தமிழ்நாடு முழுவதும் கொசுக்களால் பரவும் டெங்கு காய்ச்சல் மற்றும் உண்ணிக் காய்ச்சல் அசுர வேகத்தில் பரவி மக்கள் கொத்துக்கொத்தாக மருத்துவமனைகளில் தஞ்சமடைந்து வரும் சூழலில், உரிய முன்னெச்சரிக்கை மற்றும் தடுப்பு நடவடிக்கைகளை எடுக்காமல் மக்களின் உயிரோடு விளையாடி வரும் தவெக அரசுக்கு அதிமுக பொதுச்செயலாளரும் எதிர்க்கட்சித் தலைவருமான எடப்பாடி கே. பழனிசாமி மிகக் கடுமையான கண்டனத்தைத் தெரிவித்துள்ளார்.

தமிழகத்தில் டெங்கு பரவல் குறித்து சுகாதாரத் துறை வெளியிட்டுள்ள அதிகாரப்பூர்வ புள்ளிவிவரங்களைச் சுட்டிக்காட்டி அறிக்கை வெளியிட்டுள்ள எடப்பாடி பழனிசாமி, தமிழ்நாட்டில் கடந்த செப்டம்பர் 21 வரை மட்டும் அதிகாரப்பூர்வமாக 17,348 பேருக்கு டெங்கு பாதிப்பு உறுதி செய்யப்பட்டுள்ளது; உண்ணிக் காய்ச்சலால் (Scrub Typhus) இதுவரை 4,653 பேர் பாதிக்கப்பட்டுள்ளனர். செப்டம்பர் 21 அன்று ஒரே நாளில் மட்டும் 71 பேருக்கு டெங்கு தொற்று கண்டறியப்பட்டுள்ளது. 

தவெக அரசின் நிர்வாகச் சீர்கேடு மற்றும் அலட்சிய மனப்பான்மையால் அரசு மற்றும் தனியார் மருத்துவமனைகளின் காய்ச்சல் வார்டுகள் படுக்கைகள் இன்றி நிரம்பி வழிகின்றன. பத்திரிகைகளும் பொதுமக்களும் தொடர்ச்சியாக எச்சரித்தபோதும், தூங்கிக் கொண்டிருக்கும் இந்த அரசு எவ்வித உருப்படியான சுகாதாரப் பணிகளையும் மேற்கொள்ளவில்லை என்று மிகக் காட்டமாகச் சாடியுள்ளார்.

இதையும் படிங்க: தவெக அரசு 5 ஆண்டுகள் நிலைக்காது! வேலூரில் எடப்பாடி பழனிசாமி பேட்டி!

அண்ணா பல்கலைக்கழக மாணவர் உயிரிழந்த விவகாரத்தைக் குறிப்பிட்ட அவர், மாணவர் பலியானபோது கூட உண்மையை மறைத்து, அது ஸ்க்ரப் டைபஸ் காய்ச்சல் என்று திசை திருப்புவதில் காட்டிய தீவிரத்தை, சுகாதாரப் பணிகளில் தவெக அரசு காட்டவில்லை. மேலும், பொது சுகாதாரத் துறை இயக்குநர் தலைமையில் நடைபெற்ற அவசர ஆலோசனைக் கூட்டத்தில் துறை சார்ந்த சுகாதாரத் துறை அமைச்சர் கலந்துகொள்ளாமல் புறக்கணித்துள்ளார். 

டெங்கு குறித்து ஒரு வெற்று விழிப்புணர்வு வீடியோவை வெளியிட்டுவிட்டு, மக்கள் நலம் பற்றி எவ்விதக் கவலையுமின்றி அமைச்சர் அருண்ராஜ் தேர்தல் பிரச்சாரத்திற்கு ஓடிவிட்டார். கடந்த ஆண்டுடன் ஒப்பிட்டுப் பொய்களை அவிழ்த்துவிட்டுத் தப்பித்துக் கொள்ளப் பார்க்கிறார்களே தவிர, களத்தில் இறங்கி வேலை செய்ய இந்த ஆட்சிக்குத் துப்பில்லை என்று ஆவேசமாகக் குற்றம்சாட்டினார்.

தொடர்ந்து அதிமுக ஆட்சிக் காலத்தை நினைவுகூர்ந்த அவர், அம்மா ஆட்சியிலும், அம்மா அவர்களின் நல்லாசியுடன் நடைபெற்ற எனது தலைமையிலான அதிமுக ஆட்சியில், பருவமழை தொடங்குவதற்கு முன்பே வீடு வீடாகக் கொசு ஒழிப்பு மருந்து தெளித்தல், கொசுப்புழு ஒழிப்புப் பணிகள் மற்றும் சிறப்பு மருத்துவ முகாம்கள் போர்க்கால அடிப்படையில் முடுக்கிவிடப்பட்டன. 

அதனால் தான் பெருந்தொற்றுகளிலிருந்தும் உயிரிழப்புகளிலிருந்தும் மக்களைக் காப்பாற்ற முடிந்தது. இனியாவது இந்த டம்மி அரசு கண்விழித்து, போதிய மருந்துகள், படுக்கைகள், மருத்துவர்களை உறுதிசெய்து, வீடு வீடாகச் சென்று தூய்மைப் பணிகளை மேற்கொள்ள வேண்டும் என்று வலியுறுத்தியுள்ளார்.

இதையும் படிங்க: 5 லட்சம் நெல் மூட்டைகள் மழையில் நாசம்! தவெக அரசை விளாசிய அதிமுக பொதுச்செயலாளர் எடப்பாடி கே. பழனிசாமி!