ஐக்கிய அரபு எமிரேட்சின் துபாயில் உலகிலேயே முதல் முறையாக 24 காரட் சுத்தமான தங்கத்தால் ஆன நடைபாதை கட்டப்பட்டு வருகிறது. அடுத்த இரண்டு மாதங்களுக்குள் இது திறக்கப்படும் என அறிவிக்கப்பட்டுள்ளது. துபாய் கோல்டு டிஸ்ட்ரிக்ட் அதிகாரிகள் இந்தத் திட்டத்தை உலகின் முதல் மற்றும் மிக நீளமான தங்க நடைபாதையாக விவரித்துள்ளனர்.

துபாய் உலகின் முக்கிய வணிக மற்றும் சுற்றுலா மையமாகத் திகழ்கிறது. குறிப்பாக தங்க நகைகளின் முக்கிய சந்தையாக அறியப்படுகிறது. இறக்குமதி செய்யப்படும் தங்கத்திற்கு கடுமையான வரிகள் இல்லாததால் பல நாடுகளை விட குறைந்த விலையில் தங்கம் கிடைக்கிறது. இதனால் சுற்றுலாப் பயணிகளும் முதலீட்டாளர்களும் தங்கம் வாங்க துபாயை நாடுகின்றனர்.

இந்த ஆண்டு ஜனவரியில் தெய்ரா பகுதியில் துபாய் கோல்டு டிஸ்ட்ரிக்ட் தொடங்கப்பட்டது. தங்கம், ஆபரணங்கள், மொத்த வர்த்தகம் மற்றும் முதலீடு தொடர்பான ஆயிரத்திற்கும் மேற்பட்ட சில்லறை விற்பனையாளர்கள் இங்கு இடம்பெற்றுள்ளனர். தங்க மாவட்டத்தின் அந்தஸ்தை மேலும் உயர்த்தும் வகையிலும் சுற்றுலாப் பயணிகளை ஈர்க்கும் நோக்கிலும் இந்த தங்க நடைபாதை திட்டம் மேற்கொள்ளப்பட்டுள்ளது.

இதையும் படிங்க: அடுத்தடுத்து சிக்கும் கைதிகள்.! சிறையில் இருந்து ஓட்டம்... தட்டி தூக்கிய போலீஸ்..!!

துபாய் கோல்டு டிஸ்ட்ரிக்ட் வணிகப் பிரிவு மூத்த இயக்குநர் ரஷீத் அல் ஹர்மூதி கூறுகையில், இந்த நடைபாதை அடுத்த இரண்டு மாதங்களுக்குள் திறக்கப்படும் என்றும், பார்வையாளர்கள் தங்கப் பாதையில் நடக்கும் தனித்துவமான அனுபவத்தைப் பெற முடியும் என்றும் தெரிவித்தார். இந்தத் திட்டம் துபாயின் தங்க வர்த்தக மையம் மற்றும் சுற்றுலாத் தலமாக உள்ள நிலையை மேலும் வலுப்படுத்தும் என அவர் குறிப்பிட்டார்.

2026 ஆம் ஆண்டு தொடக்கத்திலிருந்து இந்த மாவட்டத்தில் மொத்த தங்க வர்த்தக அலுவலகங்களின் எண்ணிக்கை 20 சதவீதம் அதிகரித்துள்ளதாகவும், தங்கம், நகைகள், இரத்தினக்கற்கள் மற்றும் ஆடம்பர கடிகாரங்கள் விற்கும் புதிய கடைகள் 15 சதவீதம் உயர்ந்துள்ளதாகவும் அதிகாரிகள் தெரிவித்துள்ளனர். மேலும் மத்திய கிழக்கின் மிகப்பெரிய தங்க மற்றும் நகை வர்த்தக கண்காட்சி அமைக்கும் திட்டங்களும் உள்ளன.

இந்தத் தங்க நடைபாதை திறக்கப்பட்டால் உலகளவில் கவனத்தை ஈர்க்கும் புதிய சுற்றுலா அம்சமாக மாறும் என எதிர்பார்க்கப்படுகிறது. தற்போது கட்டுமானப் பணிகள் நடைபெற்று வருகின்றன.

இதையும் படிங்க: SCO மாநாடு: ‘ஆபரேஷன் சிந்தூர்’க்குப் பின்.. இந்தியாவின் அழைப்பால் மீண்டும் கவனம் பெறும் இந்தியா - பாக். உறவு!