அமெரிக்க மத்திய வங்கி (ஃபெடரல் ரிசர்வ்) மூன்று ஆண்டுகளுக்குப் பிறகு முதன்முறையாக அடிப்படை வட்டி விகிதத்தை உயர்த்தியுள்ளது. செப்டம்பர் 16, 2026 அன்று நடைபெற்ற கூட்டத்தில், ஃபெடரல் ஓப்பன் மார்க்கெட் கமிட்டி (FOMC) ஒருமனதாக 25 அடிப்படை புள்ளிகள் (0.25 சதவீதம்) உயர்வுக்கு ஒப்புதல் அளித்தது. இதனால் ஃபெடரல் ஃபண்ட்ஸ் வட்டி விகித இலக்கு வரம்பு 3.50-3.75 சதவீதத்திலிருந்து 3.75-4.00 சதவீதமாக உயர்ந்துள்ளது. 

இது 2023 ஜூலைக்குப் பிறகு முதல் உயர்வாகும். பணவீக்கம் தொடர்ந்து இலக்கான 2 சதவீதத்தை விட உயர்ந்த நிலையில் இருப்பதால் இந்த நடவடிக்கை எடுக்கப்பட்டதாக மத்திய வங்கி தெரிவித்துள்ளது. புதிய தலைவர் கெவின் வார்ஷ் தலைமையில் நடைபெற்ற இந்தக் கூட்டத்தில், பொருளாதார செயல்பாடு உறுதியாக வளர்ந்து வருவதாகவும், உள்நாட்டு செலவினங்கள் மற்றும் முதலீடுகள் வலுவாக இருப்பதாகவும் குறிப்பிடப்பட்டது. 

ஆனால் புவிசார் அரசியல் பிரச்சினைகள், எண்ணெய் விலை உயர்வு மற்றும் பிற காரணிகளால் பணவீக்கம் உயர்ந்த நிலையில் இருப்பதால், விரைவில் 2 சதவீத இலக்கை அடைய இந்த உயர்வு உதவும் என்று விளக்கமளிக்கப்பட்டது. பல உறுப்பினர்கள் இந்த ஆண்டு இன்னும் ஒரு உயர்வு தேவைப்படலாம் என கணித்துள்ளனர். இந்த முடிவுக்கு அதிபர் டொனால்ட் டிரம்ப் உடனடியாக கடும் எதிர்ப்பைத் தெரிவித்துள்ளார். 

இதையும் படிங்க: “எரியுதுடி மாலா...” - ஈரானுக்கு இந்தியாவில் ரத்ன கம்பள வரவேற்பு... உச்சக்கட்ட வயிற்றெரிச்சலில் டிரம்ப்...!

அவர் தனது அறிக்கையில், “அமெரிக்காவில் முதலீடுகள் பெருகி வருகின்றன, பொருளாதாரம் சிறப்பாக வளர்ந்து வருகிறது. இத்தகைய சூழலில் வட்டி விகிதம் 1 சதவீதம் அல்லது அதற்கும் குறைவாக இருக்க வேண்டும். மத்திய வங்கி உடனடியாக இந்த உயர்வை கைவிட்டு, விரைவாக வட்டி விகிதங்களைக் குறைக்க வேண்டும்” என்று வலியுறுத்தியுள்ளார். அதிபரின் விருப்பத்திற்கு மாறாக எடுக்கப்பட்ட இந்த முடிவு உலகப் பொருளாதார வட்டாரங்களில் பெரும் பரபரப்பை ஏற்படுத்தியுள்ளது. 

வார்ஷ் டிரம்ப் நியமனம் செய்தவர் என்பதால் இந்த முரண்பாடு கூடுதல் கவனத்தை ஈர்த்துள்ளது.வட்டி விகித உயர்வு காரணமாக சர்வதேச முதலீட்டாளர்கள் ஆபத்து குறைந்த அமெரிக்க அரசுப் பத்திரங்களில் அதிக முதலீடு செய்ய வாய்ப்புள்ளது. இதனால் தங்கம் போன்ற பாதுகாப்பான முதலீடுகளின் மீதான ஆர்வம் குறையக்கூடும். பொருளாதார நிபுணர்கள், இதன் விளைவாக சர்வதேச சந்தையில் தங்க விலை குறைய வாய்ப்புள்ளதாகக் கணித்துள்ளனர். 

அதே நேரத்தில், கடன் வாங்குவதற்கான செலவு அதிகரிப்பதால் வீட்டுக் கடன், வாகனக் கடன் உள்ளிட்டவற்றின் விலை உயரக்கூடும் என்ற எச்சரிக்கையும் எழுந்துள்ளது.இந்த நடவடிக்கை அமெரிக்கப் பொருளாதாரத்தை நிலைப்படுத்துவதற்கும் பணவீக்கத்தைக் கட்டுப்படுத்துவதற்கும் எடுக்கப்பட்ட முக்கியமான முயற்சியாகக் கருதப்படுகிறது. எனினும், அரசியல் அழுத்தத்திற்கும் மத்திய வங்கியின் சுதந்திரத்திற்கும் இடையிலான மோதல் தொடர்ந்து விவாதத்திற்கு உள்ளாகி வருகிறது.

இதையும் படிங்க: ஈரானின் அதிரடி தாக்குதல்.. நிலைகுலைந்த அமெரிக்க போர் விமானங்கள்! டிரம்பிற்கு அதிர்ச்சி..!!