தென்காசி மாவட்டம் கடையநல்லூர் அருகே கள்ளக்காதல் விவகாரத்தில் கணவன் கொலை செய்யப்பட்டதாக கூறப்படும் சம்பவம் அதிர்ச்சியை ஏற்படுத்தியுள்ளது. பண்பொழி அருகே தோட்டத்தில் பலத்த காயங்களுடன் சடலமாக மீட்கப்பட்ட நபர் குறித்து நடத்தப்பட்ட விசாரணையில், அவரது மனைவியும் மற்றொரு நபரும் கைது செய்யப்பட்டுள்ளனர்.

கடந்த செப்டம்பர் 10-ம் தேதி பண்பொழி அருகே உள்ள தோட்டத்தில் ஆண் ஒருவர் உயிரிழந்த நிலையில் கிடந்தார். தகவலறிந்து சென்ற இலத்தூர் போலீசார் சடலத்தை கைப்பற்றி விசாரணையை தொடங்கினர். உயிரிழந்தவர் யார், அவரை கொலை செய்தது யார் என்பது குறித்து தனிப்படை போலீசார் தீவிரமாக விசாரித்தனர்.

கொலை நடந்த பகுதியில் இருந்து பண்பொழி–தென்காசி சாலையில் பொருத்தப்பட்டிருந்த 26 கண்காணிப்பு கேமராக்களின் காட்சிகளை போலீசார் ஆய்வு செய்ததாக கூறப்படுகிறது.

இதையும் படிங்க: தென்காசியில் பயங்கரம்! பாலத்தின் தடுப்புச்சுவரை உடைத்து ஆற்றில் தலைகுப்புற கவிழ்ந்த அரசு பேருந்து! 21 பேர் காயம்!

அதில் சந்தேகத்திற்கிடமாக இரண்டு முறை சென்று வந்த காரின் பதிவு எண்ணை வைத்து விசாரணை நடத்தப்பட்டது. அந்த கார் விருதுநகர் மாவட்டம் ஸ்ரீவில்லிபுத்தூரைச் சேர்ந்த வாடகை கார் என்பது தெரியவந்தது.

தொடர்ந்து நடத்தப்பட்ட விசாரணையில், கொலை செய்யப்பட்டவர் ஸ்ரீவில்லிபுத்தூரில் ரோலிங் ஷட்டர் தயாரிக்கும் தொழில் செய்து வந்த அப்துல் ரகுமான், 50, என்பது தெரியவந்தது. அவரை வாடகை காரில் அழைத்துச் சென்றதாக கூறப்படும் தென்காசியைச் சேர்ந்த இசை இந்திரகுமாரிடம் போலீசார் விசாரணை நடத்தினர்.

போலீஸ் விசாரணையில், அப்துல் ரகுமான் குடும்பத்துடன் ஸ்ரீவில்லிபுத்தூரில் உள்ள ஒரு ஓட்டலுக்கு அடிக்கடி சென்றபோது, அங்கு பணியாற்றிய இந்திரகுமாருக்கும் ரகுமானின் மனைவி அம்சா நிஷாவுக்கும் பழக்கம் ஏற்பட்டதாகவும், பின்னர் அது காதல் உறவாக மாறியதாகவும் தெரியவந்ததாக போலீசார் தெரிவித்துள்ளனர்.

ரகுமான் வேலைக்குச் செல்லாமல் வீட்டில் இருந்ததால் தங்களது உறவுக்கு இடையூறாக இருப்பதாக கருதி அவரை கொலை செய்ய திட்டமிட்டதாகவும் விசாரணையில் தெரியவந்ததாக கூறப்படுகிறது.

இதையடுத்து, ரோலிங் ஷட்டர் அமைப்பதற்காக அளவெடுக்க வேண்டும் எனக்கூறி ரகுமானை தோட்டத்துக்கு அழைத்துச் சென்று, இரும்புக் கம்பியால் தாக்கி கொலை செய்ததாக இந்திரகுமார் மீது குற்றச்சாட்டு எழுந்துள்ளது.

இந்த வழக்கில் இந்திரகுமார் மற்றும் அம்சா நிஷா ஆகிய இருவரையும் போலீசார் கைது செய்தனர். பின்னர் நீதிமன்றத்தில் ஆஜர்படுத்தப்பட்ட அவர்கள் சிறையில் அடைக்கப்பட்டனர். சம்பவம் தொடர்பாக போலீசார் தொடர்ந்து விசாரணை நடத்தி வருகின்றனர்.

இதையும் படிங்க: கறி விருந்துக்கு அழைத்து கொலை! மனைவியுடன் நெருக்கம் காட்டிய நண்பனின் கதையை முடித்த கணவன்!