தேர்தல் பிரசாரத்தின்போது தமிழக வெற்றிக் கழகத் தலைவர் விஜய் சென்ற மாற்று வண்டியை ஓட்டியவர், காவல் துறையால் தேடப்படும் குற்றவாளி என அதிமுக தெரிவித்துள்ளது.

நேற்று முதலமைச்சர் விஜய் பங்கேற்ற தாராபுரம் ரோட்ஷோ நிகழ்ச்சி நடைபெற்றது. இந்த ரோட்ஷோவுக்கு ஒவ்வொரு மாவட்டச் செயலாளரும், வெளியூர் மாவட்டப் பொறுப்பாளர்களும் குறிப்பிட்ட எண்ணிக்கையில் மக்களை அழைத்து வர வேண்டும் என பணிக்கப்பட்டதாக அதிமுக தரப்பில் குற்றம்சாட்டப்பட்டுள்ளது.

வெளியூர்களில் இருந்து பொறுப்பாளர்கள் அழைத்து வந்த கூட்டத்தையே ரோட்ஷோவில் திரண்ட கூட்டமாக காட்டியதாகவும், தாராபுரத்தைச் சேர்ந்த பொதுமக்கள் அதிக அளவில் அந்த ரோட்ஷோவில் பங்கேற்கவில்லை என்றும் அதிமுக தரப்பில் தெரிவிக்கப்பட்டுள்ளது.

இதையும் படிங்க: கணவர் கண் முன்னே பெண் நிர்வாகிக்கு தாறுமாறு அடி... வீடு புகுந்து தவெக நிர்வாகி அட்ராசிட்டி...!

இதுகுறித்து அதிமுக நிர்வாகி ஒருவர் கூறுகையில், “தேர்தல் பிரசாரத்தின்போது, கடந்த 26ஆம் தேதி காவல்துறையினர் வழக்குப்பதிவு செய்தனர். அந்த வழக்கில் இடம்பெற்றுள்ள பலரை காவல்துறை அதிகாரிகள் தீவிரமாகத் தேடி கைது செய்துள்ளனர். அவர்கள் தற்போது சிறையில் உள்ளனர்.

ஆனால், பொட்டிக்காம்பாளையத்தைச் சேர்ந்த அசோக் என்பவர் அந்த வழக்கில் இடம்பெற்றுள்ள தேடப்படும் குற்றவாளி. அவர் தற்போது முதலமைச்சர் விஜய்யுடன் வந்து, அவருக்கு மாற்று வண்டியை ஓட்டிக்கொண்டிருக்கிறார்.

முதலமைச்சர் விஜய் வசம் உள்ள காவல் துறைதான் இந்த வழக்கை பதிவு செய்துள்ளது. அந்த காவல் துறையால் தேடப்படும் குற்றவாளி ஒருவர், முதலமைச்சருக்கு அருகிலேயே அமர்ந்து வண்டி ஓட்டிக்கொண்டிருக்கிறார். இதுதான் தூய்மையான ஆட்சியா? இதுதான் தூய சக்தியா? தீய சக்தி எது, தூய சக்தி எது என்பதை மக்களே முடிவு செய்யுங்கள்.

காவல் துறையால் தேடப்படும் குற்றவாளி ஒருவர், முதலமைச்சரின் அருகில் அமர்ந்து வண்டி ஓட்டிக்கொண்டிருக்கிறார் என்றால், அவர் ஏன் கைது செய்யப்படவில்லை? அப்படியானால், அவர் மீது பதிவு செய்யப்பட்ட வழக்கு பொய் வழக்கா என்ற கேள்வி எழுகிறது. பொய் வழக்கு என்றால், அந்த வழக்கில் உள்ள அனைவரையும் விடுதலை செய்ய வேண்டும். இந்த ஆட்சி தூய்மையான ஆட்சி அல்ல. இது ஒரு வேடிக்கையான ஆட்சி, ரீல்ஸ் ஆட்சி” என்று விமர்சித்தார்.

மேலும், அவர் தொடர்ந்து பேசுகையில், “அவர் ஏற்கனவே அனைத்திந்திய அண்ணா திராவிட முன்னேற்றக் கழகத்தில் இருந்தவர். அவரை மிரட்டுவதற்காகவே ஒரு அமைச்சரை நியமித்துள்ளனர். தாராபுரம் தொகுதியில் மிரட்டுவதற்காகவே ஒரு அமைச்சரை நியமித்துள்ளனர். இதுதொடர்பாக எங்களிடம் ஆடியோ ஆதாரங்கள் உள்ளன. தேவைப்படும் நேரத்தில், உரிய இடத்தில் அந்த ஆதாரங்களை வழங்குவோம்.

அதேபோல்தான் பொட்டிக்காம்பாளையம் அசோக்கையும் மிரட்டி கட்சியில் சேர்த்துள்ளனர். அவரை மட்டுமல்லாமல், ஆயிரக்கணக்கான பேரை மிரட்டி கட்சியில் சேர்த்துள்ளனர். சேர்த்துள்ளார்களே தவிர, யாரும் அவர்களுக்கு வாக்களிக்க மாட்டார்கள்” என்று தெரிவித்தார்.

இதனிடையே, காவல் துறையால் தேடப்படும் குற்றவாளி ஒருவர் முதலமைச்சர் விஜய்க்கு மாற்று வண்டி ஓட்டியதாக அதிமுக தரப்பில் மீண்டும் குற்றச்சாட்டு முன்வைக்கப்பட்டுள்ளது. “இதுதான் தூய சக்தியா?” என்றும் முதலமைச்சர் விஜய்க்கு அதிமுக கேள்வி எழுப்பியுள்ளது.

மேலும், தாராபுரம் தொகுதியில் அதிமுக நிர்வாகிகள் தமிழக வெற்றிக் கழகத்தில் சேருமாறு அமைச்சர் ஒருவரால் மிரட்டப்பட்டதாகவும் அதிமுக தரப்பில் புகார் தெரிவிக்கப்பட்டுள்ளது.

சில நாட்களுக்கு முன்பு அதிமுகவைச் சேர்ந்த அசோக் என்பவர் மிரட்டப்பட்டு தமிழக வெற்றிக் கழகத்தில் சேர்க்கப்பட்டதாகவும் அதிமுக தரப்பில் தெரிவிக்கப்பட்டுள்ளது. குண்டடம் அருகே உள்ள பொட்டிக்காம்பாளையத்தில் அதிமுக பொறுப்பாளராக இருந்த அசோக், தற்போது முதலமைச்சர் விஜய்க்கு மாற்று வண்டி ஓட்டியதாகவும் அதிமுக தரப்பில் குற்றம்சாட்டப்பட்டுள்ளது.

இதையும் படிங்க: ஓஹோ..!! - இப்படியொரு கணக்கு இருக்கா?... வஞ்சியம்மன் கோவில் விசிட்.. முதல்வரின் ஆன்மீக வியூகம் வெல்லுமா?