அமெரிக்க அதிபர் டொனால்ட் டிரம்ப், தனது உடல்நலம் குறித்த கேள்வியை எழுப்பிய ராய்ட்டர்ஸ் செய்தியாளரை உருவக் கேலி செய்து பெரும் விமர்சனத்துக்கு உள்ளாகியுள்ளார். நவம்பர் 3 அன்று நடைபெறும் இடைக்காலத் தேர்தலுக்காக தீவிர வாக்கு சேகரிப்பில் ஈடுபட்டிருக்கும் 80 வயதான டிரம்ப், கான்சாஸ் மற்றும் அயோவா மாநிலங்களில் திட்டமிடப்பட்டிருந்த பிரசாரக் கூட்டங்களை ரத்து செய்தார். தொடர்ச்சியான பயணங்களால் சோர்வடைந்திருக்கலாம் என்ற ஊகங்கள் எழுந்த நிலையில், தென் கரோலினாவில் நடந்த பிரசாரத்திற்குப் பிறகு விமான நிலையத்தில் பத்திரிகையாளர்களைச் சந்தித்தார்.

ராய்ட்டர்ஸின் வெள்ளை மாளிகை செய்தியாளர் ஜேக்கப் போகெஸ், “பயணச் சோர்வால் கான்சாஸ் பேரணியை ரத்து செய்தீர்களா?” என்று கேட்டார். இதனால் கோபமடைந்த டிரம்ப், “இந்தக் கேள்வியைக் கேட்க நீங்கள் நோய்வாய்ப்பட்டிருக்க வேண்டும். நீங்கள் ஒரு நோயாளி. எந்த அமைப்பைச் சேர்ந்தவர்?” என்று கேட்டார். ராய்ட்டர்ஸ் என்று தெரிந்ததும், “ராய்ட்டர்ஸ் மோசமான நிறுவனம். இவரைப் பாருங்கள். உடல்வாகு மிகவும் மோசம்” என்று பேசினார். 

செய்தியாளர் தனது அக்கறையை விளக்கியபோதும், “இரண்டு வாரங்களாக என்னைப் பின்தொடர்கிறீர்கள். நான் முழுமையாக ஆரோக்கியமாக இருக்கிறேன். நீங்கள் அருவருப்பானவர். முதலில் உங்கள் உடலைக் கட்டுக்குள் கொண்டு வாருங்கள். நீங்கள் நரகத்தைப் போல் தோற்றமளிக்கிறீர்கள்” என்று காட்டமாகத் தாக்கினார்.

இதையும் படிங்க: “முடியவே முடியாது சார்”..!! டிரம்ப் வைத்த கோரிக்கை.. அதிரடியாக மறுப்பு தெரிவித்த சுந்தர் பிச்சை!!

கான்சாஸ் செனட்டர் ரோஜர் மார்ஷல் ஏற்கனவே வெற்றியை நோக்கிச் செல்கிறார் என்பதால் அங்கு செல்லத் தேவையில்லை என்றும், அதற்குப் பதிலாக தொலைபேசி வழியாக பல மாநிலங்களில் பிரசாரம் செய்வதாகவும் டிரம்ப் விளக்கினார். அண்மையில் 25க்கும் மேற்பட்ட பேரணிகளில் பங்கேற்றுள்ள அவரின் குரல் சற்று கரகரப்பாக இருப்பதும் கவனிக்கப்பட்டது.

இடைக்காலத் தேர்தலில் மக்கள் பிரதிநிதிகள் சபையின் 435 இடங்களும், செனட்டின் 35 இடங்களும், பல மாநில ஆளுநர் பதவிகளும் போட்டியிடப்படுகின்றன. குடியரசுக் கட்சி பெரும்பான்மையை இழந்தால், டிரம்ப்பின் மீதமுள்ள பதவிக்காலத்தில் சட்டமியற்றல் மற்றும் நிதி ஒப்புதல் பெறுவதில் பெரும் சிரமங்கள் ஏற்படும் என அரசியல் ஆய்வாளர்கள் கருதுகின்றனர். இந்தச் சம்பவம் அதிபரின் உடல்நிலை குறித்த விவாதங்களை மீண்டும் தூண்டியுள்ளது.
 

இதையும் படிங்க: சுந்தர் பிச்சையை பார்த்து அந்த வார்த்தை சொன்ன டிரம்ப்.. வெள்ளை மாளிகை கூட்டத்தில் பரபரப்பு!!