தமிழக அரசின் அதிகார பீடமான சென்னை தலைமைச் செயலகத்திலேயே மின்தடை ஏற்பட்டு அமைச்சர்களின் அறைகள் இருளில் மூழ்கியிருப்பது மிகுந்த கவலையளிக்கிறது என்றும், தமிழ்நாடு முழுவதும் நீடிக்கும் அறிவிக்கப்படாத மின்வெட்டுப் பிரச்சனைக்குப் போர்க்கால அடிப்படையில் தமிழக அரசு உடனடித் தீர்வு காண வேண்டும் என்றும் பாட்டாளி மக்கள் கட்சியின் தலைவர் டாக்டர் அன்புமணி ராமதாஸ் வலியுறுத்தியுள்ளார்.

இன்று காலை சென்னை தலைமைச் செயலகக் கட்டடத்தின் முதல் தளத்தில் திடீரென மின் விநியோகம் தடைபட்டது. இதனால் அமைச்சர்களின் அலுவலக அறைகள் மற்றும் அரசு செயலாளர்களின் அறைகள் மின்சாரமின்றி இருளில் மூழ்கின. அரசு இயந்திரத்தின் மையப் பகுதியிலேயே மின்வெட்டு ஏற்பட்ட காட்சிகள் மற்றும் புகைப்படங்கள் சமூக வலைத்தளங்களில் வெளியாகி பெரும் அதிர்வலையையும் விமர்சனத்தையும் ஏற்படுத்தின. இந்தச் சம்பவத்தைச் சுட்டிக்காட்டி பாமக தலைவர் டாக்டர் அன்புமணி ராமதாஸ் தனது அதிகாரப்பூர்வ எக்ஸ் பக்கத்தில் அறிக்கை ஒன்றை வெளியிட்டுள்ளார்.

அதில், தலைமைச் செயலகத்தின் முதல் தளத்தில் இன்று காலை ஏற்பட்ட மின்தடை காரணமாக அமைச்சர்களின் அலுவலக அறைகள் இருளில் மூழ்கியுள்ளன. இது தொடர்பான காணொலிகள் சமூக வலைத்தளங்களில் வைரலாகப் பரவி வருகின்றன. தமிழ்நாடு முழுவதும் கடுமையான பாதிப்பை ஏற்படுத்தியுள்ள மின்வெட்டு, தமிழக அரசின் அதிகார மையமான தலைமைச் செயலகத்தையும் பாதித்திருப்பது அதிர்ச்சியளிக்கிறது என்று சுட்டிக்காட்டியுள்ளார்.

இதையும் படிங்க: அன்புமணிக்கு விஜய் சர்ப்ரைஸ் கால்..! பிறந்தநாள் வாழ்த்து..! முக்கிய உரையாடல்..!

தமிழகத்தின் மின்சார நிலைமை குறித்து விவரித்த அவர், தமிழ்நாட்டில் அறிவிக்கப்படாத மின்வெட்டு கடந்த ஒரு மாதத்திற்கும் மேலாகத் தொடர்ந்து நீடித்து வருகிறது. மின்வெட்டால் பாதிக்கப்படாத பகுதிகளே இல்லை எனும் அளவிற்குத் தமிழகத்தின் பட்டிதொட்டியெங்கும் மின்வெட்டு நடைமுறைப்படுத்தப்பட்டு வருகிறது. சமீபத்தில் அமைச்சர்கள் பங்கேற்ற பல்வேறு அரசு நிகழ்ச்சிகளிலேயே திடீர் மின்தடை ஏற்பட்ட நிலையில், தற்போது தலைமைச் செயலகம் வரை இந்த அவலம் சென்றிருப்பது மின்சார விநியோகத்தின் நிலைமை எந்தளவுக்கு மோசமடைந்துள்ளது என்பதையே அப்பட்டமாகக் காட்டுகிறது. இந்த அவல நிலைமை உடனடியாகச் சரிசெய்யப்பட வேண்டும் என்று எச்சரித்துள்ளார்.

மின்சாரக் கொள்முதல் குளறுபடிகள் குறித்துக் கேள்வி எழுப்பிய அன்புமணி ராமதாஸ், தமிழ்நாட்டின் மின் தேவைக்கும், மின் விநியோகக் கிடைப்பிற்கும் இடையே பெரும் இடைவெளி காணப்படுவதுதான் இந்தத் தொடர் மின்வெட்டுக்கு முதன்மைக் காரணமாக உள்ளது. இதைச் சமாளிக்கும் வகையில் முதலில் 2,000 மெகாவாட்டும், பின்னர் 4,500 மெகாவாட்டும் மின்சாரம் வெளிச்சந்தையில் கொள்முதல் செய்யப்படுவதாக அரசு தரப்பில் தெரிவிக்கப்பட்டது. இவ்வளவு மின்சாரம் கொள்முதல் செய்யப்பட்ட பிறகும் தமிழகத்தில் மின்வெட்டும் மின்தடையும் தொடர்ந்து நீடிப்பது ஏன்? எனக் கேள்வி எழுப்பினார்.

இறுதியாக, மின்வெட்டு என்பது தொழில்துறை, வணிகம், விவசாயம் மற்றும் பொதுமக்கள் என அனைத்துத் தரப்பினரையும் கடுமையாக முடக்கும் தன்மை கொண்டது. எனவே, தமிழக மக்கள் படும் துயரத்தைப் போக்கும் வகையில், தமிழ்நாட்டில் நிலவி வரும் கடுமையான மின்வெட்டுப் பிரச்சனைக்கு போர்க்கால அடிப்படையில் தமிழக அரசு உடனடி நடவடிக்கை எடுத்து நிரந்தரத் தீர்வு காண வேண்டும் என்று முதலமைச்சர் ச. ஜோசப் விஜய் தலைமையிலான தவெக அரசுக்கு அன்புமணி ராமதாஸ் கோரிக்கை விடுத்துள்ளார்.

இதையும் படிங்க: தவெக கூட்டணியில் பாமக! விசிக வைத்த ‘செக்’! திருமாவளவன் தரப்பின் அதிரடி நிலைப்பாடு!