவட்டம்): நாம் தமிழர் கட்சி தலைமை ஒருங்கிணைப்பாளர் சீமான் காரை மறித்ததாகக் கூறி திமுக நிர்வாகி ஒருவரைத் தாக்கிய விவகாரம் பெரும் பரபரப்பை ஏற்படுத்தியுள்ளது. இதுதொடர்பாக சீமான் உள்ளிட்ட 16 பேர் மீது விருத்தாசலம் போலீசார் நான்கு பிரிவுகளின் கீழ் வழக்குப் பதிவு செய்து தீவிர விசாரணை நடத்தி வருகின்றனர்.
கடலூர் மாவட்டம் விருத்தாசலத்தைச் சேர்ந்த ரங்கநாதன் (வயது 44) பெட்ரோல் பங்க் உரிமையாளராகவும், திமுக கிழக்கு மாவட்ட வர்த்தக அணி அமைப்பாளராகவும் செயல்படுகிறார். டிசம்பர் 14ஆம் தேதி இரவு 7.15 மணியளவில் விருத்தாசலத்தில் அரசு ஊழியர் சங்க மாநாட்டில் கலந்துகொண்டு திரும்பிய நாம் தமிழர் கட்சி தலைவர் சீமானின் கார் பயணித்துக் கொண்டிருந்தது. அப்போது ரங்கநாதன் அந்தக் காரை மறித்ததாகக் கூறப்படுகிறது.
இதனால் ஆத்திரமடைந்த நாம் தமிழர் கட்சியினர் ரங்கநாதனைத் தாக்கியதாகப் புகார் எழுந்தது. இச்சம்பவத்தில் ரங்கநாதனுக்கு காயம் ஏற்பட்டதாகத் தெரிகிறது. இதுதொடர்பாக ரங்கநாதன் விருத்தாசலம் போலீசில் அளித்த புகாரின் அடிப்படையில் சீமான் உள்ளிட்ட 16 பேர் மீது நான்கு பிரிவுகளின் கீழ் வழக்குப் பதிவு செய்யப்பட்டுள்ளது.
இதையும் படிங்க: " விரைவில் அவர்கள் தலை துண்டிக்கப்படும்" - கடலம்மா மாநாட்டில் சீமான் ஆவேசம்...!
போலீசார் வழக்கு விவரங்களை வெளியிடவில்லை என்றாலும், தாக்குதல், அச்சுறுத்தல் உள்ளிட்ட பிரிவுகளில் வழக்கு பதிவு செய்யப்பட்டிருக்கலாம் எனக் கூறப்படுகிறது.
அதேநேரத்தில், நாம் தமிழர் கட்சியின் மாநில ஒருங்கிணைப்பாளர் ராஜவேல் அளித்த புகாரின் அடிப்படையில் ரங்கநாதன் மீது இரண்டு பிரிவுகளின் கீழ் பதில் வழக்கும் பதிவு செய்யப்பட்டுள்ளது. சீமானின் காரை மறித்து போக்குவரத்துக்கு இடையூறு விளைவித்தது, அச்சுறுத்தல் விடுத்தது உள்ளிட்ட குற்றச்சாட்டுகளின் அடிப்படையில் இந்தப் பதில் வழக்கு பதிவு செய்யப்பட்டிருக்கலாம் எனத் தெரிகிறது.
இரு தரப்பினரும் ஒருவரையொருவர் குற்றம் சாட்டி வரும் நிலையில், போலீசார் சம்பவ இடத்தில் பதிவான சிசிடிவி காட்சிகள், சாட்சியங்கள் உள்ளிட்டவற்றை ஆதாரமாகக் கொண்டு விரிவான விசாரணை நடத்தி வருகின்றனர்.
இச்சம்பவம் விருத்தாசலம் பகுதியில் அரசியல் பரபரப்பை ஏற்படுத்தியுள்ளது. இரு கட்சியினரும் இதுகுறித்து இதுவரை அதிகாரப்பூர்வமாக கருத்து தெரிவிக்கவில்லை.
இதையும் படிங்க: தேமுதிக - பாமக எதிர்பார்ப்பு என்ன? ரகசியமாக ஆய்வு நடத்தும் அமித்ஷா!! அரசியல் ஆட்டம் ஆரம்பம்!