பஞ்சபூத ஸ்தலங்களில் அக்னி ஸ்தலமாக விளங்கும் திருவண்ணாமலை அண்ணாமலையார் கோயிலின் தலைசிறந்த திருவிழாவான திருக்கார்த்திகை தீபத் திருவிழாவின் சிகர நிகழ்வு நெருங்குவதால், மாவட்ட நிர்வாகம் மற்றும் காவல் துறை சார்பில் முன்னேற்பாடு பணிகள் தற்போது தீவிரமடைந்துள்ளன. கடந்த நவம்பர் 24ஆம் தேதி கொடியேற்றத்துடன் தொடங்கிய இந்தத் திருவிழாவின் மாபெரும் நிகழ்வாக, வருகின்ற டிசம்பர் 3ஆம் தேதி அதிகாலை 4 மணி அளவில் கோயில் கருவறையில் பரணி தீபமும், அதே நாள் மாலை 6 மணி அளவில் கோயில் பின்புறம் உள்ள 2668 அடி உயர மலை மீது மகா தீபமும் ஏற்றப்பட உள்ளது.
இந்தத் தெய்வீகத் திருவிழாவைக் காணத் தமிழகம் மட்டுமின்றி, வெளி மாநிலங்கள் மற்றும் வெளிநாடுகளிலிருந்து சுமார் 40 லட்சத்திற்கும் அதிகமான பக்தர்கள் திருவண்ணாமலைக்கு வருவார்கள் என்று மாவட்ட நிர்வாகம் எதிர்பார்க்கிறது. பக்தர்களின் பாதுகாப்பே முதன்மை என்ற அடிப்படையில், வடக்கு மண்டல ஐ.ஜி அஸ்ரா கர்க் தலைமையில் 15,000 போலீசார் பாதுகாப்புப் பணியில் ஈடுபட உள்ளனர்.
மேலும், அண்ணாமலையார் கோயில் வளாகம் மற்றும் கிரிவலப் பாதை உள்ளிட்ட அதிமுக்கியத்துவம் வாய்ந்த 1060 இடங்களில் நவீன கண்காணிப்பு கேமராக்கள் பொருத்தும் பணிகள் வேகமாக நடைபெற்று வருகின்றன. மாநகராட்சிக்கு உட்பட்ட 24 இடங்களில் தற்காலிகப் பேருந்து நிலையங்கள் அமைக்கப்பட்டு, குடிதண்ணீர், கழிப்பிடம் உள்ளிட்ட அடிப்படை வசதிகள் ஏற்பாடு செய்யப்பட்டுள்ளன. தவிர, 130 இடங்களில் கார் பார்க்கிங் வசதிக்கான கட்டமைப்புப் பணிகளும் தீவிரமடைந்துள்ளன. பக்தர்களுக்கு மருத்துவ வசதி அளிக்கும் நோக்கில், கோயில் வளாகம், கிரிவலப் பாதை மற்றும் நகர் முழுவதும் சுகாதாரத் துறை சார்பில் 97 சிறப்பு மருத்துவ முகாம்கள் அமைக்கப்பட்டுள்ளன.
இதையும் படிங்க: திருவண்ணாமலை மகாதீபம்.... மலையேறு அனுமதி இருக்கா? ஆவலுடன் காத்திருக்கும் பக்தர்கள்...!
தமிழகம் முழுவதிலிருந்தும் வரும் பக்தர்களின் வசதிக்காகத் தமிழ்நாடு அரசுப் போக்குவரத்துக் கழகம் சார்பில் 4,764 சிறப்புப் பேருந்துகள் திருவண்ணாமலைக்கு இயக்கப்பட உள்ளன. குறிப்பாக, ஆந்திரா மற்றும் கர்நாடக மாநிலங்களிலிருந்து வரக்கூடிய வெளி மாநில பக்தர்களுக்காகக் கூடுதலாக 520 சிறப்புப் பேருந்துகள் இயக்கப்பட உள்ளன. ரயில் பயணிகளின் வசதிக்காக, தென்னக ரயில்வே சார்பில் ஏற்கனவே இயக்கப்படும் 16 ரயில்களுடன் கூடுதலாக 16 சிறப்பு ரயில்கள் இயக்கப்படும் என்றும் அதிகாரப்பூர்வமாகத் தெரிவிக்கப்பட்டுள்ளது. இந்த விரிவான முன்னேற்பாடுகள் அனைத்தும் பக்தர்களுக்குச் சுகமான பயணத்தை உறுதி செய்யும் என்று எதிர்பார்க்கப்படுகிறது.
இதையும் படிங்க: தி.மலையில் 15,000 போலீஸ் பாதுகாப்பு..!! சென்னை ஐகோர்ட்டில் அறிக்கை தாக்கல்..!!