மதுராந்தகம், தாராபுரம் இடைத்தேர்தல்களில் தி.மு.க போட்டியிடுமா அல்லது தேர்தலை புறக்கணிக்குமா என்ற எதிர்பார்ப்பு நீடித்து வந்த நிலையில், இரு தொகுதிகளுக்கும் வேட்பாளர்களை அறிவித்து கட்சித் தலைவர் மு.க.ஸ்டாலின் அரசியல் வட்டாரத்தில் பரபரப்பை ஏற்படுத்தியுள்ளார். இந்த வேட்பாளர் தேர்வுக்குப் பின்னால் துணை முதல்வர் உதயநிதி ஸ்டாலினின் முக்கிய பங்கு இருந்ததாக தி.மு.க. வட்டாரங்களில் பேசப்படுவதாக தகவல்கள் தெரிவிக்கின்றன.
அ.தி.மு.க. வசம் இருந்த இரு தொகுதிகளிலும் போட்டியிடுவதால், தவெக-வுக்கு எதிரான நேரடி அரசியல் சவாலாக இந்த இடைத்தேர்தல் மாறும் என கட்சிக்குள் சிலர் கருதியதாக கூறப்படுகிறது. குறிப்பாக தவெக-வின் செல்வாக்கை கணக்கில் கொண்டு தேர்தலை தவிர்ப்பது எதிர்க்கட்சிகளின் விமர்சனத்துக்கு வழிவகுக்கும் என உதயநிதி தரப்பில் வலியுறுத்தப்பட்டதாக தகவல் வெளியாகியுள்ளது.
“இரண்டு தொகுதிகளையும் வெல்வது என்னுடைய பொறுப்பு” என்ற நிலைப்பாட்டுடன் உதயநிதி வேட்பாளர் தேர்விலும் தீவிரமாக ஈடுபட்டதாக கட்சி வட்டாரங்கள் கூறுகின்றன. இதன் தொடர்ச்சியாக மதுராந்தகம் தொகுதிக்கு வழக்கறிஞர் ஐ.பரந்தாமன் தேர்வு செய்யப்பட்டுள்ளார்.
இதையும் படிங்க: டபுள் மீனிங், டிரிபிள் மீனிங் பேச்சு? பெண்களை அவதூறாக பேசினால்.. சட்டசபையில் முதல்வர் விஜய் வார்னிங்!
முன்னதாக, விடுதலைச் சிறுத்தைகள் கட்சியில் இருந்து விலகி தி.மு.க.வில் இணைந்த பனையூர் பாபுவை வேட்பாளராக நிறுத்துவது குறித்து ஆலோசனை நடந்ததாகவும், தாராபுரத்தில் முன்னாள் அமைச்சர் கயல்விழி செல்வராஜின் பெயரும் பரிசீலிக்கப்பட்டதாகவும் கூறப்படுகிறது. ஆனால், இந்த யோசனைகளுக்கு மாற்றாக பரந்தாமனை உதயநிதி பரிந்துரைத்ததாக தகவல்கள் தெரிவிக்கின்றன.
கட்சியில் இணைந்து குறுகிய காலமே ஆனவருக்கு வாய்ப்பு வழங்கினால், உள்ளூர் நிர்வாகிகள் மற்றும் அமைச்சர்களின் தேர்தல் பணியில் ஒருங்கிணைப்பு சிக்கல் ஏற்படலாம் என்ற கருத்தும் முன்வைக்கப்பட்டதாக கூறப்படுகிறது. அதேநேரத்தில், எதிரணியின் அரசியல் தாக்குதல்களுக்கு பதிலளிக்கக்கூடிய அனுபவமும் பரந்தாமனுக்கு இருப்பதாக உதயநிதி தரப்பு கருதியதாக தகவல்கள் தெரிவிக்கின்றன.
தாராபுரத்தில் கயல்விழி செல்வராஜுக்கு உள்ளூர் நிர்வாகிகள் மத்தியில் எதிர்ப்பு இருப்பதாக கூறப்பட்ட நிலையில், புதிய முகமாக வழக்கறிஞர் சுகன்யா தேர்வு செய்யப்பட்டுள்ளதாக கட்சி வட்டாரங்கள் தெரிவிக்கின்றன. இதன்மூலம், இரு தொகுதிகளிலும் வெற்றியை இலக்காக வைத்து தி.மு.க. தேர்தல் களத்தில் இறங்கியுள்ளது.
இதையும் படிங்க: முதல்வர் விஜய்யின் நெற்றியில் திடீர் மாற்றம்! கருப்புக்கு பதில் சிகப்பு பொட்டு?! எதிரிகளை வெல்லும் கஜகேசரி திலகம்!