தலைநகர் டெல்லியில் உள்ள ஜந்தர் மந்தர் பகுதியில் தேசியக் கொடியுடன் போராட்டம் நடத்த முயன்ற விவகாரத்தில் கைது செய்யப்பட்டு நீதிமன்றக் காவலில் வைக்கப்பட்டிருந்த கரப்பான்பூச்சி ஜனதா கட்சியின் (CJP) முக்கிய நிர்வாகிகளான சௌரவ் தாஸ் மற்றும் அசுதோஷ் ரங்கா ஆகிய இருவரையும் உடனடியாக விடுவிக்க டெல்லி சிறப்புச் செயல்முறை நடுவர் (SEM) நீதிமன்றம் உத்தரவிட்டுள்ளது.

டெல்லி ஜந்தர் மந்தர் பகுதி அதிகாரப்பூர்வப் போராட்டக் களத்திலிருந்து விடுவிக்கப்பட்டதைத் தொடர்ந்து, அங்கு விதிமுறைகளை மீறி அத்துமீறி நுழைந்து அமைதிக்குப் பங்கம் விளைவிக்கும் வகையில் செயல்பட்டதாகக் கூறி, சிஜேபி நிர்வாகிகள் சௌரவ் தாஸ் மற்றும் அசுதோஷ் ரங்கா உள்ளிட்டோரை டெல்லி காவல்துறை கைது செய்து முன்னெச்சரிக்கைக் காவலில் அடைத்திருந்தது. 

இக்காவல் உத்தரவை எதிர்த்து அவர்கள் இருவரும் முன்னதாக டெல்லி உயர்நீதிமன்றத்தை அணுகியிருந்த நிலையில், முறையான மாற்று சட்ட நிவாரணங்கள் கீழமை நீதிமன்றத்தில் நிலுவையில் இருப்பதைச் சுட்டிக்காட்டிய உயர்நீதிமன்றம் பல்வேறு கேள்விகளை எழுப்பியதை அடுத்து, மனுதாரர்கள் தங்களது மனுவைத் திரும்பப் பெற்றனர்.

இதையும் படிங்க: எஸ்பிஐ தரவு கசிவு விவகாரம்: வாடிக்கையாளர்களின் பணம் 100% பாதுகாப்பாக உள்ளது என வங்கி நிர்வாகம் உறுதி!

இதனைத் தொடர்ந்து, இந்த வழக்கு இன்று பிற்பகல் டெல்லி சிறப்புச் செயல்முறை நடுவர் நீதிமன்றத்தில் விசாரணைக்கு எடுத்துக்கொள்ளப்பட்டது. அப்போது இருதரப்பு வாதங்களையும் கேட்டறிந்த நடுவர், அவர்கள் இருவரையும் முன்னெச்சரிக்கைக் காவலில் இருந்து விடுவிக்க உத்தரவிட்டார். நீதிமன்றத்தின் இந்த உத்தரவைத் தொடர்ந்து, பல நாட்களாகக் காவலில் வைக்கப்பட்டிருந்த சிஜேபி நிர்வாகிகள் இருவரும் விடுவிக்கப்பட்டுள்ளனர்.

இதையும் படிங்க: கைதான விவசாயிகளை உடனே விடுதலை செய்க: தமிழ்நாடு அரசுக்கு இந்திய கம்யூனிஸ்ட் கட்சி வலியுறுத்தல்!