தமிழகத்தில் தனியார் பள்ளிகளுக்கு அரசு அங்கீகாரம் மற்றும் பல்வேறு அனுமதிகளைப் பெற்றுத் தருவதாகக் கூறி பெரும் தொகையை வசூலித்து ஏமாற்றியதாகக் குற்றம்சாட்டப்பட்ட திமுக பிரமுகர் பி.டி. அரசகுமார் மீதான குண்டர் தடுப்புச் சட்டம் சமீபத்தில் சென்னை உயர்நீதிமன்றத்தால் ரத்து செய்யப்பட்டது. இந்த நிகழ்வு பள்ளி நிர்வாகங்களிடையே பெரும் அதிர்வலையை ஏற்படுத்தியதுடன், அரசியல் செல்வாக்கைப் பயன்படுத்தி நடைபெற்றதாகக் கூறப்படும் மோசடி குறித்தும் விவாதங்களைத் தூண்டியது.

சென்னை சாலிகிராமத்தைச் சேர்ந்த 59 வயதான பி.டி. அரசகுமார், தமிழ்நாடு தனியார் பள்ளிகள் சங்கம் என்ற பெயரில் பதிவு செய்யப்படாத ஒரு அமைப்பை நடத்தி வந்தார். அவர் திமுகவின் செய்தித் தொடர்பு குழு துணைத் தலைவராகவும் இருந்தார். தனக்கு உள்ள அரசியல் தொடர்புகளையும் அதிகார வட்டாரங்களுடனான நெருக்கத்தையும் பயன்படுத்தி, தனியார் பள்ளிகளுக்கு நிரந்தர அங்கீகாரம், பள்ளித் தரம் உயர்த்துதல், சிஎம்டிஏ மற்றும் டிடிசிபி அனுமதிகள், கட்டிடத் திட்ட ஒப்புதல் உள்ளிட்ட சட்டப்பூர்வ அனுமதிகளை எளிதில் பெற்றுத் தருவதாக உறுதியளித்தார்.

இதை நம்பிய தமிழகம் முழுவதும் உள்ள பல தனியார் பள்ளி நிர்வாகிகள் அவருக்குப் பணம் கொடுத்தனர். ஆனால் உறுதியளித்தபடி எந்த அனுமதியும் பெற்றுத் தராததோடு, பெற்ற பணத்தையும் திருப்பித் தராமல் சுமார் நூறு கோடி ரூபாய் வரை மோசடி செய்ததாகக் குற்றச்சாட்டு எழுந்தது. இந்த விவகாரம் வெளிச்சத்திற்கு வந்தது தனியார் பள்ளிகள் சங்கங்களின் கூட்டமைப்பு செயலாளர் இளங்கோவன் அளித்த புகாரின் அடிப்படையில். அவர் சென்னை பெருநகரக் காவல் ஆணையரிடம் புகார் அளித்தார். அதில் கடந்த இரண்டு ஆண்டுகளாகப் பல பள்ளிகள் அங்கீகாரம் மற்றும் அனுமதி பெறுவதில் சிரமப்பட்டதாகவும், அரசகுமார் தனது செல்வாக்கைக் காட்டிப் பணம் வசூலித்ததாகவும் குறிப்பிடப்பட்டிருந்தது. இதைத் தொடர்ந்து சென்னை மத்திய குற்றப்பிரிவு காவல்துறையினர் வழக்குப் பதிவு செய்தனர். ஜூன் 27 அன்று அரசகுமார் தனது இல்லத்தில் கைது செய்யப்பட்டார்.

இதையும் படிங்க: “ஆபாசமாக பேசுவது திமுகவின் மரபணுவில் உள்ளது” - உதயநிதி பேச்சுக்கு அமைச்சர் மரிய வில்சன் பதிலடி!!

விசாரணையில் பல பள்ளிகளிடமிருந்து கூடுதல் புகார்கள் வந்து குவிந்தன. ஐம்பதுக்கும் மேற்பட்ட பள்ளிகள் புகார் அளித்ததாகவும், அவற்றில் மட்டும் பல கோடி ரூபாய் மோசடி செய்யப்பட்டதாகவும் தெரியவந்தது. டிஜிட்டல் பரிவர்த்தனைகள் மூலம் பணம் பெறப்பட்டதும், பல வங்கிக் கணக்குகள் முடக்கப்பட்டதும் விசாரணையில் வெளிப்பட்டன.கைதுக்குப் பிறகு அரசகுமார் நீதிமன்றக் காவலில் அடைக்கப்பட்டார். தொடர்ந்து ஜூலை மாதம் சென்னை காவல் ஆணையர் உத்தரவின் பேரில் அவருக்கு எதிராகக் குண்டர் தடுப்புச் சட்டம் பாய்ந்தது. பொது அமைதிக்கு ஆபத்து ஏற்படுத்தும் வகையில் தொடர்ந்து குற்றச் செயல்களில் ஈடுபடுபவர்களைத் தடுக்கும் நோக்கில் இந்தச் சட்டம் பயன்படுத்தப்பட்டதாகக் காவல்துறை தரப்பில் கூறப்பட்டது.

ஆனால் அவரது மனைவி கோகிலா இந்தத் தடுப்புக் காவல் உத்தரவை எதிர்த்துச் சென்னை உயர்நீதிமன்றத்தில் ஆட்கொணர்வு மனு தாக்கல் செய்தார். மனுவில், இது சாதாரண பண மோசடி வழக்கு என்றும், பொது அமைதிக்கு எந்த அச்சுறுத்தலும் ஏற்படவில்லை என்றும், குண்டர் சட்டம் தவறாகப் பயன்படுத்தப்பட்டுள்ளது என்றும் வாதிடப்பட்டது.

மேலும், புகாரளித்தவர் தான் பணம் வாங்கியதாகக் கூறப்படுவதால் அந்தப் புகாரையே ஏற்க முடியாது என்றும் குறிப்பிடப்பட்டது.நீதிபதிகள் என். சதீஷ்குமார் மற்றும் கே. ராஜசேகர் அடங்கிய அமர்வு இந்த மனுவை விசாரித்தது. மனுதாரர் தரப்பில் ஆஜரான வழக்கறிஞர், தொடர் குற்றங்களில் ஈடுபடுபவர்களை மட்டுமே குண்டர் சட்டத்தின் கீழ் அடைக்க முடியும் என்ற விதியைச் சுட்டிக்காட்டினார். அரசுத் தரப்பு வாதங்களையும் கேட்ட நீதிபதிகள், இறுதியில் அரசகுமார் மீது போடப்பட்ட குண்டர் தடுப்புச் சட்ட உத்தரவை ரத்து செய்து தீர்ப்பளித்தனர். 

இதையும் படிங்க: "ஒரே ஓட்டு"..! அரசியலை உலுக்கிய சர்ச்சை..! பெரியகருப்பன் தொடர்ந்த வழக்கு தள்ளுபடி..!!