தமிழகத்தில் இருந்து மாநிலங்களவைக்கு தேர்ந்தெடுக்கப்பட்ட திமுகவின் மாநிலங்களவை எம்பிக்கள் எம்.சண்முகம், முகமது அப்துல்லா, பி.வில்சன், பாமகவின் எம்.பி அன்புமணி ராமதாஸ், அதிமுகவின் எம் பி சந்திரசேகரன், மதிமுகவின் எம்.பி வைகோ ஆகிய 6 பேரின் பதவிக் காலம் ஜூலை 24-ம் தேதியுடன் நிறைவடைகிறது.
இதனையடுத்து தமிழகத்தில் காலியாகவுள்ள ஆறு மாநிலங்களவை பதவிகளுக்கான தேர்தல் வரும் ஜூலை 19-ஆம் தேதி நடைபெறும் என அறிவிக்கப்பட்டிருந்தது. அதனையொட்டி திமுக, அதிமுக உள்ளிட்ட கட்சிகள் தங்கள் கூட்டணி வேட்பாளர்களை அறிவித்திருந்தது. மாநிலங்களவை உறுப்பினர் தேர்தலில் திராவிட முன்னேற்றக் கழகத்தில் சார்பில் போட்டியிடும் நான்கு இடங்களில், மூன்று இடங்கள் திமுக வேட்பாளர்களுக்கும், ஏற்கெனவே செய்துகொண்ட ஒப்பந்தத்தின்படி மக்கள் நீதி மய்யத்துக்கு ஒரு இடமும் ஒதுக்கப்பட்டிருந்தது.
இதையும் படிங்க: ஜூன் 19ல் மாநிலங்களவைத் தேர்தல்.. வேட்புமனு தாக்கல் இன்றுடன் நிறைவு..!
அதன்படி திமுக சார்பில் வில்சன், சல்மா, சிவலிங்கம் மற்றும் மக்கள் நீதி மய்யம் கட்சியின் தலைவர் கமல்ஹாசன் ஆகியோர் போட்டியிடுகின்றனர். அதேபோல் அதிமுக கூட்டணியில் இன்பதுரை, தனபால் என அதிமுக வேட்பாளர்களே போட்டியிடுகின்றனர்.
கடந்த ஜூன் 2ம் தேதி வேட்புமனுத் தாக்கல் தொடங்கிய நிலையில், ஜூன் 6ம் தேதி சென்னை தலைமைச் செயலகத்தில், மாநிலங்களவைத் தேர்தலில் திமுக கூட்டணிக் கட்சிகளின் ஆதரவுடன் போட்டியிடும் மநீம தலைவரும், நடிகருமான கமல்ஹாசன், சட்டமன்ற பேரவை செயலகத்தின் கூடுதல் செயலாளரும், தேர்தல் நடத்தும் அதிகாரியுமான பா.சுப்பிரமணியத்திடம் தமிழக முதல்வர் மு.க.ஸ்டாலின் முன்னிலையில் தனது வேட்புமனுவை தாக்கல் செய்தார். திமுக சார்பில் மூத்த வழக்கறிஞர் வில்சன், சேலம் கிழக்கு மாவட்ட செயலாளர் எஸ்.ஆர்.சிவலிங்கம், கவிஞர் சல்மா ஆகியோரும் தங்களது வேட்புமனுக்களை தாக்கல் செய்தனர்.
இதனையடுத்து அதிமுக மாநிலங்களவை வேட்பாளர்கள் மூத்த வழக்கறிஞர் இன்பதுரை, செங்கல்பட்டு கிழக்கு மாவட்ட அதிமுக அவைத்தலைவர் தனபால் ஆகியோர் சென்னை தலைமை செயலகத்தில் அதிமுக பொதுச்செயலாளர் எடப்பாடி பழனிசாமி முன்னிலையில் வேட்புமனு தாக்கல் செய்தனர்.
தமிழகத்தில் மாநிலங்களவைத் தேர்தலுக்கான வேட்புமனு தாக்கல் நேற்றுடன் நிறைவு பெற்றுள்ளது. திமுக சார்பில் 3 பேர், அதிமுக சார்பில் இரண்டு பேர், மநீம சார்பில் ஒருவர், சுயேச்சைகள் 7 பேர் மனுதாக்கல் செய்திருந்தனர். வேட்புமனு பரிசீலனை (இன்று) 10ம் தேதி நடைபெற உள்ள நிலையில், இறுதி வேட்பாளர் பட்டியல் வரும் 12ம் தேதி மாலை 3 மணிக்கு வெளியிடப்படும். அன்றைய தினமே திமுக, அதிமுக சார்பில் வேட்புமனு தாக்கல் செய்துள்ள 6 பேரும் போட்டியின்றி தேர்வு செய்யப்படுவதாக அதிகாரப்பூர்வமாக அறிவிக்கப்படும்.
ஏற்கனவே அறிவித்தப்படி 19-ந் தேதி தேர்தல் நடைபெறுவதற்கு வாய்ப்பு இல்லை. இந்த எம்.பி. பதவி மூலம் கமல்ஹாசன், டெல்லி அரசியலில் களமிறங்க உள்ளார். ஏற்கனவே திமுகவுக்கு ஆதரவாக குரல் கொடுத்து வரும் கமல்ஹாசன், இனி டெல்லியிலும் முழக்கமிடுவார் என்று அரசியல் வட்டாரங்கள் கூறுகின்றன.
இதையும் படிங்க: ஜூன் 19ல் மாநிலங்களவைத் தேர்தல்.. வேட்புமனு தாக்கல் இன்றுடன் நிறைவு..!