ஜெம் வீரமணி மீதான போக்சோ வழக்கு தொடர்பாகப் புகார் அளித்த காங்கிரஸ் பிரமுகர் எம்.பி. ரஞ்சன் குமார், தமிழக காங்கிரஸ் கட்சியின் பட்டியலினப் பிரிவுத் தலைவர் பதவியிலிருந்து மாற்றப்பட்டுள்ளார். அவருக்குப் பதிலாக ஆர். செந்தமிழ்செல்வன் புதிய தலைவராக நியமிக்கப்பட்டுள்ளார். இந்த நியமன அறிவிப்பை அகில இந்திய காங்கிரஸ் கமிட்டி வெளியிட்டுள்ளது.

சிறுமிகள் மீதான பாலியல் குற்றச்சாட்டுகள் தொடர்பாகப் பதிவு செய்யப்பட்ட போக்சோ வழக்கில், ஜெம் வீரமணி தற்போது சிறையில் அடைக்கப்பட்டுள்ளார். இந்த வழக்கு தொடர்பாக காங்கிரஸ் நிர்வாகி ரஞ்சன் குமாரின் தலையீடு குறித்து சர்ச்சை எழுந்தது. ஜெம் வீரமணி தரப்பினருக்கும் சாந்தி தரப்பினருக்கும் இடையே நடைபெற்ற பேச்சுவார்த்தைகளில் ரஞ்சன் குமாரின் பங்கு என்ன என்பது குறித்து பல்வேறு ஊடகங்களில் செய்திகள் வெளியாகின.

இந்த விவகாரம் தொடர்பாக ரஞ்சன் குமாரும் ஊடகங்களுக்குப் பேட்டி அளித்திருந்தார். மேலும், ஜெம் வீரமணி வழக்கை விசாரித்து வரும் சிறப்புப் புலனாய்வுக் குழுவினர் ரஞ்சன் குமாரிடம் விசாரணை நடத்தியதாகவும் தெரிவிக்கப்பட்டது.

இதையும் படிங்க: ஜெம் வீரமணி மீது மேலும் ஒரு சிறுமி புகார்! 7-வது வழக்குப் பதிவு! நிறுவன மேலாளர் அதிரடி கைது!

இந்தச் சூழலில், தமிழக காங்கிரஸ் கட்சியின் பட்டியலினப் பிரிவுத் தலைவர் பொறுப்பில் மாற்றம் செய்யப்பட்டுள்ளது. இந்தப் பதவி மாற்றத்துக்கான காரணம் குறித்து வெளியிடப்பட்ட நியமன அறிவிப்பில் குறிப்பிட்ட விளக்கம் எதுவும் தெரிவிக்கப்படவில்லை.

புதிய தலைவர் மற்றும் செயல் தலைவர்கள் நியமனம்

அகில இந்திய காங்கிரஸ் கமிட்டியின் பொதுச்செயலாளர் கே.சி. வேணுகோபால், அக்டோபர் 23ஆம் தேதி வெளியிட்ட அறிவிப்பில், தமிழ்நாடு மற்றும் ஜம்மு காஷ்மீர் மாநிலங்களுக்கான காங்கிரஸ் பட்டியலினப் பிரிவுத் தலைவர்கள் நியமனத்துக்கு கட்சித் தலைவர் மல்லிகார்ஜுன கார்கே ஒப்புதல் அளித்துள்ளதாகக் குறிப்பிட்டுள்ளார்.

அதன்படி, தமிழக காங்கிரஸ் பட்டியலினப் பிரிவின் புதிய தலைவராக ஆர். செந்தமிழ்செல்வன் நியமிக்கப்பட்டுள்ளார். ஜம்மு காஷ்மீர் மாநிலப் பட்டியலினப் பிரிவுத் தலைவராக அசோக் குமார் பகத் நியமிக்கப்பட்டுள்ளார்.

இதனைத் தொடர்ந்து, அகில இந்திய காங்கிரஸ் பட்டியலினப் பிரிவுத் தலைவர் ராஜேந்திர பால் கவுதமும் அக்டோபர் 23ஆம் தேதியிட்டு நியமனக் கடிதம் ஒன்றை வெளியிட்டுள்ளார். தமிழக காங்கிரஸ் தலைவர் மாணிக்கம் தாகூருக்கு அனுப்பப்பட்ட அந்தக் கடிதத்தில், தமிழக காங்கிரஸ் பட்டியலினப் பிரிவின் செயல் தலைவர்களாக ஆர். கலைச்செல்வன் மற்றும் பி.வி. தமிழ்செல்வன் ஆகியோர் நியமிக்கப்பட்டுள்ளதாகத் தெரிவிக்கப்பட்டுள்ளது.

ஜெம் வீரமணி வழக்கு தொடர்பான சர்ச்சைகளுக்கு மத்தியில், தமிழக காங்கிரஸ் பட்டியலினப் பிரிவின் தலைமைப் பொறுப்பில் இந்த மாற்றம் நிகழ்ந்துள்ளது

இதையும் படிங்க: வீரமணி வழக்கில் திடீர் திருப்பம்: சிபிஐ விசாரணை கோரி மனு! ஐகோர்ட் அதிரடி உத்தரவு!