காஞ்சிபுரம் மாவட்டம் பரந்தூரில் அமையவிருந்த சென்னையின் இரண்டாவது பசுமை சர்வதேச விமான நிலையத் திட்டத்தைத் தமிழக அரசு அதிகாரப்பூர்வமாகக் கைவிட்டுள்ளது. முதலமைச்சர் ஜோசப் விஜய் சட்டப்பேரவையில் 110-ஆவது விதியின் கீழ் அறிவித்த இந்த முடிவு, விவசாய நிலங்கள் பாதுகாப்பு, உள்ளூர் மக்களின் வாழ்வாதாரம் மற்றும் சுற்றுச்சூழல் சமநிலையை முதன்மைப்படுத்துவதாக அமைந்துள்ளது. தேர்தல் வாக்குறுதியை நிறைவேற்றும் வகையில் இது வெளியிடப்பட்டதாக அரசுத் தரப்பில் தெரிவிக்கப்பட்டுள்ளது.

முந்தைய ஆட்சியில் அறிவிக்கப்பட்ட இந்த மெகா உள்கட்டமைப்புத் திட்டம், தமிழகப் பொருளாதார வளர்ச்சியை முடுக்கிவிடும் முக்கியத் திட்டமாகக் கருதப்பட்டது. சுமார் 5,000 ஏக்கருக்கும் மேற்பட்ட பரப்பில், ரூ.27,000 கோடிக்கும் அதிக மதிப்பீட்டில் திட்டமிடப்பட்ட இது, மீனம்பாக்கம் விமான நிலையத்தின் முழுக் கொள்ளளவைத் தாண்டிய பயணிகள் மற்றும் சரக்குத் தேவையைப் பூர்த்தி செய்யும் என எதிர்பார்க்கப்பட்டது.

ஆனால் நிலம் கையகப்படுத்துதல், நீர்நிலைகள் பாதிப்பு, விவசாயிகள் இடப்பெயர்வு போன்ற காரணங்களால் உள்ளூர் மக்கள் பல ஆண்டுகளாகப் போராட்டம் நடத்தினர். சுமார் 1,700 ஏக்கர் நிலம் ஏற்கனவே கையகப்படுத்தப்பட்டிருந்தாலும், அரசு இந்தத் தளத்தைக் கைவிட்டுள்ளது. அறிவிப்பு வெளியான உடனேயே அண்டை மாநிலங்களான கர்நாடகாவின் பெங்களூரு மற்றும் தெலங்கானாவின் ஹைதராபாத் தொழில் வட்டாரங்களில் இது வரவேற்பைப் பெற்றுள்ளதாகத் தகவல்கள் தெரிவிக்கின்றன. 

இதையும் படிங்க: பரந்தூர் திட்டத்தை கைவிடுகிறதா தமிழக அரசு? தயாநிதி மாறன் கேள்விக்கு மத்திய அரசு அளித்த சுவாரஸ்ய பதில்!

உலகளாவிய நிறுவனங்கள், ஐடி ஜாம்பவான்கள் மற்றும் உற்பத்தி நிறுவனங்கள் தென்னிந்தியாவைத் தேர்வு செய்யும்போது தடையற்ற சர்வதேச விமான இணைப்பு மற்றும் சரக்கு வசதியை முதன்மைக் காரணமாகப் பார்க்கின்றன. மீனம்பாக்கம் ஏற்கனவே அதன் வரம்பை எட்டியுள்ள நிலையில், புதிய விமான நிலையம் தாமதமானால் சென்னைக்கு வரவிருந்த முதலீடுகள் அண்டை மாநிலங்களுக்குத் திருப்பப்படலாம் என்ற கவலை தொழில் வல்லுநர்களிடையே எழுந்துள்ளது.

கர்நாடக அரசு பெங்களூர் கெம்பேகவுடா விமான நிலையத்தை இரண்டாவது முனையத்துடன் விரிவாக்கி வருகிறது. தெலங்கானாவும் ஹைதராபாத் ராஜீவ் காந்தி விமான நிலையத்தை நீண்டகாலத் தேவைக்கேற்ப மேம்படுத்தியுள்ளது. இதனால் தென்னிந்தியாவின் முதன்மைத் தொழில் மையமாகச் சென்னையின் நிலை சவாலுக்குள்ளாகும் அபாயம் உள்ளது என பொருளாதார ஆய்வாளர்கள் சுட்டிக்காட்டுகின்றனர்.

முதலமைச்சர் விஜய், மாற்று இடங்களை நிபுணர் குழுக்கள் தொழில்நுட்பச் சாத்தியக்கூறு ஆய்வு செய்து தேர்வு செய்யும் எனவும், மீனம்பாக்கம் விமான நிலையத்தில் ஐந்தாவது முனையம் அமைத்து கொள்ளளவை அதிகரிக்கும் எனவும் தெரிவித்தார். உள்ளூர் மக்களின் உணர்வுகளுக்கு மதிப்பளித்த இந்த முடிவு வரவேற்பைப் பெற்றிருந்தாலும், நீண்டகாலப் பொருளாதாரப் பார்வையில் தமிழகத் தொழில்துறைக்குப் பின்னடைவாக அமையக்கூடும் என்ற எச்சரிக்கைகளும் எழுந்துள்ளன. 

மாற்றுத் தளத்தை விரைவில் இறுதிசெய்து பணிகளைத் துரிதப்படுத்தாவிட்டால், தமிழகம் தென்னிந்தியாவின் முன்னணி முதலீட்டு மையமாகத் தன் இடத்தை இழக்க நேரிடும் எனத் தொழில்துறை நிபுணர்கள் கருத்துத் தெரிவிக்கின்றனர்.

இதையும் படிங்க: கூட்டணி அறிவிப்பில் அவசரம் காட்டிய விசிக? விஜய்யின் மௌனத்தால் வருத்தத்தில் சிறுத்தைகள்!!