திமுக ஆட்சிக் காலத்தில் நாட்டின் பிற மாநிலங்களையெல்லாம் விஞ்சி இரட்டை இலக்க வளர்ச்சியோடு சரக்கு மற்றும் சேவை வரி (ஜிஎஸ்டி) வசூலில் இமாலயச் சாதனை படைத்த தமிழ்நாட்டின் நிதி நிலைமை, தற்போதைய தவெக ஆட்சியில் தொடர்ந்து மூன்று மாதங்களாகக் குறைந்து மைனஸ் 5 சதவீதம் வரை அதலபாதாளச் சரிவைச் சந்தித்திருப்பது மிகுந்த வேதனையளிக்கிறது என்று முன்னாள் நிதியமைச்சரும் திமுகவின் மூத்த தலைவருமான தங்கம் தென்னரசு மிகக் காரசாரமாகக் குற்றம்சாட்டியுள்ளார்.

தமிழகத்தில் தொழில் முதலீடுகள், உற்பத்தித் துறை மற்றும் ஜிஎஸ்டி வரி வசூல் நிலவரங்கள் பெரும் வீழ்ச்சியைக் கண்டுள்ளதாக வெளியாகியுள்ள தரவுகள் அரசியல் மற்றும் பொருளாதார வட்டாரத்தில் பெரும் அதிர்வலைகளை ஏற்படுத்தியுள்ளன. இது தொடர்பாகத் தனது அதிகாரப்பூர்வ எக்ஸ் சமூக வலைதளப் பக்கத்தில் பதிவிட்டுள்ள தங்கம் தென்னரசு, முதலமைச்சர் விஜய் தலைமையிலான தவெக அரசின் திறமையற்ற நிதி மேலாண்மையையும், பொருளாதார முடக்கத்தையும் மிகக் காட்டமாக விமர்சித்துள்ளார்.

திமுக ஆட்சிக் காலத்தில் பிற மாநிலங்கள் வியந்து பார்க்கும் அளவிற்குத் தொழில் துறையிலும் நிதி நிர்வாகத்திலும் தமிழ்நாடு தலைநிமிர்ந்து நின்றது; இரட்டை இலக்க ஜிஎஸ்டி வரி வசூல் வளர்ச்சியோடு தேசத்திற்கே வழிகாட்டியாகத் திகழ்ந்த தமிழ்நாட்டின் நிதி நிலைமை, இன்றைக்குத் தொடர்ச்சியாக மூன்று மாதங்களாகச் சரிவைச் சந்தித்து மைனஸ் 5 சதவீதம் (-5%) வரை படுவீழ்ச்சி அடைந்திருப்பது தாங்க முடியாத வேதனையைத் தருகிறது என்று அவர் சுட்டிக்காட்டியுள்ளார்.

இதையும் படிங்க: "சிவன் சொத்து குல நாசம்"..! எத்தனை கோவில் ஏறினாலும் பாவம் தீராது... தவெக விமர்சனம்..!

நாட்டின் ஒட்டுமொத்தப் பொருளாதாரச் சூழலோடு தமிழகத்தை ஒப்பிட்டுப் பேசிய அவர், "இந்தியாவின் பிற மாநிலங்கள் அனைத்தும் தொடர்ச்சியான புதிய தொழில் முதலீடுகளையும், நிலையான தொழில் வளர்ச்சியையும் மிக நேர்த்தியாக எட்டிப் பிடித்து வரும் சூழலில், தமிழ்நாட்டில் மட்டும் உற்பத்தித் துறை அடியோடு முடங்கிக் கிடப்பதும், பொதுமக்களின் வாங்கும் திறனும் நுகர்வும் நாளுக்கு நாள் சுருங்கி வருவதும் ஆளும் அரசின் அப்பட்டமான நிர்வாகக் கோளாற்றின் நேரடி வெளிப்பாடே ஆகும்" என்று விளாசினார்.

மேலும், தொழில் முதலீடுகளையும், மாநிலத்தின் நிதி மேலாண்மையையும் மிகச் சிறந்த தொலைநோக்குப் பார்வையோடு கையாண்ட தலைவர் மு.க.ஸ்டாலின் தலைமையிலான திராவிட மாடல் ஆட்சியின் முறையான வழிகாட்டுதல் இல்லாத காரணத்தினாலேயே, தமிழ்நாட்டின் பொருளாதாரம் இன்றைக்குத் திசைதெரியாமல் அடியோடு முடங்கிக் கிடக்கிறது எனக் குற்றம்சாட்டினார்.

இறுதியாக, மாநிலத்தின் உற்பத்தித் திறனையும் நிதி ஆதாரங்களையும் பாழ்படுத்தி, பொருளாதாரத்தைச் சீரழித்துள்ள இந்த மாபெரும் நிர்வாகக் கோளாற்றுக்கும் சீர்கேட்டிற்கும் தமிழகத்தை ஆளும் அரசு என்ன பதில் சொல்லப் போகிறது? என்று தங்கம் தென்னரசு அனல் பறக்கும் கேள்வியை எழுப்பியுள்ளார்.

இதையும் படிங்க: வாய்க்கு வந்ததை பேசக் கூடாது... இதோடு நிறுத்திக்கணும்..! அமைச்சர் ஆதவிற்கு பிரேமலதா வார்னிங்..!!