திருப்பதி ஏழுமலையான் கோயிலில் ஆண்டுதோறும் புரட்டாசி மாதத்தில் நடைபெறும் வருடாந்திர பிரம்மோற்சவம், சக்கரத்தாழ்வார் தீர்த்தவாரியுடன் இன்று நிறைவு பெற்றது. ஒன்பது நாட்கள் நீடித்த இந்த பெருவிழா, பக்தர்களின் இதயங்களில் ஆன்மீக உற்சாகத்தை நிறைத்து, மலையின் மீது கோவிந்தா முழக்கங்களை எதிரொலிக்கச் செய்தது.இந்த ஆண்டு அதிக மாசம் காரணமாக இரண்டு பிரம்மோற்சவங்கள் நடைபெறும் நிலையில், முதல் சாலகட்ல பிரம்மோற்சவம் செப்டம்பர் பதினைந்தாம் தேதி கொடியேற்றத்துடன் தொடங்கியது. அன்று மாலை தங்கக் கொடிமரத்தில் கருடக் கொடி ஏற்றப்பட்டு, உற்சவ மூர்த்தியான மலையப்ப சுவாமி பல்வேறு வாகனங்களில் மாடவீதிகளில் உலா வரத் தொடங்கினார்.

பெரிய சேஷ வாஹனம், சின்ன சேஷ வாஹனம், அன்ன வாஹனம், சிம்ம வாஹனம், சூர்யபிரபை, சந்திரபிரபை, ஹனுமந்த வாஹனம், கஜ வாஹனம் உள்ளிட்ட பல்வேறு அலங்காரங்களில் சுவாமி பக்தர்களுக்கு அருள்பாலித்தார். விழாவின் உச்சக்கட்டமாக கருட சேவை நடைபெற்றபோது, ஆயிரக்கணக்கான பக்தர்கள் மாடவீதிகளில் குவிந்து, கருட வாஹனத்தில் எழுந்தருளிய ஏழுமலையானை தரிசித்து பரவசமடைந்தனர். அதைத் தொடர்ந்து தங்கத் தேர் உலாவும், இறுதிக்கு முந்தைய நாள் நடைபெற்ற மாபெரும் தேரோட்டமும் பக்தி வெள்ளத்தை மேலும் பெருக்கின.

நாற்பத்து மூன்று அடி உயரமுள்ள மரத்தேரில் ஸ்ரீதேவி பூதேவி சமேத மலையப்ப சுவாமி எழுந்தருளி, ஆயிரக்கணக்கான பக்தர்கள் தேர் கயிற்றை இழுத்துச் சென்ற காட்சி கண்கொள்ளாக் காட்சியாக அமைந்தது. இரவு அஸ்வ வாஹனத்தில் சுவாமி கல்கி அவதார அலங்காரத்தில் வலம் வந்து, வாகன சேவைகளை முடித்து வைத்தார்.இறுதி நாளான இன்று காலையில் சக்கரத்தாழ்வார் தீர்த்தவாரி விமரிசையாக நடைபெற்றது. அதிகாலையில் பல்லக்கு உற்சவத்துடன் தொடங்கிய நிகழ்வில், ஸ்ரீதேவி, பூதேவி சமேத மலையப்ப சுவாமியும், சுதர்சன சக்கரத்தாழ்வாரும் கோயிலிலிருந்து புறப்பட்டு மாடவீதிகள் வழியாக ஸ்ரீவாரி புஷ்கரணிக்கு எழுந்தருளினர். அங்கு அமைக்கப்பட்ட மண்டபத்தில் திருமஞ்சனம் நடைபெற்றது. பால், தயிர், தேன், இளநீர், மஞ்சள், சந்தனம் உள்ளிட்ட புனிதப் பொருட்களால் அபிஷேகம் செய்யப்பட்டது.

இதையும் படிங்க: ஏழுமலையானே... கோவிந்தா.! திருப்பதியில் தேரோட்டம்.. உணர்ச்சி பெருக்கில் பக்தர்கள்..!!

அதன்பின் அர்ச்சகர்கள் சக்கரத்தாழ்வார் உற்சவ மூர்த்தியை புஷ்கரணியின் புனித நீரில் மூன்று முறை மூழ்கி எடுத்து தீர்த்தவாரி செய்தனர். இந்த சக்கர ஸ்நானம், பிரம்மோற்சவத்தின் ஆன்மீக உச்சமாகக் கருதப்படுகிறது. சக்கரத்தாழ்வாரின் புனித நீரில் மூழ்கியதும், அந்த நீரின் சக்தி நாள் முழுவதும் நீடிக்கும் என்ற நம்பிக்கையில், ஆயிரக்கணக்கான பக்தர்கள் புஷ்கரணியில் இறங்கி புனித நீராடினர். கோவிந்தா கோவிந்தா என்ற முழக்கங்கள் சுற்றுப்புறத்தையே அதிர வைத்தன. பக்தர்கள் இந்த தீர்த்தவாரியை தங்கள் பாவங்களைப் போக்கி, புண்ணியம் பெறும் அரிய வாய்ப்பாகக் கருதினர்.தீர்த்தவாரி முடிந்ததும் உற்சவ மூர்த்திகள் மலர்களால் அலங்கரிக்கப்பட்டு தீபாராதனை காட்டப்பட்டன. மாலையில் கொடிமரத்திலிருந்து கருடக் கொடி இறக்கப்பட்டு, த்வஜாவரோகணம் நடைபெற்றது. இதன்மூலம் ஒன்பது நாள் நீடித்த பிரம்மோற்சவம் இனிதே நிறைவு பெற்றது. 

இதையும் படிங்க: கோவிந்தா... கோபாலா..! திருப்பதி பிரம்மோற்சவம்... மோகினி அவதாரத்தில் சுவாமி வீதியுலா.!!