ஜெம் கிரானைட்ஸ் நிறுவனத்தைச் சேர்ந்த ஆர். வீரமணி மீதான போக்சோ வழக்கு தமிழக அரசியல் வட்டாரத்தில் பெரும் விவாதத்தை ஏற்படுத்தியுள்ள நிலையில், இந்த வழக்கு முதல்வர் விஜய்யின் தீவிர தனி கண்காணிப்பில் இருப்பதாக அமைச்சர் ராஜ்மோகன் தெரிவித்துள்ளார். வழக்கில் தொடர்புடைய யாராக இருந்தாலும் சட்டத்தின் முன் நிறுத்தப்படுவார்கள் என்றும் அவர் கூறியுள்ளார்.

சென்னையில் செய்தியாளர்களிடம் பேசிய அமைச்சர் ராஜ்மோகன், வீரமணி வழக்கின் ஆரம்பகட்ட விசாரணை தொடர்பாக முன்னாள் ஆட்சியை நோக்கி பல்வேறு கேள்விகளை எழுப்பினார். குறிப்பாக, வழக்கை முடித்து வைக்க அறிக்கை தாக்கல் செய்ய உத்தரவிட்டது யார், அந்த முடிவுக்கு பின்னால் அதிகாரியோ அல்லது அரசியல் செல்வாக்கு கொண்ட நபரோ இருந்தாரா என்பது குறித்து விசாரணை நடத்த வேண்டும் என அவர் வலியுறுத்தினார்.

வீரமணி மீதான வழக்கில் போலீசார் முன்பு விசாரணையை முடிக்க முயன்றதாகவும், பின்னர் நீதிமன்ற தலையீட்டுக்குப் பிறகு விசாரணை தீவிரப்படுத்தப்பட்டதாகவும் ஏற்கனவே தகவல்கள் வெளியாகியுள்ளன. தொடர்ந்து நடைபெற்ற விசாரணையில் வீரமணி உள்ளிட்டோர் கைது செய்யப்பட்டதுடன், மேலும் பலர் பாதிக்கப்பட்டிருக்கலாம் என்ற கோணத்திலும் விசாரணை விரிவுபடுத்தப்பட்டுள்ளது.

இதையும் படிங்க: யாராக இருந்தாலும் சட்டத்தின் முன் நிறுத்துங்கள்! நிறைய பணம் கைமாறி இருக்கு! GEM வீரமணி வழக்கில் அண்ணாமலை அதிரடி!

இந்த நிலையில், கடந்த காலத்தில் இந்த வழக்கின் விசாரணை ஏன் தாமதமானது என்பதையும், அதை தடுக்க அல்லது திசைதிருப்ப முயற்சிகள் நடந்தனவா என்பதையும் கண்டறிய போலீசார் தனியாக விசாரணை நடத்தி வருகின்றனர். நிதிப் பரிமாற்றங்கள் தொடர்பான தகவல்களும் ஆய்வில் இருப்பதாக போலீஸ் தரப்பை மேற்கோள் காட்டி செய்திகள் தெரிவிக்கின்றன.

இதுகுறித்து பேசிய ராஜ்மோகன், அதிகாரமும் அரசியல் செல்வாக்கும் கொண்டவர்கள் இதுபோன்ற வழக்குகளில் சிக்கும்போது பணம் கைமாறியதா என்பதையும் விசாரிக்க வேண்டும் என்றார். மேலும், கடந்த ஆட்சிக் காலத்தில் சுமார் ஒரு வருடம் இந்த வழக்கில் நடவடிக்கை இல்லாமல் இருந்ததாகக் கூறி, அதற்கு காரணம் என்ன என்றும் அவர் கேள்வி எழுப்பினார்.

அதே நேரத்தில், கம்யூனிஸ்ட் கட்சியுடனான தமிழக வெற்றிக்கழகத்தின் கூட்டணி உறுதியாக இருப்பதாகவும், அந்தக் கட்சியின் மூத்த தலைவர்கள் தங்களுக்கு வழிகாட்டி வருவதாகவும் அமைச்சர் தெரிவித்தார்.

வீரமணி வழக்கில் பாதிக்கப்பட்டவர்களின் அடிப்படை உரிமைகள் பாதுகாக்கப்பட வேண்டும் என்றும், உண்மையில் குற்றத்தில் தொடர்புடையவர்கள் யாராக இருந்தாலும் சட்டப்படி நடவடிக்கை எடுக்கப்படும் என்றும் ராஜ்மோகன் கூறினார். இந்த வழக்கு தொடர்பான விசாரணை தொடர்ந்து தீவிரமாக நடைபெற்று வருகிறது.

இதையும் படிங்க: அடம்பிடிக்கும் ஆட்சியாளர்கள் இல்லை நாங்கள்! புதிய தலைமைச் செயலகம்! அமைச்சர் ராஜ்மோகன் பதில்!