குஜராத் மாநிலம் சூரத் மாவட்டத்தில் தடுப்பூசி செலுத்தப்பட்ட குழந்தைகளுக்கு பாராசிட்டமாலுக்கு பதிலாக நீரிழிவு நோய்க்கு பயன்படுத்தப்படும் மருந்து வழங்கப்பட்ட சம்பவம் அதிர்ச்சியை ஏற்படுத்தியுள்ளது. தவறான மருந்தை உட்கொண்ட 5 குழந்தைகளின் உடல்நிலை பாதிக்கப்பட்டதை தொடர்ந்து அவர்கள் மருத்துவமனையில் ICU மற்றும் PICU பிரிவுகளில் அனுமதிக்கப்பட்டனர். தற்போது குழந்தைகளின் உடல்நிலை சீராக இருப்பதாக சுகாதாரத்துறை அதிகாரிகள் தெரிவித்துள்ளனர்.

சூரத் மாவட்டம் பல்சானா தாலுகாவில் உள்ள கனவ் ஆரம்ப சுகாதார நிலையத்தின் கீழ் செயல்படும் பல்சானா-01 துணை சுகாதார மையத்தில் கடந்த செப்டம்பர் 23-ம் தேதி ‘மம்தா திவாஸ்’ தடுப்பூசி முகாம் நடைபெற்றது. இதில் மொத்தம் 7 குழந்தைகளுக்கு தடுப்பூசி செலுத்தப்பட்டது.

பொதுவாக குழந்தைகளுக்கு தடுப்பூசி செலுத்திய பிறகு காய்ச்சல் அல்லது உடல்வலி ஏற்பட்டால் பயன்படுத்துவதற்காக பாராசிட்டமால் வழங்கப்படுவது வழக்கம். ஆனால், இந்த முகாமில் 5 குழந்தைகளுக்கு பாராசிட்டமாலுக்கு பதிலாக கிளிமெபிரைடு 2 மி.கி. என்ற நீரிழிவு நோய்க்கான மருந்து தவறுதலாக வழங்கப்பட்டதாக அதிகாரிகள் தெரிவித்துள்ளனர்.

இதையும் படிங்க: கேரளாவில் ஒரு வயது குழந்தையின் உடலுக்குள் கண்டெடுக்கப்பட்ட ஊசி! ஸ்கேனில் வெளியான அதிர்ச்சி!

தவறான மருந்து வழங்கப்பட்டதை தொடர்ந்து குழந்தைகளின் உடல்நிலையில் பாதிப்பு ஏற்பட்டதாக கூறப்படுகிறது.

இதையடுத்து செப்டம்பர் 24-ம் தேதி 5 குழந்தைகளும் தீவிர சிகிச்சை பிரிவுகளில் அனுமதிக்கப்பட்டனர். பாதிக்கப்பட்ட குழந்தைகளில் சுமார் 3½ மாதம் மற்றும் ஒரு வயது குழந்தைகளும் உள்ளதாக குஜராத் சுகாதாரத்துறை அமைச்சர் பிரபுல் பன்ஷேரியா தெரிவித்துள்ளார்.

சம்பவம் தொடர்பாக ஆரம்பக்கட்ட விசாரணை நடத்தப்பட்ட நிலையில், பணியில் இருந்த பெண் சுகாதாரப் பணியாளர் இந்துபென் ரத்திலால் சௌத்ரி உடனடியாக இடைநீக்கம் செய்யப்பட்டுள்ளார். அவருக்கு எதிராக துறை ரீதியான விசாரணையும் தொடங்கப்பட்டுள்ளது.

இந்த சம்பவம் குறித்து சுகாதாரத்துறை அதிகாரிகள் மருத்துவமனைகளுக்குச் சென்று குழந்தைகளுக்கு வழங்கப்படும் சிகிச்சையை ஆய்வு செய்தனர். குழந்தைகள் தற்போது மருத்துவர்களின் கண்காணிப்பில் இருப்பதாக தெரிவிக்கப்பட்டுள்ளது.

சுகாதாரத்துறை அமைச்சர், விசாரணை அறிக்கை கிடைத்த பிறகு அடுத்தகட்ட நடவடிக்கை எடுக்கப்படும் என்றும், அரசு விதிகளின்படி இறுதி முடிவு எடுக்கப்படும் என்றும் தெரிவித்துள்ளார். சிறிய குழந்தைகளுக்கு வழங்க வேண்டிய மருந்தில் ஏற்பட்ட இந்த தவறு குறித்து முழுமையான விசாரணை நடைபெற்று வருகிறது.

இதையும் படிங்க: LPU-வில் வெடித்த வன்முறை: 10 நாட்களுக்கு வகுப்புகள் ரத்து; பாலியல் வன்கொடுமை புகாரில் விசாரணை தீவிரம்!!