வாஷிங்டன்: அமெரிக்காவில் உயர்கல்வி முடித்த பிறகு வேலை அனுபவம் பெறுவதற்கு வெளிநாட்டு மாணவர்களுக்கு உதவும் ‘ஆப்ஷனல் பிராக்டிகல் டிரெய்னிங்’ எனப்படும் OPT திட்டத்தில் மிகப்பெரிய கட்டணத்தை அறிமுகப்படுத்த அமெரிக்காவின் டிரம்ப் நிர்வாகம் முன்மொழிந்துள்ளது. புதிய திட்டம் அமலுக்கு வந்தால், அமெரிக்காவில் படித்து வேலை பார்க்க விரும்பும் இந்திய மாணவர்களுக்கும் பல்வேறு நடைமுறை சிக்கல்கள் ஏற்படக்கூடும்.

தற்போதைய நடைமுறையில் F-1 விசாவில் அமெரிக்காவில் படிக்கும் மாணவர்கள், தங்கள் படிப்புடன் தொடர்புடைய பணியில் பயிற்சி பெற OPT திட்டத்தைப் பயன்படுத்த முடியும். பொதுவாக படிப்பு முடிந்த பிறகு ஒரு ஆண்டு வரை பணியாற்ற அனுமதி கிடைக்கும். அறிவியல், தொழில்நுட்பம், இன்ஜினியரிங் மற்றும் கணிதம் எனப்படும் STEM பிரிவுகளில் படித்த தகுதியான மாணவர்களுக்கு மேலும் 24 மாதங்கள் நீட்டிப்பு கிடைக்கிறது.

இந்த நிலையில், அமெரிக்க உள்நாட்டுப் பாதுகாப்புத் துறை (DHS) முன்வைத்துள்ள புதிய விதிகளின்படி, ஒரு மாணவரை OPT-க்கு பரிந்துரைக்கும் அமெரிக்க கல்வி நிறுவனத்துக்கு முதல் முறையாக 70,000 அமெரிக்க டாலர் கட்டணம் விதிக்கப்படும். அதன் பிறகு கூடுதல் OPT காலத்துக்கு மேலும் 30,000 டாலர் கட்டணம் விதிக்கப்படும். இதனால் ஒரே மாணவருக்கான மொத்த கட்டணம் 1 லட்சம் டாலர் வரை செல்லக்கூடும்.

இதையும் படிங்க: “சிங்கம்யா நீ...” - நடுவானில் ரத்தம் சிந்தி மக்களை காத்த ‘இந்தியர் ஃபைலட்’... தலையில் தூக்கி வைத்து கொண்டாடும் டிரம்ப், நெதன்யாகு...!

இங்கு முக்கியமான விஷயம், இந்த தொகையை மாணவர் நேரடியாக அமெரிக்க அரசுக்கு செலுத்த வேண்டும் என்று தற்போது முன்மொழியப்படவில்லை. கல்வி நிறுவனங்கள்தான் முதலில் இந்தக் கட்டணத்தை செலுத்த வேண்டும்.

ஆனால் அந்தச் செலவை மாணவரிடமோ அல்லது அவருக்கு வேலை வழங்கும் நிறுவனத்திடமோ வசூலித்துக்கொள்ள கல்வி நிறுவனங்களுக்கு அனுமதி வழங்கப்படலாம். எனவே நடைமுறையில் இதன் சுமை மாணவர்களுக்கும் வேலை வழங்கும் நிறுவனங்களுக்கும் செல்லும் வாய்ப்பு உள்ளது.

இந்த மாற்றம் இந்திய மாணவர்களுக்கு முக்கியமானதாக பார்க்கப்படுகிறது. 2024-25 கல்வியாண்டில் அமெரிக்காவில் படித்த இந்திய மாணவர்களின் எண்ணிக்கை 3.63 லட்சத்துக்கும் அதிகமாக இருந்தது. மேலும், 2024-ம் ஆண்டில் STEM OPT பயன்படுத்திய வெளிநாட்டு மாணவர்களில் இந்தியர்கள் சுமார் 48 சதவீதம் பேர் என அமெரிக்க குடியேற்றத் தரவுகள் தெரிவிக்கின்றன.

இதனால் குறிப்பாக அதிக செலவில் அமெரிக்காவில் கம்ப்யூட்டர் சயின்ஸ், இன்ஜினியரிங் உள்ளிட்ட STEM படிப்புகளைத் தேர்வு செய்யும் இந்திய மாணவர்களுக்கு, படிப்புக்குப் பிறகு கிடைக்கும் வேலை வாய்ப்பைத் தொடர்வது குறித்து புதிய கணக்கீடு தேவைப்படலாம்.

அதே நேரத்தில், இந்த கட்டணம் இன்னும் அமலுக்கு வரவில்லை. இது தற்போது முன்மொழிவாக மட்டுமே உள்ளது. பொதுமக்கள் கருத்து தெரிவிக்கும் காலத்துக்குப் பிறகே இறுதி முடிவு எடுக்கப்படும். மேலும், உயர்கல்வி மற்றும் தொழில்துறை அமைப்புகளின் எதிர்ப்பைத் தொடர்ந்து இந்த விதி சட்டரீதியான சவால்களையும் சந்திக்கக்கூடும்.

இதனால் “அமெரிக்காவில் படித்து வேலை பார்க்க இனி ரூ.1 கோடி கட்ட வேண்டுமா?” என்ற அச்சம் உருவாகியுள்ள நிலையில், இப்போதைக்கு அது கட்டாய விதியாக மாறவில்லை என்பதே முக்கியமான உண்மை.

இதையும் படிங்க: உலக அரசியலில் பரபரப்பு... திடீரென அமெரிக்க அதிபர் டிரம்பிற்கு போன் போட்ட பிரதமர் மோடி... என்ன நடந்தது?