விஜய் (Vijay) தலைமையிலான தமிழக வெற்றிக் கழகம் (Tamilaga Vettri Kazhagam) தமிழக அரசியலில் புதிய சக்தியாக உருவெடுத்துள்ள நிலையில், இளைஞர்களின் ஆதரவு தற்போது திமுக மற்றும் அதிமுக ஆகிய இரு பெரிய கட்சிகளிலும் அதிர்வலைகளை ஏற்படுத்தியுள்ளது. முதன்முறையாக சட்டசபை தேர்தலில் போட்டியிட்ட தவெக, 107 இடங்களில் வெற்றி பெற்று ஆட்சியை அமைத்தது தமிழக அரசியலின் மிகப்பெரிய திருப்பமாக பார்க்கப்படுகிறது.

தேர்தல் பிரசாரத்தின் போது விஜய் சென்ற இடமெல்லாம் இளைஞர்களின் மிகப்பெரிய வரவேற்பு காணப்பட்டது. குறிப்பாக சமூக வலைதளங்களில் தவெக ஆதரவாக வெளியான ரீல்ஸ், வீடியோக்கள் மற்றும் டிஜிட்டல் பிரசாரம் அனைத்திற்கும் இளைஞர்களே முக்கிய காரணமாக இருந்தனர். இதே நேரத்தில், திமுக மற்றும் அதிமுக கட்சிகளில் இளைஞர் அமைப்புகள் இருந்தாலும், புதிய தலைமுறை வாக்காளர்களை ஈர்க்கும் அளவுக்கு இளம் முகங்கள் இல்லை என்ற விமர்சனமும் எழுந்துள்ளது.

உதயநிதி ஸ்டாலின் (Udhayanidhi Stalin) தலைமையிலான திமுக இளைஞரணியில் கூட பல மூத்த நிர்வாகிகளே ஆதிக்கம் செலுத்துவதாக கட்சிக்குள் பேசப்படுகிறது. சமீபத்தில், முன்னாள் எம்.எல்.ஏ. எழிலன் நாகநாதன்( Ezhilan Naganathan) “60 வயதுக்கு மேற்பட்டவர்களுக்கு சீட் வழங்கக்கூடாது” என்ற கருத்தை மறைமுகமாக சமூக வலைதளங்களில் பதிவு செய்தது கட்சிக்குள் விவாதத்தை ஏற்படுத்தியது.

இதையும் படிங்க: நொடிக்கு நொடி ட்விஸ்ட்..! தவெக அமைச்சரவையில் IUML..! அமைச்சராகிறார் MLA ஷாஜகான்..!!

மறுபுறம், தவெக வேட்பாளர்களில் பெரும்பாலானோர் இளைஞர்களாக இருந்தனர். 29 வயதான கீர்த்தனா அமைச்சராகவும், 30 வயதான சபரிநாதன் அரசு தலைமை கொறடாவாகவும் நியமிக்கப்பட்டது அரசியல் வட்டாரங்களில் கவனத்தை ஈர்த்தது. அமைச்சரவை விரிவாக்கத்திலும் மேலும் சில இளம் முகங்களுக்கு வாய்ப்பு வழங்கப்படலாம் என கூறப்படுகிறது.

எடப்பாடி பழனிசாமி (Edappadi K. Palaniswami) தலைமையிலான அதிமுகவிலும் இதே விவாதம் எழுந்துள்ளது. சமீபத்தில் மாவட்ட செயலாளர்களுடன் நடைபெற்ற ஆலோசனையில், “கட்சியில் அதிகளவில் இளைஞர்களை சேர்க்க வேண்டும்” என்று பழனிசாமி வலியுறுத்தியதாக தகவல்கள் வெளியாகியுள்ளன. இதனை ஆதரித்த கட்சி நிர்வாகிகள், “இனி இளைஞர்களுக்கே வழிவிட வேண்டும்” என கருத்து தெரிவித்ததாக கூறப்படுகிறது.

தமிழக அரசியலில் இளைஞர்களின் ஆதரவு எந்தக் கட்சிக்கு செல்கிறது என்பதே இனி தேர்தல் வெற்றியை தீர்மானிக்கும் முக்கிய காரணியாக மாறிவிட்டதாக அரசியல் பார்வையாளர்கள் மதிப்பிடுகின்றனர்.

இதையும் படிங்க: திருமா ஸ்ட்ரிக்ட் ஆர்டர்! பணிந்த விஜய்! அதிமுகவினருக்கு ஆப்பு வைத்த அமைச்சரவை!