சென்னை: தமிழக சட்டசபைத் தேர்தலில் 108 தொகுதிகளில் வெற்றி பெற்று அதிக இடங்களைப் பெற்ற கட்சியாக உருவெடுத்த த.வெ.க., ஆட்சி அமைக்கும் முயற்சியில் கணிசமான தடுமாற்றங்களை சந்தித்து வருகிறது. கூட்டணி அமைப்பதில் முன் அனுபவம் இல்லாததும், ஆட்சி அமைக்கும் சட்ட விதிமுறைகள் குறித்த தெளிவு இல்லாததுமே இதற்கு முக்கிய காரணமாகக் கூறப்படுகிறது.

த.வெ.க. நிர்வாகிகள் சிலர் தெரிவித்தபடி, கட்சி தொடங்கிய நாள் முதலே அரசியல் அனுபவமின்மை பல சிக்கல்களை ஏற்படுத்தியுள்ளது. பிரசார கூட்டங்கள் நடத்துவதில் ஏற்பட்ட குளறுபடிகள், தேர்தல் கமிஷனுக்கு அனுப்ப வேண்டிய கடிதங்களை தவறான அலுவலகத்துக்கு அனுப்பிய சம்பவங்கள், உள்துறை செயலருக்கு அனுப்ப வேண்டிய கடிதத்தை மணிப்பூர் கவர்னருக்கு அனுப்பியது போன்ற தவறுகள் தேர்தலுக்கு முன்பே நடந்துள்ளன.

தேர்தல் முடிவுகளுக்குப் பிறகு நிலைமை மேலும் சிக்கலாகியது. அதிக தொகுதிகளைப் பெற்ற கட்சியாக இருந்தும், கவர்னரிடம் ஆட்சி அமைக்க உரிமை கோரும் கடிதத்தை சரியான முறையில் சமர்ப்பிக்கத் தவறியது. நள்ளிரவில் கவர்னர் மாளிகைக்கு சென்று கடிதம் கொடுக்க முயன்றபோது அதிகாரிகள் முறையான வழிமுறைகளை எடுத்துரைத்தனர். மேலும், கவர்னரை சந்திக்கச் சென்றபோது பூங்கொத்து எடுத்துச் செல்லாதது உள்ளிட்ட சிறு சிறு தவறுகளும் நடந்துள்ளன.

இதையும் படிங்க: கட்சியை காப்பாத்துவாரா எடப்பாடி! இறங்கி அடிக்கும் விஜய்! தவெகவுக்கு ஆதரவளித்தால் மட்டுமே அதிமுக பிழைக்கும்?!

கூட்டணி பேச்சுகளிலும் தலைமை சரியான அணுகுமுறையை கடைப்பிடிக்கவில்லை என்று விமர்சனங்கள் எழுந்துள்ளன. அனுபவம் மிக்க நிர்வாகிகளான முன்னாள் அமைச்சர் செங்கோட்டையன், ஜே.சி.டி. பிரபாகர் போன்றோரின் ஆலோசனைகளை புறக்கணித்துவிட்டு, அரசியல் அனுபவம் குறைந்த நண்பர்கள் மூலம் பேச்சு நடத்தியதால் வி.சி.க. மற்றும் கம்யூனிஸ்ட் கட்சிகளுடன் உரிய ஒருங்கிணைப்பு ஏற்படவில்லை. இதனால் கூட்டணி பேச்சுகள் நீடித்து வருகின்றன.

108 தொகுதி வெற்றியைப் பயன்படுத்தி உடனடியாக ஆட்சி அமைக்கும் வாய்ப்பு இருந்தும், அனுபவமின்மை காரணமாக த.வெ.க. தற்போது திணறி வருகிறது. அ.தி.மு.க.வுடன் கூட்டணி பேச்சுகள் நடைபெறும் சூழலும் உருவாகியுள்ளது. தி.மு.க.வோ அல்லது அ.தி.மு.க.வோ இந்த நிலையில் இருந்திருந்தால் இந்நேரம் பதவி ஏற்பு விழா நடைபெற்றிருக்கும் என்கின்றனர் கட்சி வட்டாரங்கள்.

தமிழக அரசியலில் புதிய சக்தியாக உருவெடுத்த த.வெ.க.வுக்கு இந்த அனுபவமின்மை பெரும் சவாலாக மாறியுள்ளது. அடுத்த சில நாட்களில் ஆட்சி அமைப்பு தொடர்பான தெளிவான முடிவு வருமா என்பது அரசியல் பார்வையாளர்களின் எதிர்பார்ப்பாக உள்ளது. 

இதையும் படிங்க: Breaking News!! இரண்டாக உடைகிறது அதிமுக! களத்தில் குதித்த விஜய்! தவெகவுக்கு எஸ்.பி வேலுமணி - சி.வி.சண்முகம் ஆதரவு?!