சிவகங்கையில் ரவுடி சுள்ளான் மதன் படுகொலை செய்யப்பட்ட சம்பவத்தைத் தொடர்ந்து, பொது அமைதிக்குக் குந்தகம் விளைவிக்கும் வகையிலும் மக்களிடையே பதற்றத்தைத் தூண்டும் வகையிலும் சமூக வலைதளங்களில் பதிவுகள் மற்றும் காணொளிகளைப் பதிவேற்றிய 41 இன்ஸ்டாகிராம் பக்கங்கள் மற்றும் 3 பேஸ்புக் பக்கங்கள் என மொத்தம் 44 கணக்குகளைச் சிவகங்கை மாவட்ட காவல்துறை உடனடியாக முடக்கியுள்ளது; மேலும் இச்சம்பவம் தொடர்பாக 6 முதல் தகவல் அறிக்கைகள் (FIR) பதிவு செய்யப்பட்டு குற்றவாளிகளைத் தேடும் பணி முடுக்கிவிடப்பட்டுள்ளது.

சிவகங்கை பகுதியைச் சேர்ந்த பிரபல ரவுடியான சுள்ளான் மதன் என்பவர் சமீபத்தில் முன்விரோதம் காரணமாக மர்மக் கும்பலால் கொடூரமாக வெட்டிக் கொலை செய்யப்பட்டார். இக்கொலைச் சம்பவத்தைத் தொடர்ந்து, சமூக விரோதிகள் சிலர் சமூக ஊடகங்களான இன்ஸ்டாகிராம் மற்றும் பேஸ்புக் பக்கங்களில் பழிவாங்கும் நோக்கத்துடனும், இரு தரப்பினரிடையே வன்முறையைத் தூண்டும் வகையிலும் அச்சுறுத்தும் ரீல்ஸ்கள், ஆடியோக்கள் மற்றும் பதிவுகளைத் தொடர்ந்து பகிர்ந்து வந்தனர்.

இது மாவட்டத்தின் சட்டம் ஒழுங்கு சூழலுக்கு மாபெரும் அச்சுறுத்தலாக மாறிய நிலையில், சிவகங்கை மாவட்டக் காவல் கண்காணிப்பாளர் (SP) அபிஷேக் குப்தா உத்தரவின் பேரில் மாவட்ட சைபர் கிரைம் காவல்துறையினர் தீவிரக் கண்காணிப்புப் பணியில் இறங்கினர்.

இதையும் படிங்க: இன்ஸ்டா ரீல்ஸில் ரவுடியிசம் காட்டும் இளைஞர்கள்! நிஜ வாழ்க்கையில் தொடரும் பழிக்குப்பழி கொலைகள்?

சைபர் கிரைம் போலீசாரின் தீவிர ஆய்வில், மோதல்களைத் தூண்டும் வகையில் பதிவிட்ட பக்கங்கள் கண்டறியப்பட்டு உடனடியாக எடுக்கப்பட்ட நடவடிக்கைகள்:

44 சமூக ஊடகக் கணக்குகள் முடக்கம்: வன்முறை மற்றும் பதற்றத்தை ஏற்படுத்தும் வகையில் செயல்பட்டு வந்த 41 இன்ஸ்டாகிராம் (Instagram) கணக்குகள் மற்றும் 3 பேஸ்புக் (Facebook) பக்கங்கள் என மொத்தம் 44 கணக்குகள் சட்டப்படியான நடைமுறைகளைப் பின்பற்றி முழுமையாக முடக்கப்பட்டுள்ளன (Blocked).

6 எஃப்.ஐ.ஆர் பதிவு: பொது அமைதியைச் சீர்குலைக்க முயன்றது, இரு பிரிவினரிடையே பகையை வளர்த்தது மற்றும் மிரட்டல் விடுத்தது உள்ளிட்ட பல்வேறு குற்றப்பிரிவுகளின் கீழ் இதுவரை 6 தனித்தனி வழக்குகள் (FIRs) பதிவு செய்யப்பட்டுள்ளன. இக்கணக்குகளை இயக்கி வந்த நபர்களைக் கண்டறிந்து அவர்களைக் கைது செய்யத் தனிப்படை போலீசார் களமிறங்கியுள்ளனர்.

மாவட்ட எஸ்.பி. அபிஷேக் குப்தா விடுத்த பகிரங்க எச்சரிக்கை விடுத்துள்ளார். இவ்விவகாரம் தொடர்பாகச் சிவகங்கை மாவட்டக் காவல் கண்காணிப்பாளர் அபிஷேக் குப்தா வெளியிட்டுள்ள கடுமையான எச்சரிக்கையில், "சமூக வலைதளங்களை தவறாகப் பயன்படுத்தி பொது அமைதிக்கும் சட்டம் ஒழுங்கிற்கும் பங்கம் விளைவிக்கும் வகையிலோ, கொலைச் சம்பவங்களை நியாயப்படுத்தியோ, பழிவாங்கும் உணர்வைத் தூண்டும் வகையிலோ பதிவுகள், ரீல்ஸ்கள் அல்லது கருத்துகளைப் பதிவிடுபவர்கள் எக்காரணம் கொண்டும் தப்ப முடியாது. அவர்கள் உடனடியாகக் கைது செய்யப்பட்டு குண்டர் சட்டம் உள்ளிட்ட கடுமையான சட்ட நடவடிக்கைகளுக்கு ஆளாவார்கள். சமூக வலைதளங்களில் பதிவிடுவதைக் காவல் துறையின் சைபர் கிரைம் பிரிவு 24 மணி நேரமும் தீவிரமாகக் கண்காணித்து வருகிறது" என்று திட்டவட்டமாகத் தெரிவித்துள்ளார்.

ரவுடி கொலை விவகாரத்தில் வன்முறை பரவாமல் தடுக்க சமூக ஊடகக் கணக்குகளை முடக்கி, 6 வழக்குகளைப் பதிவு செய்து சிவகங்கை மாவட்ட காவல்துறை எடுத்துள்ள இந்த மின்னல் வேக நடவடிக்கை குற்றப் பின்னணி கொண்ட நபர்கள் மத்தியில் கலக்கத்தை ஏற்படுத்தியுள்ளது.

இதையும் படிங்க: தேவர் ஜெயந்தி விழா.. அக்.31 வரை சிவகங்கையில் 12 நாட்களுக்கு 163 தடை உத்தரவு அமல்!